2. ат̣т̣хакана̄гарасуттаван̣н̣ана̄

17. авидӯрети имина̄ па̄л̣ийам̣ ‘‘веса̄лийа’’нти идам̣ самӣпе бхуммавачананти дассети. са̄раппаттакулаган̣ана̄йа̄ти (а. ни. т̣ӣ. 3.11.16) маха̄са̄рамахаппаттакулаган̣ана̄йа. дасаме т̣ха̄нети ан̃н̃е ан̃н̃ети дасаган̣анат̣т̣ха̄не. ат̣т̣хаканагаре джа̄то бхаво ат̣т̣хакана̄гаро. куккут̣а̄ра̄моти па̄т̣алипутте куккут̣а̄ра̄мо, на косамбийам̣.

18. пакататтханиддесо та-саддоти тасса ‘‘бхагавата̄’’тиа̄дӣхи падехи сама̄на̄дхикаран̣абха̄вена вуттасса йена абхисамбуддхабха̄вена бхагава̄ пакато адхигато супа̄кат̣о ча, там̣ абхисамбуддхабха̄вам̣ саддхим̣ а̄гаманӣйапат̣ипада̄йа аттхабха̄вена дассенто ‘‘йо со…пе… абхисамбуддхо’’ти а̄ха. сатипи н̃а̄н̣адассана-садда̄нам̣ идха пан̃н̃а̄вевачанабха̄ве тена тена висесена тесам̣ висайависесе паваттидассанаттхам̣ аса̄дха̄ран̣ан̃а̄н̣ависесавасена виджджа̄ттайавасена виджджа̄абхин̃н̃а̄на̄варан̣ан̃а̄н̣авасена саббан̃н̃утан̃а̄н̣амам̣сачаккхувасена пат̣иведхадесана̄н̃а̄н̣авасена ча тадаттхам̣ йоджетва̄ дассенто ‘‘тесам̣ теса’’нтиа̄дима̄ха. таттха а̄сайа̄нусайам̣ джа̄ната̄ а̄сайа̄нусайан̃а̄н̣ена саббам̣ н̃еййадхаммам̣ пассата̄ саббан̃н̃ута̄на̄варан̣ан̃а̄н̣ехи. пуббенива̄са̄дӣхӣти пуббенива̄са̄саваккхайан̃а̄н̣ехи. пат̣иведхапан̃н̃а̄йа̄ти арийамаггапан̃н̃а̄йа. десана̄пан̃н̃а̄йа пассата̄ти десетаббадхамма̄нам̣ десетаббаппака̄рам̣ бодханеййапуггала̄нан̃ча а̄сайа̄нусайачарита̄дхимуттиа̄дибхедам̣ дхаммадесана̄пан̃н̃а̄йа йа̄тха̄вато пассата̄. арӣнанти килеса̄рӣнам̣, пан̃чавидхама̄ра̄нам̣ ва̄, са̄санасса ва̄ паччаттхика̄нам̣ ан̃н̃атиттхийа̄нам̣ тесам̣ пана хананам̣ па̄т̣иха̄рийехи абхибхаванам̣ аппат̣ибха̄ната̄каран̣ам̣ аджджхупеккханамева ва̄, кесивинайасуттан̃четтха нидассанам̣.

татха̄ т̣ха̄на̄т̣т̣ха̄на̄дивибха̄гам̣ джа̄ната̄ йатха̄каммӯпагасатте пассата̄, сава̄сана̄нам̣ а̄сава̄нам̣ кхӣн̣атта̄ арахата̄, абхин̃н̃еййа̄дибхеде дхамме абхин̃н̃еййа̄дито авипарӣта̄вабодхато самма̄самбуддхена. атха ва̄ тӣсу ка̄лесу аппат̣ихатан̃а̄н̣ата̄йа джа̄ната̄, ка̄йакамма̄дивасена тин̣н̣ам̣ камма̄нам̣ н̃а̄н̣а̄нупариваттито нисаммака̄рита̄йа пассата̄, дава̄дӣнам̣ абха̄васа̄дхика̄йа паха̄насампада̄йа арахата̄, чханда̄дӣнам̣ аха̄нихетубхӯта̄йа аккхайапат̣ибха̄наса̄дхика̄йа саббан̃н̃ута̄йа самма̄самбуддхена̄ти евам̣ дасабалаат̣т̣ха̄расаа̄вен̣икабуддхадхаммавасенапи йоджана̄ ка̄табба̄.

19. абхисан̇кхатанти аттано паччайехи абхисаммукхабха̄вена самечча самбхӯййа катам̣, свасса катабха̄во уппа̄данена ведитаббо, на уппаннасса пат̣исан̇кхаран̣ена̄ти а̄ха ‘‘уппа̄дита’’нти. те часса паччайа̄ четана̄падха̄на̄ти дассетум̣ па̄л̣ийам̣ ‘‘абхисан̇кхатам̣ абхисан̃четайита’’нти вуттанти ‘‘четайитам̣ пакаппита’’нти аттхама̄ха. абхисан̇кхатам̣ абхисан̃четайитанти ча джха̄насса па̄тубха̄вадассанамукхена виддхам̣санабха̄вам̣ уллин̇гети йан̃хи ахутва̄ самбхавати, там̣ хутва̄ пат̣ивети. тена̄ха па̄л̣ийам̣ ‘абхисан̇кхата’нтиа̄ди. саматхавипассана̄дхамме т̣хитоти саматхадхамме т̣хитатта̄ сама̄хито випассанам̣ пат̣т̣хапетва̄ аничча̄нупассана̄дӣхи ниччасан̃н̃а̄дайо паджаханто ануккамена там̣ ануломан̃а̄н̣ам̣ па̄пета̄ хутва̄ випассана̄дхамме т̣хито. саматхавипассана̄сан̇кха̄тесу дхаммесу ран̃джанат̣т̣хена ра̄го, нанданат̣т̣хена нандӣти. таттха сукхума̄ апеккха̄ вутта̄, йа̄ ‘‘никантӣ’’ти вуччати.

