1. сура̄па̄насиккха̄пада-аттхайоджана̄

326. сура̄па̄наваггасса пат̣хаме бхадда̄ вати еттха̄ти бхаддаватика̄ти ча, бхадда̄ вати бхаддавати, са̄ еттха аттхӣти бхаддаватика̄ти ча аттхам̣ дассенто а̄ха ‘‘со’’тиа̄ди. соти га̄мо лабхӣти самбандхо. патхам̣ гаччхантӣти патха̄виноти кате аддхика̄йева̄ти а̄ха ‘‘аддхика̄’’ти. аддхам̣ гаччхантӣти аддхика̄. ‘‘патхика̄’’типи па̄т̣хо, айамеваттхо. ‘‘теджаса̄ теджа’’нтипада̄ни самбандха̄пеккха̄ни ча хонти, пада̄нам̣ сама̄натта̄ самбандхо ча сама̄ноти ман̃н̃итум̣ саккун̣еййа̄ ча хонти, тасма̄ тесам̣ самбандхан̃ча тасса асама̄натан̃ча дассетум̣ вуттам̣ ‘‘аттано теджаса̄ на̄гасса теджа’’нти. ‘‘а̄нубха̄вена̄’’тиимина̄ пана теджасаддасса аттхам̣ дассети. капотасса па̄до капото упача̄рена, тасса есо ка̄пото, ван̣н̣о. ка̄пото вийа ван̣н̣о асса̄ти ка̄потика̄ти дассенто а̄ха ‘‘капотапа̄дасамаван̣н̣араттобха̄са̄’’ти. пасаннасаддасса паса̄дасаддха̄дайо ниваттетум̣ ‘‘сура̄ман̣д̣ассетам̣ адхивачана’’нти вуттам̣. пан̃ча̄бхин̃н̃асса сатоти пан̃ча̄бхин̃н̃асса сама̄насса са̄гатасса̄ти йоджана̄.

328. ‘‘мадхукапуппха̄дӣнам̣ расена като’’тиимина̄ пуппха̄нам̣ расена като а̄саво пуппха̄савоти вачанаттхам̣ дассети. еса найо ‘‘пхала̄саво’’тиа̄дӣсупи. сура̄мерайа̄нам̣ висесам̣ дассетум̣ вуттам̣ ‘‘сура̄ на̄ма̄’’тиа̄ди. пит̣т̣хакин̣н̣апаккхитта̄ти пит̣т̣хена ча кин̣н̣ена ча паккхитта̄ ката̄ ва̄рун̣ӣти самбандхо. кин̣н̣а̄ти ча сура̄йа бӣджам̣. тан̃хи киранти на̄на̄самбха̄ра̄ни миссӣбхаванти еттха̄ти кин̣н̣а̄ти вуччати. тасса̄йева ман̣д̣ети йоджана̄. сурана̄макена екена ваначаракена ката̄ти сура̄. мадам̣ джанетӣти мерайам̣.

329. лон̣асовӣраканти евам̣на̄макам̣ па̄нам̣. суттантипи евамева. тасминти сӯпасам̣па̄ке. телам̣ пана пачантӣти самбандхо. наттхи тикхин̣ам̣ маджджам̣ еттха̄ти атикхин̣амаджджам̣, атикхин̣амадждже тасмим̣йева телети аттхо. йам̣ пана̄ти телам̣ пана. тикхин̣ам̣ маджджам̣ имасса теласса̄ти тикхин̣амаджджам̣. йаттха̄ти теле. арит̣т̣хоти евам̣на̄макам̣ бхесаджджам̣. танти арит̣т̣хам̣, ‘‘сандха̄йа̄’’типаде авуттакаммам̣. етанти ‘‘амаджджам̣ арит̣т̣ха’’нтивачанам̣, ‘‘вутта’’нтипаде вуттакамманти. пат̣хамам̣.