182. кен̣ийаджат̣илаваттхукатха̄

300. ка̄джехӣти еттха ка̄джасса ган̣анам̣ дассенто а̄ха ‘‘пан̃чахи ка̄джасатехӣ’’ти. екена ка̄джена двиннам̣ кут̣а̄нам̣ гахитатта̄ вуттам̣ ‘‘кут̣асахасса’’нти. воти тумхе. сут̣т̣ху пасанноти самбандхо.

таттха̄ти ‘‘ат̣т̣ха па̄на̄нӣ’’ти па̄т̣хе, ат̣т̣хасу па̄несу ва̄. ‘‘амбехи катапа̄на’’нти имина̄ маджджхелопасама̄сам̣ дассети. таттха̄ти а̄мапаккесу. каронтена ка̄таббанти самбандхо. а̄диччапа̄кена̄ти а̄диччахетуна̄ пачанена. пуребхаттамева каппатӣти бхиккхуна̄ сайам̣ кататта̄ пуребхаттамева каппати. тена вуттам̣ ‘‘анупасампаннехӣ’’тиа̄ди. катам̣ амбапа̄нанти самбандхо. саббапа̄несӯти джамбупа̄на̄дӣсу саббесу па̄несу.

тесӯти джамбупа̄на̄дӣсу саттасу па̄несу. панасаддо висесаттхаджотако. джамбупхалехӣти а̄мехи ва̄ паккехи ва̄ джамбупхалехи. ат̣т̣хикехӣти ат̣т̣хи асмиматтхӣти ат̣т̣хикам̣ пхалам̣. джа̄тирасена̄ти йатха̄джа̄тена расена. имина̄ мадхусаккхаракаппура̄дӣхи на йоджетабботи дассети. там̣ пана̄ти мадхукапа̄нам̣ пана. муддика̄ти муддикапхала̄ни. са̄лукети канде. саттаннам̣ дхан̃н̃а̄нам̣ пхаларасанти тан̣д̣уладхованодакам̣. ‘‘паккад̣а̄караса’’нти имина̄ апаккад̣а̄карасам̣ ват̣т̣атӣти дӣпети. хӣти саччам̣, виттха̄ро ва̄. расоти паккарасо. пат̣иггахетва̄ т̣хапитасаббиа̄дӣхи пакка̄нам̣ йа̄ваджӣвика̄нам̣ патта̄нам̣ расоти йоджана̄. паккам̣ йа̄ваджӣвикапаттарасанти самбандхо. йа̄вака̄ликапатта̄нампӣти писаддо пагева йа̄ваджӣвикапатта̄нанти дассети. йам̣ па̄нанти йам̣ мадхукапуппхарасапа̄нам̣. соти мадхукапуппхарасо. тена̄ти мадхукапуппхена. йато ка̄лато пат̣т̣ха̄йа маджджам̣ на каронти, татоти йоджана̄. уччхурасо никасат̣о паччха̄бхаттам̣ ват̣т̣ати сатта̄хака̄ликатта̄. име чатта̄ро раса̄ти пхалапаттапуппхауччхурасасан̇кха̄та̄ име чатта̄ро раса̄. аггихуттамукха̄ти йан̃н̃а̄ аггихутамукха̄, аггихутасет̣т̣ха̄ти аттхо.