чодана̄кан̣д̣ам̣

анувиджджакакиччаван̣н̣ана̄

360-1. ида̄ни а̄раддханти самбандхо. еко бхиккху екена ма̄туга̄мена̄ти йоджана̄. соти пассанто бхиккху. танти никкхамантам̣ пависантам̣ ва̄ бхиккхум̣. итароти чудитако. тасса̄ти чодакасса. на упетӣти на упагаччхати. на пат̣иджа̄на̄тӣти на пат̣иссавам̣ кароти. еттха̄ти ма̄туга̄мена никкхамантапависантат̣т̣ха̄не. йанти каммам̣. тена̄ти чодакена. тасса̄ти чодакасса вачанена̄ти самбандхо. итароти чудитако. асуддхапарисан̇китоти асуддха̄йа ат̣т̣ха̄не уппанна̄йа парисан̇ка̄йа парисан̇кито. тадаттхам̣ дассети ‘‘амӯлакапарисан̇кито’’ти имина̄. тасса пуггаласса̄ти чудитакасса пат̣ин̃н̃а̄йа̄ти самбандхо. саббаттха̄ти саббесу анувиджджакакиччесу.

ити анувиджджакакиччаван̣н̣ана̄йа йоджана̄ саматта̄.

чодакапуччха̄виссаджджана̄

362-3. сачче ча акуппе ча̄ти падха̄нам̣ самбандхат̣т̣ха̄нам̣ дассенто а̄ха ‘‘патит̣т̣ха̄табба’’нти. ‘‘йа’’нтиа̄дина̄ сачче патит̣т̣ха̄таббабха̄вам̣ дассети. йанти каммам̣. ‘‘на ча̄’’тиа̄дина̄ акуппе патит̣т̣ха̄таббабха̄вам̣ дассети. отин̣н̣ан̃ча̄ти виниччхайам̣ отин̣н̣ан̃ча. ‘‘вачана’’нти имина̄ отин̣н̣а̄нотин̣н̣асарӯпам̣ дассети. татра̄ти пуримавачана̄пеккхам̣. ‘‘отин̣н̣а̄нотин̣н̣ам̣ джа̄нитабба’’нти вачанети хи аттхо. чодакасса пама̄н̣анти ‘‘дхаммо’’ти ва̄ ‘‘адхаммо’’ти ва̄ ‘‘ба̄ло’’ти ва̄ ‘‘пан̣д̣ито’’ти ва̄ чодакасса пама̄н̣ам̣. чудитакасса пама̄н̣анти дхаммачудитако ну кхо, ноти чудитакасса пама̄н̣ам̣. анувиджджакасса пама̄н̣анти сакка̄ ну кхо виниччхитум̣, ноти анувиджджакасса пама̄н̣ам̣. анувиджджако ваттабботи самбандхо. йена дхаммена̄тиа̄дӣсу дхамма̄дӣнам̣ сарӯпам̣ дассенто а̄ха ‘‘дхаммоти бхӯтам̣ ваттхӯ’’тиа̄ди. етена дхаммена ча етена винайена ча етена саттхуса̄санена ча̄ти йоджана̄. тасма̄ анувиджджакена вӯпасаметаббанти самбандхо. еттха̄ти анувиджджакасса пат̣ипаджджитаббат̣т̣ха̄не.

аван̃н̃анти аваджа̄нанам̣. имети тхера̄. ‘‘кхататта̄’’ти имина̄ аттана̄ва атта̄ кхан̃н̃атӣти кхатоти вачанаттхам̣ дассети. упаханийантӣти упахата̄ни, упахата̄ни индрийа̄ни анена̄ти упахатиндрийо. ‘‘пан̃н̃а̄йа абха̄вато’’ти имина̄ думмедхоти еттха дусаддо абха̄ваттхо, медха̄саддо пан̃н̃а̄парийа̄йоти дассети. наттхи медха̄ етасса̄ти думмедхоти ниббачанам̣ ка̄таббам̣. кхато…пе… думмедхо со анувиджджако упагаччхатӣти йоджана̄. тасма̄ти йасма̄ упагаччхати, тасма̄ вуттанти самбандхо. тасса̄ти па̄т̣хасса, га̄тха̄йа ва̄. виттха̄рам̣ дассенто а̄ха ‘‘чудитакачодакесу хӣ’’тиа̄ди. убхопетети убхопи ете а̄мисапуггаланиссайе. дхаммоти са̄санадхаммо. итӣти айаматтхо.

упакан̣н̣акам̣ джаппатӣти еттха кан̣н̣асса самӣпам̣ упакан̣н̣ам̣, тадева упакан̣н̣аканти дассенто а̄ха ‘‘евам̣ катхехӣ’’тиа̄ди. ‘‘кан̣н̣амӯле’’ти имина̄ упакан̣н̣аканти еттха упасаддасса самӣпаттхам̣ дассети. мантетӣти катхети. имина̄ джаппадха̄туйа̄ катханаттхам̣ дассети. джимхам̣ пеккхатӣти еттха джимхасаддо кут̣илава̄чако, кут̣илам̣ на̄ма аттхато идха досоти а̄ха ‘‘досамева̄’’ти.

катха̄нусандхӣти чудитакаанувиджджака̄нам̣ катха̄йа анусандхи. виниччхайа̄нусандхӣти анувиджджакена катасса а̄патта̄на̄паттивиниччхайасса анусандхи. саббаттха̄ти чодана̄кан̣д̣е.

ити чодана̄кан̣д̣аван̣н̣ана̄йа йоджана̄ саматта̄.