68. саннипа̄та̄нуджа̄нана̄дикатха̄

132. упосатхаккхандхаке таранти отаранти еттха̄ти титтхам̣, удакатиттхам̣, титтхам̣ вийа̄ти титтхам̣, ладдхӣти а̄ха ‘‘титтхам̣ вуччати ладдхӣ’’ти. ладдхи хи бахӯнам̣ ладдхика̄нам̣ отаран̣ат̣т̣ха̄натта̄ титтхам̣ на̄ма. ан̃н̃анти са̄саникаладдхито ан̃н̃ам̣. етесанти парибба̄джака̄нам̣. итоти имасма̄ са̄саникаладдхито. йанти йам̣ дхаммаджа̄там̣. тесанти ан̃н̃атиттхийа̄нам̣ парибба̄джака̄нам̣. те лабхантӣти еттха тасаддо мануссависайоти а̄ха ‘‘те манусса̄’’ти. мӯгасӯкара̄ти еттха тхӯласарӣрасса сӯкарасса саддаматтасса̄пи абха̄вато мӯгасӯкаро на̄ма̄ти а̄ха ‘‘тхӯласарӣрасӯкара̄’’ти.

135. асса̄ти бхиккхуно. соти сампаджа̄намуса̄ва̄до. кинти ким̣ а̄патти. дуккат̣анти падасса дуккат̣ам̣ камманти а̄сан̇ка̄ бхавеййа̄ти а̄ха ‘‘дуккат̣а̄паттӣ’’ти. са̄ ча кхо дуккат̣а̄патти муса̄ва̄далаккхан̣ена на хотӣти йоджана̄. кена хотӣти а̄ха ‘‘бхагавато пана вачанена̄’’ти. вачанена̄ти ча ‘‘сампаджа̄намуса̄ва̄де ким̣ хоти? дуккат̣ам̣ хотӣ’’ти (маха̄ва. 135) вачанена. акирийасамут̣т̣ха̄на̄ти а̄ви каттабба̄йа а̄паттийа̄ акаран̣ена акирийасамут̣т̣ха̄на̄.

мануджена̄ти мануссена. ва̄ча̄ти ва̄ча̄йа. йака̄расса хи лопо. гиранти саддам̣. парети ан̃н̃е пуггале. ва̄часиканти ва̄ча̄то самут̣т̣хитам̣. айам̣ панеттха йоджана̄ – бхиккху кеначи а̄санне т̣хитена мануджена ва̄ча̄йа ана̄лапанто хоти, паре дӯре т̣хите пуггале сандха̄йа гирам̣ маха̄саддам̣ но ча бхан̣еййа, евампи ва̄часикамева а̄паджджеййа̄ти.

антара̄йикоти еттха каротйаттхе н̣икапаччайоти а̄ха ‘‘антара̄йакаро’’ти. ‘‘киматтха̄йа̄’’ти имина̄ кисса̄ти еттха тадаттхе чатуттхӣти дассети, хетваттхопи йуджджатева. саббаттха̄ти саббесу ‘‘дутийасса джха̄насса адхигама̄йа̄’’тиа̄дӣсу. итӣтиа̄ди нигаманам̣. уддесато ча̄ти ‘‘сун̣а̄ту ме бханте сан̇гхо’’тиа̄диуддесато ча. ниддесато ча̄ти ‘‘па̄тимоккханти а̄димета’’нтиа̄диниддесато ча.

136. девасиканти еттха н̣икапаччайо виччхаттхе хотӣти а̄ха ‘‘дивасе дивасе’’ти. татийе ча саттаме ча паккхети екасса утуно ат̣т̣хасу паккхесу татийе ча саттаме ча паккхе. ‘‘вачанато’’ти падам̣ ‘‘ват̣т̣атӣ’’ти паде н̃а̄пакахету. татха̄рӯпе паччайети татха̄рӯпе викатича̄риттасан̇кха̄те паччайе. ануваттитаббанти ануматим̣ ваттитаббам̣. вачанатопӣти писаддо пуббе н̃а̄пакахетум̣ сампин̣д̣ети. етанти ‘‘йасмим̣ тасмим̣ ча̄туддасе ва̄ паннарасе ва̄ уддиситум̣ ват̣т̣атӣ’’ти вачанам̣.