3. моханасиккха̄падам̣

444. татийе анусаддо пат̣ипа̄т̣иаттхам̣ антокатва̄ виччхаттхава̄чакоти а̄ха ‘‘анупат̣ипа̄т̣ийа̄ аддхама̄се аддхама̄се’’ти. соти па̄тимоккхо. упосатхе упосатхе уддиситаббанти анупосатхикам̣. еттха̄пи хи анусаддо виччхаттхава̄чако. соти па̄тимоккхо. уддисийама̄но на̄ма хотӣти йоджана̄. ‘‘тасмим̣ ана̄ча̄ре’’ти падена ‘‘таттха̄’’ти падассаттхам̣ дассети. ‘‘йам̣ а̄патти’’нти падена йам̣саддасса висайам̣ дассети. йатха̄дхаммоти еттха дхаммасаддена дхаммо ча винайо ча адхиппетоти а̄ха ‘‘дхаммо ча винайо ча̄’’ти. йатха̄ти йена̄ка̄рена. са̄дхусаддо сундараттхо, касаддо падапӯран̣оти а̄ха ‘‘сут̣т̣хӯ’’ти. ат̣т̣хинти ча ‘‘катва̄’’ти ча две пада̄ни дат̣т̣хабба̄ни. ‘‘ат̣т̣хикатва̄’’ти ва̄ екам̣ падам̣. таттха пуббанайе аттхо йассаттхӣти ат̣т̣хи ттхака̄расса т̣т̣хака̄рам̣ катва̄, там̣ ат̣т̣хим̣. катва̄ти тва̄паччайантауттарападена сама̄со на хоти. ат̣т̣хикабха̄ванти еттха икасаддена ‘‘ат̣т̣хӣ’’ти еттха ӣпаччайам̣ дассети. ‘‘бха̄ва’’нтипадена бха̄вапаччайена вина̄ бха̄ваттхасса н̃а̄петаббатам̣ дассети. аттхо паневам̣ дат̣т̣хаббо – ат̣т̣хибха̄вам̣ катва̄ти. паччхиманайе аттхо йассаттхӣти ат̣т̣хико пуриманайенева ттхака̄расса т̣т̣хака̄рам̣ катва̄. аттхайитаббо иччхитабботи ва̄ ат̣т̣хико, ат̣т̣хикаити на̄масаддато тва̄паччайо ка̄таббо. ‘‘ат̣т̣хикатва̄’’ти идам̣ падам̣ кирийа̄висесанам̣. кирийа̄висесане ваттама̄не карадха̄ту ва̄ бхӯдха̄ту ва̄ йоджетабба̄ти дассебхум̣ вуттам̣ ‘‘катва̄ хутва̄’’ти. там̣ саббам̣ дассенто а̄ха ‘‘ат̣т̣хикатва̄ти ат̣т̣хикабха̄вам̣ катва̄, ат̣т̣хико хутва̄’’ти. татийам̣.