1. индакасуттаван̣н̣ана̄

235. аттано парин̣а̄йакаттена индо на̄ма махесаккхо, индоти саман̃н̃а̄ асса̄ти катва̄ ‘‘индако’’типи вуччати, тасса индакасса. индакӯт̣е паббате нивасатӣти индакӯт̣анива̄сӣ, тасса индакӯт̣анива̄сино. баликаммехи йаджитаббато пӯджитаббато йаккхо, тасса йаккхасса. индасса нива̄сат̣т̣ха̄набхӯтам̣ кӯт̣ам̣ индакӯт̣анти йаккхато кӯт̣ена на̄мам̣ ладдхам̣. индакӯт̣о индо уттарападалопена йатха̄ ‘‘кела̄сакӯт̣о кела̄со’’ти. индо йаккхоти кӯт̣ато йаккхена на̄мам̣ ладдхам̣. на четтха итарӣтараниссайадосо ан̃н̃аман̃н̃ӯпалаккхан̣абха̄вато йатха̄ там̣ ‘‘ка̄йакаммат̣т̣ха̄на’’нти. рӯпанти сакалам̣ рӯпаккхандхама̄ха, на рӯпа̄йатананти. имам̣ сарӣрам̣ печча айам̣ кинти пат̣илабхатӣти чодети.

куто а̄гаччхатӣти пара̄дха̄рарӯпе джӣве аттани ма̄тукуччхимокканте рӯпасса самбхавоти куто на̄ма т̣ха̄нато а̄гаччхати. тена̄ха ‘‘има̄ни ча ат̣т̣хӣни има̄ ча мам̣сапесийо’’тиа̄ди. катхам̣ нвайанти айам̣ куччхисан̇кха̄те габбхаре катхам̣ саджджатӣти пуччхати. ‘‘сӣха̄нам̣ва наданта̄нам̣, да̄т̣хӣнам̣ гиригаббхаре’’тиа̄дина̄ (тхерага̄. нида̄нага̄тха̄) габбхаро ча куччхива̄чако а̄гато. тена̄ха ‘‘габбхарасминти ма̄тукуччхисми’’нти. пуггалава̄дӣти аттава̄дупа̄да̄но. йатха̄ хи маччхамам̣сам̣ бхуттам̣ пхен̣ам̣ вийа хутва̄ вилӣйати, на ча пан̃н̃а̄йати саттабха̄вена аппаваттанато, евамевам̣ йади ма̄тукуччхисмим̣ габбхабха̄вена уппаннам̣ рӯпам̣ сатто на бхавеййа но вад̣д̣хеййа, вилӣйитва̄ гаччхеййа, пан̃н̃а̄йати ча там̣ рӯпам̣, тасма̄ джӣвоти има̄йа ладдхийа̄. евама̄ха̄ти ‘‘рӯпам̣…пе… габбхарасми’’нти евамавоча. пат̣хаманти етесам̣ пан̃чаннам̣ пат̣хамам̣. тена̄ха ‘‘пат̣хамена пат̣исандхивин̃н̃а̄н̣ена саддхи’’нти. ‘‘джа̄тиун̣н̣ам̣сӯхӣти джа̄тиел̣ака̄йа ун̣н̣ам̣сӯхӣ’’ти ваданти. ‘‘габбхам̣ пха̄летва̄ гахитаун̣н̣а̄ джа̄тиун̣н̣а̄. тасса̄ ам̣сӯхи тӣхи катасуттагге’’ти сам̣йуттабха̄н̣ака̄нам̣ адхиппа̄йо.

ана̄вилоти аччхо, суппасанноти аттхо. евам̣ван̣н̣аппат̣ибха̄ганти вуттаппама̄н̣асан̣т̣ха̄насампариччхиннам̣. калалам̣ сампавуччатӣти аттабха̄во бхӯтупа̄да̄рӯпасан̇кха̄то санта̄навасена паваттама̄но калалам̣ на̄ма̄ти катхӣйати.

калала̄ти йатха̄вуттакалаларӯпахету там̣ нисса̄йа паччайам̣ катва̄. мам̣садхованаудакаван̣н̣анти ван̣н̣ато мам̣садхованаудакаван̣н̣ам̣, сан̣т̣ха̄нато пана вилӣнатипусадисам̣.

