95. ана̄паттипаннарасака̄дикатха̄

172. те на джа̄ним̣сӯти еттха джа̄нана̄ка̄радассанаттхам̣ ‘‘сӣмам̣ окканта̄ти ва̄ оккамантӣти ва̄’’ти вуттам̣. окканта̄ти ва̄ти пависиттха ити ва̄. тесанти чатуннам̣ ва̄ атирека̄нам̣ ва̄ бхиккхӯнам̣. вагга̄ самаггасан̃н̃иноти еттха касма̄ вагга̄, касма̄ самаггасан̃н̃иноти а̄ха ‘‘теса’’нтиа̄ди. таттха тесанти ан̃н̃есам̣ бхиккхӯнам̣. сӣмам̣ оккантатта̄ти сӣмам̣ пависитатта̄, вагга̄ хутва̄ти самбандхо. самагго ити сан̃н̃а̄ самаггасан̃н̃а̄, са̄ етесаматтхӣти самаггасан̃н̃ино.

175. куккуччапаката̄ти падасса ‘‘иччха̄пакато’’ти падена сама̄набха̄вам̣ дассетум̣ вуттам̣ ‘‘йатха̄’’тиа̄ди. пуббабха̄гети упосатхакаммато пуббабха̄ге. саннит̣т̣ха̄нам̣ катва̄пӣти каппатева̄ти саннит̣т̣ха̄нам̣ катва̄пи. ‘‘абхибхӯта̄’’ти имина̄ паката̄ти еттха папуббакарадха̄туйа̄ упасаггавасена абхибхаванаттхам̣ дассети.

176. йатха̄ хет̣т̣ха̄ вагга̄ваггасан̃н̃ӣпаннарасака̄дӣсу дуккат̣ам̣ вуттам̣, евамакатва̄ касма̄ ‘‘тхуллаччайа’’нти а̄ха ‘‘акусалабалавата̄йа̄’’ти.