2. дутийасан̇гха̄дисесасиккха̄падам̣
682. дутийе варитаббам̣ иччхитаббанти варам̣, тамева бхан̣д̣анти варабхан̣д̣анти дассенто а̄ха ‘‘махаггхабхан̣д̣а’’нти. ‘‘мутта̄’’тиа̄дина̄ тасса сарӯпам̣ дассети.
683. а̄пуббо локасаддо абхимукхам̣ локанаттхо хоти, упуббо уддхам̣ локанаттхо, опуббо адхо локанаттхо, випуббо ито чито ча вӣтихаран̣алоканаттхо, апапуббо а̄пуччханаттхо. идха пана апапуббатта̄ а̄пуччханаттхоти а̄ха ‘‘ана̄пуччхитва̄’’ти. маллаган̣а бхат̣ипутта ган̣а̄дикантиа̄дӣсу маллаган̣о на̄ма на̄ра̄йанабхаттико ган̣о. бхат̣ипуттаган̣о на̄ма кума̄рабхаттико ган̣о. а̄дисаддена ан̃н̃ампи га̄манигаме ануса̄ситум̣ саматтхам̣ ган̣ам̣ сан̇ган̣ха̄ти. атха ва̄ маллаган̣оти маллара̄джӯнам̣ ган̣о. те хи ган̣ам̣ катва̄ кусина̄ра̄йам̣ раджджам̣ ануса̄санти, те сандха̄йа вуттам̣ ‘‘маллаган̣о’’ти. бхат̣ипуттаган̣оти личчхавиган̣о парийа̄йантарена вутто. личчхавира̄джӯнан̃хи пуббара̄джа̄но бхат̣ина̄макасса джат̣иласса путта̄ хонти, тесам̣ вам̣се паватта̄ етарахи личчхавира̄джа̄нопи бхат̣ипутта̄ти вуччанти. джат̣ило пана ба̄ра̄н̣асиран̃н̃о путте надисотена вуйхама̄не надито уддхаритва̄ аттано ассаме путтам̣ катва̄ бхаран̣атта̄ посанатта̄ бхат̣ӣти вуччати, тасса путтатта̄ личчхавиган̣о бхат̣ипуттоти вуччати. тепи ган̣ам̣ катва̄ веса̄лийам̣ раджджам̣ ануса̄санти, там̣ сандха̄йа вуттам̣ ‘‘бхат̣ипуттаган̣о’’ти. дхаммаган̣о на̄ма са̄санадхаммабхаттико ган̣о. гандхикасен̣ӣти гандхака̄ра̄нам̣ самаджа̄тика̄нам̣ сиппика̄нам̣ ган̣о. дуссикасен̣ӣти дуссака̄ра̄нам̣ самаджа̄тика̄нам̣ песака̄ра̄нам̣ ган̣о. а̄дисаддена таччхакасен̣ираджакасен̣иа̄дайо сан̇гайханти. йаттха йаттха̄ти йасмим̣ йасмим̣ т̣ха̄не. хӣти саччам̣. те ева̄ти ган̣а̄дайо ева. пуна тети ган̣а̄дайо. иданти ‘‘ган̣ам̣ ва̄’’тиа̄дивачанам̣. еттха̄ти ра̄джа̄дӣсу. сан̇гха̄пуччханамева падха̄нака̄ран̣анти а̄ха ‘‘бхиккхунисан̇гхо а̄пуччхитаббова̄’’ти. каппагатиканти каппам̣ гаччхатӣти каппагата̄, са̄ ева каппагатика̄, там̣.
кеначи каран̣ӣйена кхан̣д̣асӣмам̣ агантва̄ кеначи каран̣ӣйена бхиккхунӣсу пакканта̄сӯти йоджана̄. нисситакапариса̄йа̄ти антева̄сикапариса̄йа. вут̣т̣ха̄пентийа̄ти упасампа̄дентийа̄ти. дутийам̣.