5. таласаттикасиккха̄падам̣

454. пан̃чаме таланти хаттхаталам̣. тан̃хи талати йам̣кин̃чи гахитаваттху патит̣т̣ха̄ти еттха̄ти ‘‘тала’’нти вуччати. саттӣти кунто. со хи сакати виджджхитум̣ саматтхетӣти ‘‘саттӣ’’ти вуччати. таламева саттисадисатта̄ таласаттикам̣, садисаттхе ко, там̣ таласаттикам̣ упача̄рена гахетва̄ ‘‘ка̄йампӣ’’ти вуттам̣. ка̄йато ан̃н̃ам̣ ваттхумпи таласаттикасан̇кха̄тена ка̄йена гахетва̄ уггиратта̄ вуттам̣ ‘‘ка̄йапат̣ибаддхампӣ’’ти. ‘‘паха̄расамуччита̄’’ти еттха сам̣пуббо ча упуббо ча чисаддо пагун̣анасан̇кха̄те паричите ваттатӣти а̄ха ‘‘паха̄рапаричита̄’’ти. паха̄рена сам̣ пунаппунам̣ уччита̄ паричита̄ти аттхо. имамеваттхам̣ сандха̄йа вуттам̣ ‘‘пуббепи…пе… аттхо’’ти. ан̃н̃ампи саджджха̄йананайам̣ дассетум̣ вуттам̣ ‘‘паха̄расса уббига̄’’ти. тасса̄ти тасса па̄т̣хасса. паха̄расса̄ти паха̄рато. ниссаккаттхе четам̣ са̄мивачанам̣. ‘‘бхӣта̄’’ти имина̄ ‘‘уббига̄’’ти еттха упубба виджадха̄туссаттхам̣ дассети.

457-8. вираддхоти пан̣н̣ако хутва̄. пуббети пуримасиккха̄паде. вуттесу ваттхӯсӯти ‘‘чорам̣ ва̄ паччаттхӣкам̣ ва̄’’тиа̄дина̄ вуттесу ваттхӯсӯти. пан̃чамам̣.