121. пава̄ран̣а̄бхедакатха̄

212. ча̄туддасика̄йа̄ти бхан̣д̣анака̄ракехи упаддутатта̄ паччуккад̣д̣хита̄йа пуббакаттикама̄сасса ка̄л̣апаккхача̄туддасика̄йа. ‘‘аджджа пава̄ран̣а̄ паннарасӣ’’ти пуббакиччам̣ ка̄таббанти йоджана̄.

пава̄ран̣а̄каммесӯти ниддха̄ран̣е бхуммам̣, ‘‘адхаммена ваггам̣ пава̄ран̣а̄камма’’нтиа̄дӣсу самбандхитаббам̣. адхаммена вагганти еттха адхаммам̣ на̄ма сан̇гхо хутва̄пи сан̇гхапава̄ран̣амакатва̄ ган̣апава̄ран̣а̄йа каран̣ам̣, ган̣о хутва̄пи ган̣апава̄ран̣амакатва̄ сан̇гхапава̄ран̣а̄йа каран̣ан̃ча. ваггам̣ на̄ма екасӣма̄йам̣ васанта̄нампи саббесам̣ екато асаннипатанам̣.

адхаммена самагганти еттха адхаммам̣ вуттанайамева. самаггам̣ на̄ма саббесам̣ екато саннипатанам̣.

дхаммена вагганти еттха дхаммам̣ на̄ма сан̇гхо хутва̄ сан̇гхапава̄ран̣а̄йа каран̣ам̣, ган̣о хутва̄ ган̣апава̄ран̣а̄йа каран̣ан̃ча. ваггам̣ вуттанайамева. дхаммена самаггам̣ сувин̃н̃еййамева. итисаддо парисама̄панаттхо.

213. евам̣ динна̄йа̄ти евам̣ па̄л̣ийам̣ вуттанайенева динна̄йа. пава̄ретаббанти вассам̣вуттхапава̄ран̣а̄йа пава̄ретаббам̣. тиссоти тиссана̄мако. дит̣т̣хена ва̄ вадатӯти самбандхо. танти тиссана̄макам̣ бхиккхум̣. сан̇гхо анукампам̣ упа̄да̄йа вадатӯти йоджана̄. вуд̣д̣хатароти пава̄ран̣а̄да̄йако там̣ха̄ракато вуд̣д̣хатаро. хӣти ладдхагун̣о. тена̄ти пава̄ран̣а̄ха̄ракена. тасса̄ти пава̄ран̣а̄да̄йакасса.

идха̄пи ча̄ти имасмим̣ пава̄ран̣а̄ккхандхакепи ча. аписаддо упосатхаккхандхакам̣ апеккхати. авасесакамматтха̄йа̄ти пава̄ран̣а̄каммато авасеса̄нам̣ камма̄наматтха̄йа хотӣти самбандхо. пава̄ран̣а̄йа а̄хат̣а̄йа сатийа̄ти йоджана̄. тасса ча̄ти пава̄ран̣а̄да̄йакасса ча. саббесанти пава̄ран̣а̄да̄йакасса ча сан̇гхасса ча̄ти саббесам̣. ан̃н̃ам̣ пана камманти пава̄ран̣а̄каммато ан̃н̃ам̣ каммам̣ пана. тена пана бхиккхуна̄ти пава̄ран̣а̄да̄йакена бхиккхуна̄ пана. еттха ча тадахупава̄ран̣а̄йа аттано ча сан̇гхасса ча саче пава̄ран̣а̄каммамева хоти, пава̄ран̣а̄йева да̄табба̄. атха ан̃н̃амева каммам̣ хоти, чхандойева да̄таббо. йади пава̄ран̣а̄камман̃ча ан̃н̃акамман̃ча хоти, пава̄ран̣а̄ ча чхандо ча да̄таббо. там̣ сандха̄йа вуттам̣ ‘‘тадаху пава̄ран̣а̄йа пава̄ран̣ам̣ дентена чхандампи да̄ту’’нти (маха̄ва. 213). тена̄ти да̄нахетуна̄.

218. аджджа ме пава̄ран̣а̄ти еттха па̄л̣инайато ан̃н̃ам̣ ат̣т̣хакатха̄найам̣ дассенто а̄ха ‘‘саче’’тиа̄ди.

