4. падат̣т̣ха̄наха̄раван̣н̣ана̄

киссопи ман̃н̃ана̄ сакка̄йасса падат̣т̣ха̄нам̣, ман̃н̃ана̄нам̣ айонисоманасика̄ро падат̣т̣ха̄нам̣, сутадвайавирахо андхапутхуджджанабха̄васса падат̣т̣ха̄нам̣, со арийа̄нам̣ адасса̄вита̄йа падат̣т̣ха̄нам̣, са̄ арийадхаммасса аковидата̄йа падат̣т̣ха̄нам̣, са̄ арийадхамме авинӣтата̄йа падат̣т̣ха̄нам̣. ‘‘саппуриса̄нам̣ адасса̄вӣ’’ти еттха̄пи есева найо. сан̃н̃а̄випалла̄со ман̃н̃ана̄нам̣ падат̣т̣ха̄нам̣. сан̃н̃а̄нида̄на̄ хи папан̃часан̇кха̄ти. ман̃н̃ана̄су ча тан̣ха̄ман̃н̃ана̄ итараман̃н̃ана̄нам̣ падат̣т̣ха̄нам̣ ‘‘тан̣ха̄гата̄нам̣ паритасситавиппхандита’’нти, (дӣ. ни. 1.105-109) ‘‘тан̣ха̄паччайа̄ упа̄да̄на’’нти (ма. ни. 3.126; маха̄ва. 1) ча вачанато, тан̣ха̄гатассева ча ‘‘сеййохамасми’’нтиа̄дина̄ ма̄наджаппана̄саббха̄вата̄. сабба̄пи ва̄ ман̃н̃ана̄ сабба̄сам̣ ман̃н̃ана̄нам̣ падат̣т̣ха̄нам̣. ‘‘упа̄да̄напаччайа̄ тан̣ха̄’’ти хи вачанато дит̣т̣хипи тан̣ха̄йа падат̣т̣ха̄нам̣. ‘‘ахамасми брахма̄ маха̄брахма̄’’ти (дӣ. ни. 1.42; 3.39) а̄дивачанато ма̄нопи дит̣т̣хийа̄ падат̣т̣ха̄нам̣. татха̄ ‘‘асмӣти сати иттхам̣смӣти хоти, евам̣смӣти хоти, ан̃н̃атха̄смӣти хотӣ’’тиа̄дивачанато ма̄нассапи тан̣ха̄йа падат̣т̣ха̄ната̄ лаббхатева. секкха̄ дхамма̄ саппадесато ман̃н̃ана̄паха̄насса падат̣т̣ха̄нам̣. асеккха̄ ниппадесато ман̃н̃ана̄паха̄насса падат̣т̣ха̄нам̣. каммабхаво ча джа̄тийа̄ падат̣т̣ха̄нам̣. джа̄ти джара̄маран̣асса падат̣т̣ха̄нам̣. паччайа̄ка̄расса йатха̄бхӯта̄вабодхо самма̄самбодхийа̄ падат̣т̣ха̄нанти. айам̣ падат̣т̣ха̄но ха̄ро.