11. пан̃н̃аттиха̄раван̣н̣ана̄

‘‘саббадхаммамӯлапарийа̄йа’’нти еттха саббадхамма̄ на̄ма сакка̄йадхамма̄, те кхандхавасена пан̃чадха̄ пан̃н̃атта̄, а̄йатанавасена два̄дасадха̄, дха̄тувасена ат̣т̣ха̄расадха̄ пан̃н̃атта̄. ‘‘мӯла’’нти ва̄ ‘‘мӯлапарийа̄йа’’нти ва̄ ман̃н̃ана̄ вутта̄, та̄ тан̣ха̄ма̄надит̣т̣хивасена тидха̄ антарабхедена анекадха̄ ча пан̃н̃атта̄. атха ва̄ ‘‘саббадхамма̄’’ти тебхӯмакадхамма̄нам̣ сан̇гахапан̃н̃атти, ‘‘мӯлапарийа̄йа’’нти тесам̣ пабхавапан̃н̃атти, ‘‘во’’ти сампада̄напан̃н̃ати, ‘‘десесса̄ми бха̄сисса̄мӣ’’ти пат̣ин̃н̃а̄пан̃н̃атти, ‘‘сун̣а̄тха са̄дхукам̣ манаси каротха̄’’ти ча а̄н̣а̄панапан̃н̃атти, ‘‘ассутава̄’’ти пат̣иведхавимукхата̄пан̃н̃атти чева парийаттивимукхата̄пан̃н̃атти ча, ‘‘путхуджджано’’ти анарийапан̃н̃атти, са̄ арийадхаммапат̣иккхепапан̃н̃атти чева арийадхаммавирахапан̃н̃атти ча, ‘‘арийа̄на’’нти асамапан̃н̃атти чева самапан̃н̃атти ча. таттха асамапан̃н̃атти татха̄гатапан̃н̃атти, самапан̃н̃атти паччекабуддха̄нан̃чева убхатобха̄гавимутта̄дӣнан̃ча васена ат̣т̣хавидха̄ ведитабба̄. ‘‘арийа̄нам̣ адасса̄вӣ’’тиа̄ди дассанабха̄вана̄пат̣иккхепапан̃н̃атти, ‘‘патхавим̣ ман̃н̃атӣ’’тиа̄ди пан̃чаннам̣ упа̄да̄наккхандха̄нам̣ два̄дасаннам̣ а̄йатана̄нам̣ ат̣т̣ха̄расаннам̣ дха̄тӯнам̣ саммасанупага̄нам̣ индрийа̄нам̣ никкхепапан̃н̃атти чева пабхавапан̃н̃атти ча, татха̄ випалла̄са̄нам̣ киччапан̃н̃атти парийут̣т̣ха̄нам̣ дассанапан̃н̃атти килеса̄нам̣ пхалапан̃н̃атти абхисан̇кха̄ра̄нам̣ вирӯханапан̃н̃атти тан̣ха̄йа асса̄данапан̃н̃атти дит̣т̣хийа̄ виппханданапан̃н̃атти, ‘‘секкха̄’’ти саддха̄нуса̄рӣсаддха̄вимуттадит̣т̣хиппаттака̄йасаккхӣнам̣ дассанапан̃н̃атти чева бха̄вана̄пан̃н̃атти ча ‘‘аппаттама̄насо’’ти секкхадхамма̄нам̣ т̣хитипан̃н̃атти, ‘‘ануттарам̣ йогаккхемам̣ паттхайама̄но’’ти пан̃н̃а̄йа абхиниббида̄пан̃н̃атти, ‘‘абхиджа̄на̄тӣ’’ти абхин̃н̃еййадхамма̄нам̣ абхин̃н̃а̄пан̃н̃атти, дуккхасса парин̃н̃а̄пан̃н̃атти, самудайасса паха̄напан̃н̃атти, ниродхасса саччхикирийа̄пан̃н̃атти, маггасса бха̄вана̄пан̃н̃атти, ‘‘ма̄ ман̃н̃ӣ’’ти ман̃н̃ана̄нам̣ пат̣иккхепапан̃н̃атти, самудайасса паха̄напан̃н̃атти. имина̄ найена сесападесупи виттха̄ретаббам̣. айам̣ пан̃н̃атти ха̄ро.