210. варайа̄чанакатха̄

337. катам̣ бхаттакиччам̣ йена̄ти катабхаттакиччо, тасмим̣ сатӣти самбандхо. вуттанайенева̄ти ра̄хулаваттхумхи (маха̄ва. ат̣т̣ха. 105) вуттанайенева. идам̣ ваттханти идам̣ сивеййакам̣ ваттхам̣, уппаннанти самбандхо. ‘‘та̄ва̄’’ти аджджха̄харитаббо. еттхантарети етасмим̣ ваттхуппаннака̄ламаджджхе. кочи бхиккхӯти самбандхо. тена̄ти пам̣сукӯликахетуна̄. айанти джӣвако. гахапатичӣваранти еттха гахапатӣнам̣ чӣваранти аттхам̣ пат̣иккхипанто а̄ха ‘‘гахапатӣхи диннам̣ чӣвара’’нти. ваттхада̄на̄нисам̣сапат̣исам̣йутта̄йа̄ти ‘‘ваттхадо хоти ван̣н̣адо’’тиа̄дика̄йа (сам̣. ни. 1.42) ваттхада̄насса а̄нисам̣сена пат̣исам̣йутта̄йа. виччха̄васена вутто ‘‘итарӣтарена̄’’ти саббана̄масаддо анийаматтхоти а̄ха ‘‘аппаггхенапи махаггхенапи йена кеначӣ’’ти. па̄ва̄роти уттара̄сан̇го. со хи па̄рупанаттха̄йа варийати иччхийатӣти па̄ва̄роти вуччати. ‘‘каппа̄са̄дибхедо’’ти имина̄ тасса сарӯпам̣ дассети. пакатикоджавамева̄ти пакатийа̄ бхиккхӯнам̣ са̄руппам̣ коджавамева. сол̣асана̄т̣акиттхӣнам̣ т̣хатва̄ наччайогйатта̄ махатӣ пит̣т̣хи етасса̄ти маха̄пит̣т̣хийам̣, тамева коджавам̣ маха̄пит̣т̣хийакоджавам̣. тасса кира лома̄ни чатуран̇гула̄дхика̄ни хонти.