парипакканти парипа̄какалалабха̄вато парипа̄кам̣ гатам̣ супарипа̄кам̣ гатам̣. самӯхатанти самӯхабхӯтам̣ сан̇гатам̣. виват̣т̣ама̄нанти парин̣амантам̣. таббха̄ванти каран̣е етам̣ упайогавачанам̣, таббха̄вена парин̣амантанти аттхо. ниссакке ва̄ упайогавачанам̣, таббха̄вато калалабха̄вато калалам̣ випарин̣амантам̣. аббудам̣ на̄ма джа̄йати, аббудам̣ на̄ма сампаджджатӣти аттхо.

вилӣнатипусадиса̄ сан̣т̣ха̄навасена, ван̣н̣авасена пана сита̄ аратта̄ва хотӣти ваданти. ман̣д̣анти да̄рика̄нам̣ татха̄ пӣл̣анато ниббаттамаричапаккасса са̄рабхӯтам̣ расам̣. саббабха̄гехи муччатӣти со ман̣д̣о капа̄ле алагго хутва̄ тасса саббабха̄гехи муччхитва̄ пин̣д̣ито хутва̄ тит̣т̣хати. еварӯпа̄ песи хотӣти са̄ песи габбха̄сайе каттхачи алагга̄ йатха̄вуттаман̣д̣о вийа пин̣д̣ито хутва̄ тит̣т̣хати. тена̄ха ‘‘вилӣнатипусадиса̄’’ти.

песи ниббаттатӣти еттха песӣти ниссакке паччаттавачананти а̄ха ‘‘тато песито’’ти.

гханасса сан̣т̣ха̄нам̣. ниббаттам̣ каммапаччайа̄ти там̣сан̣т̣ха̄нам̣ рӯпадхамманиббаттийа̄ джа̄йати. ‘‘джара̄маран̣ам̣ аниччам̣ сан̇кхатам̣ пат̣иччасамуппанна’’нти (сам̣. ни. 2.20) хи вуттам̣.

пӣл̣ака̄ти пӣл̣акасадиса̄ мам̣сапин̣д̣а̄ джа̄йанти.

саттама̄дӣнӣти а̄ди-саддена ат̣т̣хамасатта̄хато пат̣т̣ха̄йа йа̄ва екачатта̄лӣса̄ чатуттим̣са сатта̄ха̄ни сан̇ган̣ха̄ти. парин̣атака̄ланти габбхасса парин̣атака̄лам̣. навама̄сато бахи парипакко на̄ма хоти кесалома̄диниббаттито. тена̄ха ‘‘два̄чатта̄лӣсе сатта̄хе ета̄ни джа̄йантӣ’’ти.

тасса̄ти габбхасеййакасаттасса. ма̄туударапат̣алена ека̄баддхо хоти йато ма̄тара̄ парибхуттаа̄ха̄ро а̄ма̄сайе патит̣т̣хите габбхасса на̄бхина̄л̣а̄нуса̄рена габбхагатасса сарӣрам̣ сампатва̄ а̄ха̄ракиччам̣ кароти. а̄ха̄расамут̣т̣ха̄нарӯпам̣ самут̣т̣ха̄петӣти габбхагатасса ка̄йе оджа̄йа паччайо хоти. са̄ ча там̣ паччайам̣ лабхитва̄ оджат̣т̣хамакам̣ рӯпам̣ самут̣т̣ха̄пети. евам̣ ма̄тара̄ парибхуттаа̄ха̄рапаччайена габбхагато даса ма̄се йа̄пети аттано на̄бхина̄л̣а̄нуса̄рагатенева тена йа̄ва а̄ха̄расамут̣т̣ха̄насатта̄хо, тато пат̣т̣ха̄йа а̄харан̣ато. кечи пана ‘‘ма̄тара̄ парибхуттаа̄ха̄ро ба̄хиравагго вийа тасса ка̄йам̣ абхисаннети парисаннети, тена со йа̄петӣ’’ти ваданти. куччхигатам̣ ударапат̣алена тирохитатта̄ бахи т̣хитанти ваттаббатам̣ на арахатӣти ‘‘куччхийа̄ аббхантарагато’’ти а̄ха. ма̄тукуччхигато нароти ма̄ту тирокуччхигато. евам̣ кхоти имина̄ йатха̄вутта̄ка̄рена айам̣ сатто…пе… ниббаттати, тасма̄ рӯпам̣ на джӣво. на хи дит̣т̣хигатасса сатта̄хаккамена вуд̣д̣хиппатто иччхито аниччата̄паттито.

индакасуттаван̣н̣ана̄ нит̣т̣хита̄.