5. бодхира̄джакума̄расуттаван̣н̣ана̄

324. олоканакападуманти лӣла̄аравиндам̣. тасма̄ти коканадасан̣т̣ха̄натта̄ коканадоти сан̇кхам̣ лабхи.

325. йа̄ва паччхима…пе… пхалакам̣ вуттам̣ тасса саббапаччха̄ сантхататта̄. упаримапхалагатан̃хи сопа̄наматтхакам̣. олоканаттхам̣йева̄ти на кевалам̣ бхагавато а̄гаманан̃н̃ева олоканаттхам̣, атха кхо аттано паттхана̄йа сантхара̄пита̄йа челапат̣ика̄йа аккаманассапи.

сакун̣апотакети ка̄дамбат̣ит̣т̣ибхапуттаке. ан̃н̃ова бхавеййа̄ти тасмим̣ аттабха̄ве ма̄туга̄мато ан̃н̃о ида̄ни бхарийа̄бхӯто ма̄туга̄мо бхавеййа. путтам̣ лабхеййа̄ти аттано каммавасена путтам̣, но тасса. убхохӣти имехи ева убхохи. имехи ка̄ран̣ехӣти тасса ра̄джакума̄расса буддхам̣ пат̣ичча миччха̄гахан̣ам̣, титтхийа̄нам̣ уджджха̄йанам̣, ана̄гате манусса̄нам̣ бхиккхӯнам̣ уддисса виппат̣иса̄роти имехи тӣхи ка̄ран̣ехи. пан̃н̃аттанти сантхатам̣ челапат̣икам̣. ман̇галам̣ иччхантӣти ман̇галика̄.

326. татийам̣ ка̄ран̣анти имина̄ бхиккхӯсу виппат̣иса̄ра̄нуппа̄данама̄ха. йам̣ кин̃чи парибхун̃джана-сукхам̣ ка̄масукхаллика̄нуйоготи адхиппа̄йена ка̄масукхаллика̄нуйогасан̃н̃ӣ хутва̄…пе… ман̃н̃ама̄но евама̄ха.

327. атха нам̣ бхагава̄ тато миччха̄бхинивесато вивечетука̄мо ‘‘со кхо аха’’нтиа̄дина̄ аттано дуккарачарийам̣ дассетум̣ а̄рабхи. маха̄саччаке(ма. ни. 1.364 а̄дайо) вуттанайенева ведитаббам̣ ‘‘со кхо аха’’нтиа̄дипа̄т̣хасса таттха а̄гатанийа̄менева а̄гататта̄. па̄сара̄сисутте (ма. ни. 1.272 а̄дайо) вуттанайена̄ти еттха̄пи есева найо.

343. ан̇кусам̣ ган̣ханти етена тасса гахан̣е чхеко хотӣти ан̇кусагахан̣асиппам̣. мегхаутунти мегхам̣ пат̣ичча уппаннасӣтаутум̣. паббатаутунти паббатам̣ пат̣ичча ун̣хаутум̣. убхайавасена ча тасса татха̄ сӣтун̣хаутуто ено а̄гатоти та-ка̄расса да-ка̄рам̣ катва̄ уденоти на̄мам̣ ака̄си.

та̄пасо ога̄л̣хан̃а̄н̣авасена ран̃н̃о матабха̄вам̣ н̃атва̄. а̄дито пат̣т̣ха̄йа̄ти косамбинагаре парантапаран̃н̃о аггамахесибха̄вато пат̣т̣ха̄йа. пуббети сӣлавантака̄ле. хаттхигантханти хаттхӣнам̣ аттано васе ватта̄панасаттхам̣. теневасса там̣ сиккха̄пети, киччан̃ча иджджхати.