219. вуттанайамева̄ти упосатхаккхандхаке (маха̄ва. ат̣т̣ха. 169) вуттанайамева.

222. пуна пава̄ретаббанти еттха на кевалам̣ пава̄ран̣а̄йева пуна ка̄табба̄, пуббакичча̄дӣнипи пуна ка̄табба̄нӣти дассенто а̄ха ‘‘пуна пуббакичча’’нтиа̄ди.

228. есева найоти ‘‘аджджа пава̄ран̣а̄ паннарасӣ’’ти пуббакиччам̣ атидисати. асса̄ти вачанасса. н̃аттинти ‘‘сун̣а̄ту ме бханте сан̇гхо аджджа пава̄ран̣а̄’’ти н̃аттим̣. паччхимехӣти паччхимавассам̣ упагатехи бхиккхӯхи. упосатхаггети упосатхасса ган̣ханат̣т̣ха̄не гехе. две н̃аттийоти пава̄ран̣а̄н̃атти ча упосатхан̃атти ча̄ти две н̃аттийо. идан̃ча̄ти идам̣ ваккхама̄нам̣ пана. еттха̄ти пуримикапаччхимикабхиккхӯнам̣ сам̣саггат̣т̣ха̄не. пуримика̄йа упагатехӣти вибхаттаапа̄да̄нам̣ анумеййависайаапа̄да̄нам̣, тхокатара̄ти самбандхо, саха̄дийого ва̄, самасама̄ти самбандхо. самасама̄ти самена, самато ва̄ сама̄ самасама̄, атирекасама̄ти аттхо. кин̃чи ӯнам̣ ва̄ адхикам̣ ва̄ наттхӣти адхиппа̄йо. итӣти идам̣ лаккхан̣ам̣.

соти паччхимико бхиккху. итарена̄ти паччхимикена. тесанти пуримика̄нам̣. екена̄ти пуримикена. екасса̄ти паччхимикасса. пуна екена̄ти паччхимикена. ‘‘екасса̄’’ти ануваттетаббо, пуримикасса̄ти аттхо. пуримавассӯпагатехи адхикатара̄ти самбандхо. тхокатарехӣти паччхимавассӯпагатехи тхокатарехи пуримавассӯпагатехӣти йоджана̄.

каттика̄йа̄ти паччхимакаттика̄йа. ча̄тума̄синийа̄ пава̄ран̣а̄йа̄ти чатуннам̣ ма̄са̄нам̣ пӯран̣ийа̄ пава̄ран̣а̄йа. пава̄ран̣а̄н̃аттим̣ т̣хапетва̄ти самасама̄ хутва̄пи пава̄ран̣а̄дивасатта̄ пава̄ран̣а̄н̃аттим̣ т̣хапетва̄. техӣти паччхимикехи. итарехӣти пуримикехи. тесанти паччхимика̄нам̣. тхокатара̄ ва̄ти ека̄дина̄ тхокатара̄ ва̄. тесанти пуримика̄нам̣. техӣти паччхимикехи.

233. сан̇гхаса̄маггийа̄ти еттха кӣдисӣ сан̇гхаса̄маггӣ ведитабба̄ти а̄ха ‘‘косамбакаса̄маггӣсадиса̄ва ведитабба̄’’ти. еттха̄ти са̄маггӣпава̄ран̣а̄йам̣. аппаматтакети паттачӣвара̄дим̣ пат̣ичча уппанне аппаматтаке вива̄де. пава̄ран̣а̄йамева̄ти пава̄ран̣а̄дивасейева. касмим̣ дивасе са̄маггӣпава̄ран̣а̄ ка̄табба̄ти а̄ха ‘‘са̄маггӣпава̄ран̣а’’нтиа̄ди. пат̣хамапава̄ран̣анти пуббакаттикапун̣н̣амим̣. йа̄ва каттикача̄тума̄синӣ пун̣н̣ама̄ти айам̣ авадхи анабхивидхиавадхи на̄ма. касма̄? каттикача̄тума̄синипун̣н̣амим̣ т̣хапетва̄ антойева гахетаббатта̄. еттхантарети етасмим̣ двиннам̣ пун̣н̣аминамантаре ат̣т̣хавӣсатипама̄н̣е дивасе ка̄табба̄. татоти еттхантарасан̇кха̄та̄ ат̣т̣хавӣсадивасато.