86. дисам̣гамика̄диваттхукатха̄

163. сам̣гахетабботиа̄дӣнам̣ чатуннам̣ кирийа̄пада̄нам̣ висесам̣ дассенто а̄ха ‘‘сам̣гахетаббо’’тиа̄ди. сам̣гахасаддасса сан̇кхепагахан̣есупи ваттанато идха ‘‘ануггахаттхе’’ти дассетум̣ па̄л̣ийам̣ вуттам̣ ‘‘ануггахетаббо’’ти. тена вуттам̣ ‘‘татха̄каран̣авасена̄’’ти. упала̄петабботи сан̇гхена бахуссуто бхиккху бхиккхӯхи упагантва̄ ла̄петаббо катха̄петаббо. упат̣т̣ха̄петабботи сан̇гхена бахуссуто бхиккху бхиккхӯхи упа аччанена пӯджанена т̣ха̄петаббо. ‘‘саббесам̣ дуккат̣а’’нти ватва̄ тадева саматтхетум̣ вуттам̣ ‘‘идха нева тхера̄, на дахара̄ муччантӣ’’ти. тена̄ти бахуссутена бхиккхуна̄. евампи сатӣти евам̣ аса̄дийанепи сати. са̄йам̣ па̄танти са̄йан̃ча па̄то ча са̄йам̣па̄там̣. упат̣т̣ха̄нанти упат̣т̣ха̄нат̣т̣ха̄нам̣, упат̣т̣ха̄наттха̄йа ва̄. тена̄ти бахуссутена бхиккхуна̄. тесанти маха̄тхера̄нам̣. асса̄ти бахуссутасса бхиккхуно. саддхим̣чара̄ти аттана̄ саддхим̣ чарантӣти саддхим̣чара̄. атха̄пӣти йадипи. еко ва̄ ваттасампанно вадатӣти йоджана̄. есо ча ахан̃ча̄ти майам̣. на̄матумхаамхасаддесу хи екасесена каттаббесу парова гахетаббо. вихарантӯти вадантӣти йоджана̄.

со а̄ва̄со гантабботи еттха киматтха̄йа гантаббо, ким̣ анудивасам̣ гантабботи а̄ха ‘‘упосатхакаран̣аттха̄йа анваддхама̄сам̣ гантаббо’’ти. со ча кхоти а̄ва̄со. утувассейева̄ти хемантагимхейева. утувассейева гантабботи аттхасса н̃а̄таббабха̄вам̣ дассенто а̄ха ‘‘васса̄не пана̄’’тиа̄ди. йанти каммам̣. таттха̄ти ‘‘вассам̣ васантӣ’’тиа̄дивачане. соти па̄тимоккхуддесако бхиккху. ан̃н̃асминти апарасмим̣ па̄тимоккхуддесаке. ма̄садвайанти са̄ван̣ама̄сапун̣н̣амито йа̄ва ассайуджапун̣н̣амӣ, та̄ва ма̄садвайам̣ васитаббам̣. идам̣ пуримавассам̣ упагантва̄ паччхимика̄йа паккамана̄дим̣ сандха̄йа вуттам̣. саче паччхимикам̣ упагантва̄ анантарамева паккамана̄дим̣ кароти, ма̄саттайампи васитаббам̣.