77. упосатхабхеда̄дикатха̄

149. паннарасикасса пуббакиччасса па̄л̣ийам̣ а̄гататта̄ ча̄туддасикассева пуббакиччам̣ дассенто а̄ха ‘‘аджджупосатхо ча̄туддасо’’ти.

‘‘адхаммена вагга’’нтиа̄дӣсу виниччхайо евам̣ ведитабботи йоджана̄. адхаммена вагганти еттха адхаммам̣ на̄ма екасмим̣ виха̄ре чатуннам̣ бхиккхӯнам̣ суттуддесаупосатхамакатва̄ па̄рисуддхиупосатхакаран̣ан̃ча тин̣н̣ам̣ па̄рисуддхиупосатхамакатва̄ суттуддесакаран̣ан̃ча. ваггам̣ на̄ма саббева асаннипатитва̄ екасса чхандапа̄рисуддхихаран̣ам̣. чхандапа̄рисуддхи на̄ма сан̇гхамаджджхам̣йева а̄гаччхати, на ган̣амаджджхам̣, на пуггаласса сантикам̣. адхаммена самагганти еттха адхаммам̣ вуттанайамева. самаггам̣ на̄ма саббесам̣ саннипатанам̣. дхаммена вагганти еттха дхаммам̣ на̄ма чатуннам̣ суттуддесаупосатхакаран̣ан̃ча тин̣н̣ам̣ па̄рисуддхиупосатхакаран̣ан̃ча. ваггам̣ вуттанайамева.