8. кан̣д̣упат̣иччха̄дисиккха̄падам̣

537. ат̣т̣хаме ‘‘каттха̄’’тиа̄дӣни вуттанайа̄нева.

539. ‘‘йасса̄’’ти падасса висайам̣ дассетум̣ вуттам̣ ‘‘бхиккхуно’’ти. ‘‘на̄бхийа̄ хет̣т̣ха̄’’ти имина̄ на̄бхийа̄ адхо адхона̄бхӣти вачанаттхам̣ дассети, ‘‘джа̄н̣уман̣д̣ала̄нам̣ упарӣ’’ти имина̄ джа̄н̣уман̣д̣ала̄нам̣ уббха уббхаджа̄н̣уман̣д̣аланти. уббхасаддо хи упарипарийа̄йо саттамйантанипа̄то. кан̣д̣укхаджджусадда̄нам̣ вевачанатта̄ вуттам̣ ‘‘кан̣д̣ӯти кхаджджӯ’’ти. кан̣д̣ати бхеданам̣ каротӣти кан̣д̣у. кхаджджати бйадханам̣ каротӣти кхаджджу. кесучи поттхакесу ‘‘каччхӯ’’ти па̄т̣хо аттхи, со айутто.

лохитам̣ тун̣д̣ам̣ етисса̄ти лохитатун̣д̣ика̄. пил̣айати виба̄дхайатӣти пил̣ака̄. а̄ бхусо асучим̣ савати паггхара̄петӣти асса̄воти вачанаттхам̣ дассенто а̄ха ‘‘асучипаггхаран̣а’’нти. арисан̃ча бхагандара̄ ча мадхумехо ча. а̄дисаддена дунна̄мака̄дайо сан̇ган̣ха̄ти. таттха ари вийа ӣсати абхибхаватӣти арисам̣. бхагам̣ вуччати ваччамаггам̣, там̣ дарати пха̄летӣти бхагандара̄, гӯтхасамӣпе джа̄то ван̣ависесо. мадху вийа мутта̄дим̣ михати сечатӣти мадхумехо, со а̄ба̄дхо муттамехо суккамехо раттамехоти анекавидхо. тхулласаддо махантапарийа̄йоти а̄ха ‘‘маха̄’’ти. ат̣т̣хамам̣.