евам̣ сантети евам̣ йатха̄рутавасена ча имасса суттападасса аттхе гахетаббе сати. саматхавипассана̄су чхандара̄го каттабботи ана̄га̄мипхалам̣ ниббаттетва̄ тадаттха̄йа саматхавипассана̄пи аниббаттетва̄ кевалам̣ таттха чхандара̄го каттаббо бхависсати. касма̄? тесу саматхавипассана̄сан̇кха̄тесу дхаммесу чхандара̄гаматтена ана̄га̄мина̄ ладдхаббасса аладдха̄на̄га̄мипхалена ладдхаббатта̄ татха̄ сати тена ана̄га̄мипхалампи ладдхаббамева на̄ма хоти. тена̄ха – ‘‘ана̄га̄мипхалам̣ пат̣ивиддхам̣ бхависсатӣ’’ти. сабха̄вато раситаббатта̄ авипарӣто аттхо ева аттхарасо. ан̃н̃а̄пи ка̄чи сугатийоти винипа̄тике сандха̄йа̄ха. ан̃н̃а̄пи ка̄чи дуггатийоти асурака̄йама̄ха.

саматхадхурамева дхурам̣ саматхайа̄никасса васена десана̄йа а̄гататта̄. маха̄ма̄лукйова̄де ‘‘вивичча акусалехи дхаммехи савитаккам̣ савича̄ра’’нти па̄дакаджджха̄нам̣ катва̄ ‘‘со йадева таттха хоти рӯпагатам̣ ведана̄гата’’нтиа̄дина̄ випассанам̣ виттха̄ретва̄ ‘‘со таттха т̣хито а̄сава̄нам̣ кхайам̣ па̄пун̣а̄тӣ’’ти (ма. ни. 2.133) а̄гататта̄ ‘‘маха̄ма̄лукйова̄де випассана̄ва дхура’’нти а̄ха. маха̄сатипат̣т̣ха̄насутте (дӣ. ни. 2.373 а̄дайо; ма. ни. 1.106 а̄дайо) саббаттхакамева тиккхатара̄йа випассана̄йа а̄гататта̄ вуттам̣ ‘‘випассануттарам̣ катхита’’нти. ка̄йагата̄сатисутте (ма. ни. 3.153-154) а̄на̄па̄наджджха̄на̄дивасена сависесам̣ саматхавипассана̄йа а̄гататта̄ вуттам̣ ‘‘саматхуттарам̣ катхита’’нти.

аппам̣ йа̄читена бахум̣ дентена ул̣а̄рапурисена вийа екам̣ дхаммам̣ пуччхитена ‘‘айампи екадхаммо’’ти катхитатта̄ ека̄дасапи дхамма̄ пуччха̄васена екадхаммо на̄ма джа̄то паччекам̣ ва̄кйапарисама̄панан̃а̄йена. екавӣсати пабба̄ни техи бодхийама̄на̄йа пат̣ипада̄йа екарӯпатта̄ пат̣ипада̄васена екадхаммо на̄ма джа̄тоти. идха имасмим̣ ат̣т̣хакана̄гарасутте. невасан̃н̃а̄на̄сан̃н̃а̄йатанадхамма̄нам̣ сан̇кха̄ра̄васесасукхумабха̄ваппаттата̄йа таттха са̄вака̄нам̣ дуккаранти на чатуттха̄руппавасенеттха десана̄ а̄гата̄ти чатуннам̣ брахмавиха̄ра̄нам̣, хет̣т̣хима̄нам̣ тин̣н̣ам̣ а̄руппа̄нан̃ча васена ека̄даса. пуччха̄васена̄ти ‘‘аттхи ну кхо, бханте а̄нанда, тена…пе… самма̄самбуддхена екадхаммо аккха̄то’’ти (ма. ни. 2.18) евам̣ паваттапуччха̄васена. аматуппаттийаттхена̄ти аматабха̄васса уппаттихетута̄йа, сабба̄нипи каммат̣т̣ха̄на̄ни екарасампи амата̄дхигамапат̣ипаттийа̄ти аттхо, еваметтха аггапхалабхӯми ана̄га̄мипхалабхӯмӣти двева бхӯмийо сарӯпато а̄гата̄, на̄нантарийата̄йа пана хет̣т̣хима̄пи две бхӯмийо аттхато а̄гата̄ ева̄ти дат̣т̣хабба̄.

21. пан̃ча сата̄ни аггхо етасса̄ти пан̃часатам̣. сесам̣ утта̄намева.

ат̣т̣хакана̄гарасуттаван̣н̣ана̄йа лӣнаттхаппака̄сана̄ саматта̄.