8. гопакамоггалла̄насуттаван̣н̣ана̄

79. каммам̣йева камманто, со еттха аттхӣти каммакаран̣ат̣т̣ха̄нам̣ ‘‘камманто’’ти вуттам̣. тена̄ха ‘‘каммантат̣т̣ха̄на’’нти. техи дхаммехӣти буддхагун̣ехи. те пана саббан̃н̃утан̃н̃а̄н̣аппамукха̄ти катва̄ а̄ха ‘‘саббан̃н̃утан̃н̃а̄н̣адхаммехӣ’’ти. саббена саббанти саббаппака̄рена анавасесам̣, еттако гун̣а̄нам̣ пака̄рабхедо, тесу кин̃чипи пака̄рам̣ анавасесетва̄. саббакот̣т̣ха̄сехи саббанти йаттака̄ гун̣абха̄га̄, техи саббехи анавасесам̣ ниссесамева катва̄. йопи ахосӣти йопи косамбива̄сӣнам̣ бхиккхӯнам̣ васена косамбийам̣ калахо ахоси. сопи таттхева уппаннат̣т̣ха̄нейева уппаннаматто вӯпасамито. париниббутака̄ле панасса̄ти асса самма̄самбуддхасса париниббутака̄ле пана. бхиййосоматта̄йа бхиккхӯ самагга̄ джа̄та̄, катхан̃ча сам̣вего джа̄тоти дассетум̣ ‘‘ат̣т̣хасат̣т̣хӣ’’тиа̄ди вуттам̣. са̄тисайам̣ абхин̣хан̃ча упасамаппаттийа̄ ативийа упасантупасанта̄. анусам̣йа̄йама̄ноти ану ану саммадева джа̄нанто вича̄ренто воса̄сама̄но. ‘‘анусан̃н̃а̄йама̄но’’ти ва̄ па̄т̣хо. таттха йа-ка̄расса н̃а-ка̄рам̣ катва̄ ниддесоти а̄ха ‘‘анувичарама̄но’’ти.

80. хет̣т̣химапуччхамева̄ти гопакамоггалла̄нена пуччхитапуччхамева. со хи ‘‘техи дхаммехӣ’’тиа̄дина̄, ‘‘аттхи кочи тумха̄кам̣ са̄санасса са̄рабхӯто бхиккхӯ’’ти пуччхи. айан̃ча тамева ‘‘пат̣исаран̣о’’ти парийа̄йена пуччхи. аппат̣исаран̣ети йам̣ тумхе бхиккхум̣ пат̣ибодхеййа̄тха, та̄дисасса абха̄вена аппат̣исаран̣е. татха̄гатена паведито дхаммо пат̣исаран̣ам̣ етесанти дхаммапат̣исаран̣а̄. тена̄ха ‘‘дхаммо авассайо’’ти.

81. а̄гаччхатӣти ва̄чуггатабха̄вена а̄гаччхати. ваттхувӣтиккамасан̇кха̄те гаругарутаралахулахутара̄дибхеде аджджха̄ча̄ре а̄паттисаман̃н̃а̄ти а̄ха – ‘‘а̄патти…пе… а̄н̣а̄тиккаманамева̄’’ти. йатха̄дхамманти дхамма̄нурӯпам̣. йатха̄сит̣т̣ханти йатха̄нусит̣т̣хам̣. дхаммо ноти еттха но-саддо авадха̄ран̣е ‘‘на но самам̣ аттхи татха̄гатена̄’’тиа̄дӣсу (кху. па̄. 6.3; су. ни. 226) вийа. тенева̄ха ‘‘дхаммова ка̄ретӣ’’ти.

83. ‘‘йатха̄ там̣ тумха̄дисехи раккхакехи гопакехӣ’’ти евам̣ пасаннавесена атта̄нам̣ уккам̣са̄петука̄мо. арийӯпава̄дапа̄пам̣ кхама̄пане сати антара̄йа̄йа на хотӣти а̄ха – ‘‘иччетам̣ кусала’’нти. гонан̇галамаккат̣оти гонан̇гут̣т̣хамаккат̣о.

84. айам̣ уккам̣са̄петум̣ иччхитам̣ йатха̄раддхаматтхам̣ висам̣ва̄дети аван̣н̣итампи ван̣н̣итам̣ катва̄ катхенто; имасса вачанасса пат̣иккхепена имина̄ да̄таббапин̣д̣апа̄тасса антара̄йо ма̄ хотӯти евам̣ пин̣д̣апа̄там̣ раккхитум̣ на кхо пана сакка̄ти йоджана̄. иданти ‘‘на кхо, бра̄хман̣а, со бхагава̄’’тиа̄дидесанам̣. аббхантарам̣ каритва̄ти нибба̄нантогадхам̣ катва̄, антарам̣ ва̄ тасса ниджджха̄насса ка̄ран̣ам̣ катва̄. ка̄мара̄гавасена хи там̣ ниджджха̄нам̣ хотӣти. идха̄ти имасмим̣ суттападесе. саббасан̇га̄хикаджджха̄нанти локийалокуттарасса антара̄йо ма̄ хотӯти евам̣ катва̄пи рӯпа̄вачарасса маггаджха̄насса пхаладжха̄насса̄ти саббассапи сан̇ган̣ханавасена деситатта̄ саббасан̇га̄хакаджджха̄нам̣ на̄ма катхитам̣.

йам̣ но майанти еттха ноти нипа̄таматтам̣. там̣ ноти еттха пана ноти амха̄канти аттхо. усӯйати ра̄джакиччапасутата̄дхӣната̄йа екаттха̄бхинивесабха̄вато. мандапан̃н̃ата̄йа вассака̄рагатаисса̄бхибхӯтачиттата̄йа парипун̣н̣ам̣ катва̄ вуттампи аттхам̣ анупадха̄ренто а̄ха – ‘‘екадесамева катхесӣ’’ти. сесам̣ сувин̃н̃еййамева.

гопакамоггалла̄насуттаван̣н̣ана̄йа лӣнаттхаппака̄сана̄ саматта̄.