3. маха̄качча̄набхаддекараттасуттаван̣н̣ана̄

279. ун̣хабха̄вена тапанато тапам̣ удакам̣ етасса̄ти тапода̄, рахадо. тена̄ха ‘‘таттодакасса рахадасса̄’’ти. сан̇кхепена вуттаматтхам̣ виттха̄рато дассетум̣, ‘‘вебха̄рапаббатасса̄’’тиа̄ди вуттам̣. тато удакарахадато, там̣ рахадам̣ упанисса̄йа̄ти аттхо. на̄габхавана̄гатопи хи со рахадо тато упари мануссалоке джала̄сайена самбаддхо хоти. тена вуттам̣ – ‘‘тапода̄ на̄ма надӣ сандатӣ’’ти. едиса̄ти кутхита̄ ун̣ха̄, анваттхана̄мавасена тапода̄ти ча вуччатӣти аттхо. петалокоти пета̄нам̣ васанат̣т̣ха̄нам̣ паччеканирайам̣ сандха̄йа̄ха. имасса пана а̄ра̄масса̄ти тапода̄ра̄масса. татоти тапода̄сан̇кха̄танадито. маха̄удакарахадоти маха̄удакабхаритам̣ паллалам̣.

280. самиддхоти ул̣а̄ро, парипун̣н̣ойева̄ти аттхо. а̄димхи брахмачарийамасса̄ти а̄дибрахмачарийо, со ева а̄дибрахмачарийако. тена̄ха ‘‘пуббабха̄гаппат̣ипаттибхӯто’’ти. ‘‘атӣтам̣ ана̄гатам̣ паччуппанна’’нти аддхабхедамукхена сан̇кхатадхаммабодхавачанам̣.

282. ка̄мам̣ кхандха̄дивасена вибхаджанам̣ са̄дха̄ран̣ам̣, пат̣хамадутийачатуттхасуттесу пана кхандхавасена вибхаджанам̣ катва̄ идха татха̄ акатва̄ евам̣ десана̄йа т̣хапанам̣ тато ан̃н̃атха̄ а̄йатанавасена вибхаджанаттхам̣. евам̣ вибхинна̄ хи сан̇кхепавиттха̄рато анавасеса̄ саммасанупага̄ дхамма̄ вибхаджитва̄ дассита̄ хонти; айам̣ киреттха бхагавато аджджха̄сайо тхерена найато гахитоти дассетум̣, ‘‘имасмим̣ кира̄’’тиа̄ди вуттам̣. таттха два̄даса̄йатанавасенева ма̄тикам̣ т̣хапесӣти локийа̄ни два̄даса̄йатана̄ни ева сандха̄йа ма̄тикам̣ т̣хапеси, йатха̄ тӣсу суттесу кхандхавасена вибхаттам̣, евам̣ йади бхагавата̄ идха̄пи вибхаджанам̣ иччхитам̣ сийа̄, татха̄ вибхаджеййа, йасма̄ пана татха̄ авибхаджитва̄ва гандхакут̣им̣ павит̣т̣хо, тасма̄ два̄даса̄йатанавасеневеттха вибхаджанам̣ бхагавата̄ ча адхиппетанти найагга̄хе т̣хатва̄ тхеро вибхаджи. тена̄ха – ‘‘найам̣ пат̣илабхитва̄ евама̄ха̄’’ти. бха̄рийам̣ катанти дуккарам̣ катам̣. ападе падам̣ дасситам̣ а̄ка̄се падам̣ катам̣ са̄дха̄ран̣асса аттхасса висит̣т̣хависайата̄йа дасситатта̄. никантивин̃н̃а̄н̣анти никантитан̣ха̄йа сампайуттам̣ вин̃н̃а̄н̣ам̣, ‘‘чхандара̄гаппат̣ибаддхам̣ хотӣ’’ти вачанато. маноти бхаван̇гачиттам̣ манодва̄рикаджавана̄нам̣ два̄рабхӯтам̣.

283. паттхана̄васена т̣хапесӣти паттхана̄васена читтам̣ паваттеси.

маха̄качча̄набхаддекараттасуттаван̣н̣ана̄йа лӣнаттхаппака̄сана̄

саматта̄.