2. а̄ва̄сикаваттакатха̄

359. а̄ва̄сикаватте евам̣ виниччхайо ведитабботи йоджана̄. саббам̣ ка̄таббанти самбандхо. тасса̄ти вуд̣д̣хатарасса а̄гантукасса. ‘‘пан̣д̣ито’’тиа̄дина̄ саче ба̄ло ‘‘саммаджджа̄хи та̄ва четийан̇ган̣а’’нти на вадати, саммаджджаним̣ никкхипитва̄ тасса ваттамева ка̄таббанти дассети. бхесаджджамева ка̄таббанти саха̄вадха̄ран̣ена вуттатта̄ ба̄ло ‘‘карохи та̄ва бхесаджджа’’нти авадантопи бхесаджджамева ка̄таббам̣. ‘‘пан̣д̣ито хӣ’’тиа̄дина̄ пана а̄гантукасса ваттаббабха̄ваматтамева дассети. па̄л̣имуттакаваттам̣ дассенто а̄ха ‘‘апича̄’’тиа̄ди. бӣджанена̄ти бӣджанийа̄. ‘‘бӣджана’’нти хи напум̣сакалин̇го, ‘‘бӣджанӣ’’ти иттхилин̇го. ‘‘бӣджитаббо’’ти ча ‘‘бӣджитабба’’нти ча имина̄ ат̣т̣хакатха̄вачанена бӣджийати анена̄ти бӣджанам̣, бӣджийати ета̄йа̄ти бӣджанӣти вачанаттхо ка̄таббо. асса̄ти вуд̣д̣хатараа̄гантукасса. маккхетабба̄ти ан̃джетабба̄. хӣти саччам̣. еттха̄ти упа̄ханапун̃чхане. каттха̄ти касмим̣ виха̄ре. пуччхитена а̄ва̄сикена̄ти самбандхо.

‘‘аттано сантикам̣…пе… на лабхатӣ’’ти имина̄ атта̄нам̣ сандха̄йа ана̄гаччхантопи аттано сантикам̣ сампаттасса а̄гантукасса ваттам̣ ака̄тум̣ на лабхатӣти дассети.