(4) аванданӣйапуггала̄диван̣н̣ана̄

477. тесанти дасаннам̣ пуггала̄нам̣. ‘‘саддхи’’нти имина̄ са̄мӣчена̄ти еттха сахаттхе каран̣авачананти дассети. са̄мӣчена̄ти ча са̄мӣчина̄ каттаббам̣ са̄мӣчам̣ каммам̣, тена са̄мӣчена. даса чӣварадха̄ран̣а̄ти падасса сама̄сабха̄вам̣ пат̣иккхипанто а̄ха ‘‘даса диваса̄ни атирекачӣварасса дха̄ран̣а̄’’ти.

катисатантиа̄дӣсу двӣсу га̄тха̄па̄десу чатӯсу вибхатйантападесу пуримам̣ пуримена, паччхиман̃ча паччхимена йатха̄ккамам̣ йоджетаббанти дассенто а̄ха ‘‘катисатам̣ а̄паттийо раттисатам̣ чха̄дайитва̄на̄’’ти. паччхимага̄тха̄йа пуббад̣д̣хепи есева найо. айам̣ хӣти айам̣ ева ваккхама̄но. еттха̄ти га̄тха̄йам̣. йоти бхиккху, пат̣иччха̄детӣти самбандхо. итӣти айам̣ сан̇кхепаттхо.

хет̣т̣ха̄ вуттесу чатӯсу чатуккесу дхаммена самаггам̣ апанетва̄ два̄даса каммадоса̄ вутта̄ти дат̣т̣хаббам̣. адхаммена ваггакаммам̣, адхаммена самаггакамманти йоджетаббам̣.

еттха̄ти чхасу каммесу. етадева̄ти дхаммена самаггакаммамева.

йам̣ десита̄ти еттха йам̣саддо вачанавипалла̄соти а̄ха ‘‘йа̄ни десита̄нӣ’’ти. ‘‘десита̄нӣ’’ти имина̄ десита̄ти еттха ника̄расса а̄ка̄ра̄десабха̄вам̣ дассети. ‘‘парийантапариччхедабха̄варахитатта̄’’ти имина̄ наттхи антам̣ парийантаметасса̄ти анантанти вачанаттхам̣ дассети. танти нибба̄нам̣, джитанти самбандхо. кена кам̣ кинти катва̄ джитанти а̄ха ‘‘бхагавата̄ килесаган̣ам̣ абхимаддитва̄’’ти. кена кам̣ кинти катва̄ ким̣ джитам̣ вийа̄ти а̄ха ‘‘ран̃н̃а̄ сапаттаган̣ам̣ абхимаддитва̄ раджджам̣ вийа̄’’ти. таттха ‘‘ран̃н̃а̄’’ти имина̄ ‘‘кена̄’’ти пуччхам̣ виссаджджеси. ‘‘сапаттаган̣а’’нти имина̄ ‘‘ка’’нти пуччхам̣ виссаджджеси. ‘‘абхимаддитва̄’’ти имина̄ ‘‘кинти катва̄’’ти пуччхам̣ виссаджджеси. ‘‘раджджа’’нти имина̄ ‘‘ки’’нти пуччхам̣ виссаджджеси. сапаттаган̣анти вериган̣ам̣. айам̣ панеттха йоджана̄ – ран̃н̃а̄ сапаттаган̣ам̣ абхимаддитва̄ раджджам̣ ра̄джабха̄вам̣ джитам̣ вийа, бхагавата̄ килесаган̣ам̣ абхимаддитва̄ нибба̄нам̣ джитанти. свева̄ти бхагава̄ ева. ‘‘ниббика̄рата̄йа̄’’ти имина̄ та̄дисаддо ниббика̄раттхава̄чако аниппханнапа̄т̣ипадикоти дассети. ‘‘вивекапан̃чака’’нти имина̄ ка̄йачиттаупадхивасена вивекаттайампи гахетаббам̣ вивекабха̄вена сама̄натта̄. тена бхагавата̄ти самбандхо. ‘‘йа̄ни сатта а̄паттиккхандха̄нӣ’’ти имина̄ екеттха̄ти еттха екасаддасса висайам̣ дассети. таттха̄ти саттасу а̄паттиккхандхесу. еттха пана̄ти саматхесу пана. хӣти саччам̣. тасса̄ти саммукха̄винайасса. ат̣т̣хакатха̄сӯти саббаат̣т̣хакатха̄су. майам̣ пана̄ти сан̇гахака̄рака̄ амхе пана, буддхагхосана̄мака̄ майам̣ пана̄ти аттхо, рочайа̄ма̄ти самбандхо. касса киматтхам̣ гахетва̄ рочесӣти а̄ха ‘‘вина̄ти нипа̄тасса пат̣иседханаматтхаматта’’нти. ‘‘вина̄ти нипа̄тасса̄’’ти падам̣ ‘‘аттхаматта’’нти паде ва̄чакасамбандхо. аттано са̄дхйавачанам̣ буддхавачанасан̇кха̄тена са̄дхакавачанена са̄дхенто а̄ха ‘‘вуттампи чета’’нтиа̄ди.

ат̣т̣ха̄раса ат̣т̣хака̄нӣти адхаммадит̣т̣хибхеда, дхаммадит̣т̣хибхеда, вематикабхедесу тӣсу екамекам̣ мӯлам̣ катва̄ тайо тайо мӯлим̣ катва̄ нава хонти, тесу дхаммадит̣т̣хибхедесу дхаммадит̣т̣хибхедам̣ апанетва̄ ат̣т̣ха хонти, та̄ни ат̣т̣ха̄раса бхедакараваттхӯсу йоджетва̄ ат̣т̣ха̄раса ат̣т̣хака̄ни хонтӣти дат̣т̣хаббам̣. чхаӯнадийад̣д̣хасатанти чатучатта̄лӣса̄дхикам̣ сатанти вуттам̣ хоти.

екекаваттхусминти ат̣т̣ха̄расасу бхедакараваттхӯсу екекасмим̣ ваттхусмим̣.

ити га̄тха̄сан̇ган̣икаван̣н̣ана̄йа йоджана̄ саматта̄.