344. падаханабха̄воти бха̄вана̄нуйого. падха̄не ва̄ нийутто падха̄нийо, падха̄нийасса бхиккхуно, тассева падха̄нийабха̄васса ан̇га̄ни ка̄ран̣а̄ни падха̄нийан̇га̄ни. саддха̄ етасса аттхӣти саддхо. кин̃ча̄пи паччекабодхисатта̄нампи абхинӣха̄рато пат̣т̣ха̄йа а̄гата̄ а̄гаманасаддха̄ ева, маха̄бодхисатта̄нам̣ пана саддха̄ гарутара̄ти са̄ ева гахита̄. ачалабха̄вена окаппанам̣ ‘‘самма̄самбуддхо бхагава̄, сва̄кхйа̄то дхаммо, суппат̣ипанно сан̇гхо’’ти кеначи акампийабха̄вена ратанаттайагун̣е ога̄хитва̄ каппанам̣. паса̄дуппатти ратанаттайе пасӣданамева. бодхинти чатумагган̃а̄н̣анти вуттам̣ там̣нимиттатта̄ саббан̃н̃утан̃н̃а̄н̣асса, бодхӣти ва̄ самма̄самбодхи. саббан̃н̃утан̃н̃а̄н̣ападат̣т̣ха̄нан̃хи магган̃а̄н̣ам̣, магган̃а̄н̣ападат̣т̣ха̄нан̃ча саббан̃н̃утан̃н̃а̄н̣ам̣ ‘‘самма̄самбодхӣ’’ти вуччати. ниччхитасубуддхата̄йа дхаммасса судхаммата̄ сан̇гхасса суппат̣ипатти виниччхита̄ ева хотӣти а̄ха ‘‘десана̄сӣсамева чета’’нтиа̄ди. тасса падха̄нам̣ вӣрийам̣ иджджхати ратанаттайасаддха̄йа ‘‘има̄йа пат̣ипада̄йа джара̄маран̣ато муччисса̄мӣ’’ти падха̄на̄нуйоге авам̣мукхасамбхавато.

аппа̄ба̄дхотиа̄ди хет̣т̣ха̄ вуттамева. агун̣ам̣ пака̄сета̄ а̄йатим̣ сам̣варам̣ а̄паджджита̄ самма̄пат̣ипаттийа̄ висодханаттхам̣. удайан̃ча аттхан̃ча гантунти ‘‘авиджджа̄самудайа̄’’тиа̄дина̄ пан̃чаннам̣ упа̄да̄наккхандха̄нам̣ удайан̃ча вайан̃ча джа̄нитум̣. тена̄ха ‘‘етена̄’’тиа̄ди. парисуддха̄йа упаккилесавинимутта̄йа. ниббиджджхитунти тадан̇гавасена паджахитум̣ самуччхедаппаха̄насса паччайо бхавитум̣. йам̣ дуккхам̣ кхӣйатӣти килесесу аппахӣнесу тена тадупаниссайакаммам̣ пат̣ичча йам̣ дуккхам̣ уппаджджеййа, там̣ сандха̄йа вуттам̣.

345. сесадивасети саттадивасато пат̣т̣ха̄йа йа̄ва две раттиндива̄.

346. куччхисанниссито габбхо ниссайавоха̄рена ‘‘куччхӣ’’ти вуччати, со етисса̄ аттхӣти куччхиматӣ. тена̄ха ‘‘а̄паннасатта̄’’ти. а̄раккхо панасса паччупат̣т̣хито хотӣти ма̄тара̄ гахитасаран̣ам̣ габбхавут̣т̣хитасса тасса саран̣агаманам̣ паведайитасса кусалам̣ саран̣ам̣ на̄ма, ма̄ту катараккхо путтассапи паччупат̣т̣хитоти. махаллакака̄лети вачанаттхам̣ джа̄нанака̄ле. са̄рентӣти йатха̄дит̣т̣хам̣ йатха̄балам̣ ратанаттайагун̣апатит̣т̣ха̄панавасена асса са̄ренти. саллаккхетва̄ти вуттаматтхам̣ упадха̄ретва̄. саран̣ам̣ гахитам̣ на̄ма хоти ратанаттайасса саран̣абха̄васаллаккхан̣апуббакатаннинначиттабха̄ватова. сесам̣ сувин̃н̃еййамева.

бодхира̄джакума̄расуттаван̣н̣ана̄йа лӣнаттхаппака̄сана̄ саматта̄.