5. катичхиндасуттаван̣н̣ана̄

5. чхиндантоти самуччхинданто. кати чхиндеййа̄ти киттаке па̄падхамме самуччхиндеййа, ануппаттидхамматам̣ па̄пеййа. сесападесупӣти сесесупи двӣсу падесу. джаханто кати джахеййа, бха̄венто кати уттари бха̄веййа̄ти имаматтхам̣ ‘‘есева найо’’ти имина̄ атидисати. чатуттхападасса пана аттхо сарӯпенева дассито. аттхато еканти бха̄ваттхато екам̣. йади евам̣ киматтхам̣ парийа̄йантарам̣ гахитанти а̄ха ‘‘га̄тха̄бандхасса пана̄’’тиа̄ди. аттхато еттха пунарутти аттхева̄ти а̄ха ‘‘саддапунаруттим̣ ваджджайантӣ’’ти. сан̇гам̣ атиккамайатӣти сан̇га̄тиготи а̄ха ‘‘айамеваттхо’’ти.

орам̣ вуччати ка̄мадха̄ту, пат̣исандхийа̄ паччайабха̄вена тан̃ча бхаджантӣти орамбха̄гийа̄ни. таттха ча каммам̣ таббипа̄кам̣ сатте дуккхам̣, каммуна̄ випа̄кам̣, саттена дуккхам̣ сам̣йоджентӣти сам̣йоджана̄ни, сакка̄йадит̣т̣хи-вичикиччха̄-сӣлаббатапара̄ма̄са-ка̄мара̄га-пат̣игха̄. уддхам̣ вуччати чатассо арӯпадха̄туйо, вуттанайена там̣ бхаджантӣти уддхамбха̄гийа̄ни, сам̣йоджана̄ни рӯпа̄рӯпара̄гама̄нуддхачча̄виджджа̄. а̄ропитавачана̄нурӯпенева евама̄ха̄ти ‘‘пан̃ча чхинде пан̃ча джахе’’ти евам̣ катхеси тасса̄ девата̄йа сукхаггахан̣аттхам̣. на кевалам̣ та̄йа девата̄йа вуттавачана̄нурӯпато ева, атха кхо тесу сам̣йоджанесу ваттабба̄ка̄ратопӣти дассетум̣ ‘‘атха ва̄’’тиа̄ди вуттам̣. тена орамбха̄гийасам̣йоджана̄ни на̄ма гарӯни дуччхеда̄ни га̄л̣хабандханабха̄вато, тасма̄ та̄ни сандха̄йа ‘‘пан̃ча чхинде’’ти вуттам̣.

уддхамбха̄гийасам̣йоджана̄ни пана лахӯни суччхеда̄ни хет̣т̣ха̄ паваттита̄нуккамена бха̄вана̄найена паха̄таббато, тасма̄ та̄ни сандха̄йа ‘‘пан̃ча джахе’’ти вуттам̣. тена̄ха ‘‘па̄десу баддхапа̄сасакун̣о вийа̄’’тиа̄ди. висесанти бха̄вана̄нам̣ висесам̣ випассана̄бха̄ванам̣ бха̄венто уппа̄денто випачченто вад̣д̣хенто ча. сам̣са̄рапан̇ке сан̃джанат̣т̣хена ра̄го ева сан̇го ‘‘ра̄гасан̇го’’. еса найо сесесупи. йасма̄ еттха ра̄га-моха-дит̣т̣хи-таббха̄гийасакка̄йадит̣т̣хи-сӣлаббатапара̄ма̄са-ка̄мара̄га̄виджджа̄ аттхато огха̄ ева, итаре тадекат̣т̣ха̄, тасма̄ бхагава̄ сам̣йоджанаппаха̄насан̇га̄тиккамехи огхатаран̣ам̣ катхеси. локийалокуттара̄ни катхита̄ни ‘‘бха̄вайе’’ти пуббабха̄га̄йа маггабха̄вана̄йа адхиппетатта̄.

катичхиндасуттаван̣н̣ана̄ нит̣т̣хита̄.