88. чхандада̄накатха̄

165. чхандада̄непи виниччхайо ведитабботи йоджана̄. упосатхо като хотӣти па̄рисуддхида̄йакасса ча сан̇гхасса ча упосатхо като хоти. ан̃н̃анти упосатхакаммато ан̃н̃ам̣. йам̣ пана камманти самбандхо. каммампӣти упосатхакаммато ан̃н̃ам̣ каммампи. еттха ча тадахупосатхе аттано ча сан̇гхасса ча саче упосатхакаммам̣ хоти, па̄рисуддхийева да̄табба̄. атха ан̃н̃ам̣ каммам̣ хоти, чхандойева да̄таббо. йади упосатхакамман̃ча ан̃н̃акамман̃ча хоти, па̄рисуддхи ча чхандо ча да̄таббо. там̣ сандха̄йа вуттам̣ ‘‘тадахупосатхе па̄рисуддхим̣ дентена чхандампи да̄ту’’нти. сӣма̄йа ва̄ти баддхасӣма̄йа ва̄. аччхитунти упавеситум̣. ‘‘а̄са упавесане’’ти хи дха̄тупа̄т̣хесу (садданӣтидха̄тума̄ла̄йам̣ 16 сака̄рантадха̄ту) вуттам̣. са̄маггӣ ва̄ти ка̄йаса̄маггӣ ва̄.

167. саратипи упосатхам̣, напи саратӣти еттха писаддасса анийамавикаппаттхам̣ дассетум̣ вуттам̣ ‘‘екада̄ сарати, екада̄ на саратӣ’’ти. ‘‘еканта’’нти имина̄ нева саратӣти еттха евасаддасса саннит̣т̣ха̄наттхам̣ дассети. каммам̣ на копетӣти саммутиладдхопи аладдхопи умматтако каммам̣ на копети.