маха̄сан̇га̄мам̣

вохарантена джа̄нитабба̄диван̣н̣ана̄

368-74. маха̄сан̇га̄ме етенева найена ведитаббанти самбандхо. ваттхусан̇камана̄ка̄рам̣ дассетва̄ аваджа̄нанапат̣иджа̄нана̄ка̄рам̣ дассенто а̄ха ‘‘йо пана̄’’тиа̄ди. йо пана вадатӣти самбандхо. есева̄ти есо ева, аваджа̄нанапат̣иджа̄нанабхиккхӯти аттхо.

375. нӣла̄диван̣н̣а̄ван̣н̣авасена̄ти нӣла̄диван̣н̣авасена ча а̄рогйаттха̄диаван̣н̣авасена ча. сан̃чариттам̣ йасма̄ анена сиккха̄падена дханам̣ анупадӣйати, тасма̄ дханамануппада̄нанти вуччати. пуббапайоготи пуббе пайуджджитаббо.

агатиагантаббаван̣н̣ана̄

379. бахуджанаахита̄йа пат̣ипанно хотӣти па̄л̣им̣ виттха̄ренто а̄ха ‘‘винайадхарена хӣ’’тиа̄ди. таттха винайадхарена̄ти анувиджджакена, виниччхитети самбандхо. ова̄дӯпаджӣвинийоти бхиккхӯнам̣ ова̄дам̣ упанисса̄йа джӣвинийо. упа̄сака̄пӣти ратанаттайам̣ пат̣иссаран̣анти упа̄сака̄пи. да̄йака̄пӣти бхиккхӯнам̣ паччайада̄йака̄пи. тесанти упа̄сака̄дӣнам̣. татхева̄ти йатха̄ упа̄сака̄дайо двидха̄ бхиджджанти, татхева. татоти а̄раккхадевата̄хи паранти самбандхо. тена̄ти двидха̄ка̄ран̣ена.

382. гахананисситоти еттха гаханасаддо дит̣т̣хипарийа̄йоти а̄ха ‘‘миччха̄дит̣т̣хиантагга̄хикадит̣т̣хисан̇кха̄там̣ гахана’’нти.

393. тасса аваджа̄нантоти еттха ‘‘тасса̄’’ти падам̣ ‘‘вачана’’нти па̄т̣хасесена самбандхитаббанти а̄ха ‘‘тасса вачана’’нти. тасса̄ти навакасса. танти навакам̣.

394. ‘‘йам̣аттха̄йа̄’’ти есо саддо сама̄соти а̄ха ‘‘йадаттха̄йа̄’’ти. ‘‘там̣ аттха’’нти есо саддо лин̇гавипалла̄соти а̄ха ‘‘со аттхо’’ти. аттхасаддо хи пуллин̇го, па̄л̣ийам̣ на париха̄петаббанти еттха̄пи лин̇гавипалла̄со ведитаббо. саббаттха̄ти саббасмим̣ маха̄сан̇га̄ме.

ити маха̄сан̇га̄маван̣н̣ана̄йа йоджана̄ саматта̄.