10. вевачанаха̄равибхан̇гаван̣н̣ана̄

37. ан̃н̃аман̃н̃ехӣти ан̃н̃ехи ан̃н̃ехи. а̄йатинти паччавеккхан̣ака̄ле. катхан̃чӣти йена кеначи пака̄рена, пат̣хамам̣ вуттена парийа̄йена аппат̣ивиджджханто апарена парийа̄йена пат̣ивиджджхеййа̄ти адхиппа̄йо. парийа̄йавачанам̣ ниддисатӣти самбандхо. евам̣ саббаттха. тасмим̣ кхан̣ети парийа̄йавачанасса вуттаккхан̣е. виккхиттачитта̄нанти а̄рамман̣антарехи вивидхакхиттачитта̄нам̣. ан̃н̃авихита̄нанти ан̃н̃ам̣ чинтента̄нам̣. касма̄ пана ан̃н̃ена парийа̄йена тадаттха̄вабодханам̣, нану тена вутте дал̣хӣкаран̣ам̣ хотӣти чоданам̣ сандха̄йа̄ха ‘‘тенева̄’’тиа̄ди. таттха тадан̃н̃есанти техи виккхиттачитта̄дӣхи ан̃н̃есам̣, йехи пат̣хамам̣ вачанам̣ саммадева гахитам̣. таттха̄ти вуттавачаненева пунаппунам̣ вачане. адхигатаанваттхата̄йа пунарутти париваджджанаттхам̣ висесанабха̄вена та̄хи та̄хи сан̃н̃а̄хипи айампи саддо имассаттхасса ва̄чако, айампи саддо имассаттхасса ва̄чакоти пан̃н̃а̄панехи. десетаббасса тасса тасса аттхасса аттано читте упанибандханам̣ т̣хапанам̣. таттха̄ти дхамманируттипат̣исамбхида̄йам̣. бӣджа̄ва̄панам̣ хетусампа̄данам̣.

евам̣ бхагавато парийа̄йадесана̄йам̣ анека̄ни пайоджана̄ни ватва̄ ида̄ни аттано самма̄самбуддхата̄йа евам̣ татха̄гата̄ буддхалӣла̄йа анекехи парийа̄йехи дхаммам̣ десентӣти дассенто ‘‘ким̣ бахуна̄’’тиа̄дима̄ха.

па̄л̣ийам̣ ‘‘пиха̄ на̄ма йа̄ ваттама̄насса аттхасса паттхана̄’’ти паччуппаннависайатам̣ дассетва̄ пуна ана̄гатависайатам̣ дассетум̣ ‘‘сеййатарам̣ ва̄’’тиа̄ди вуттанти ‘‘ана̄гатапаччуппаннаттхависайа̄ тан̣ха̄ пиха̄’’ти а̄ха.

аттханиппхаттипат̣ипа̄лана̄ти имасмим̣ ва̄ паде пиха̄йа еваттхавасена ана̄гатапаччуппаннаттхависайабха̄вадӣпанато.

дхамма̄рамман̣енева сан̇гахита̄ ‘‘дхамма̄рамман̣а’’нтвева гахан̣ам̣ гата̄. чатувӣсати пада̄нӣти еттха гехаситадоманассӯпавича̄ра̄дӣнам̣ чатуннам̣ чхакка̄нам̣ васена чатувӣса кот̣т̣ха̄са̄.

38. са̄йева паттхана̄ка̄рена дхамманандӣтиа̄дима̄ха̄ти еттха айаматтхо – са̄ ева паттхана̄ка̄рена паваттийа̄ а̄са̄дипарийа̄йена вутта̄ тан̣ха̄ рӯпа̄дидхаммесу нанданат̣т̣хена дхамманандӣ. тесам̣ ева пийа̄йанат̣т̣хена дхаммапемам̣. гилитва̄ паринит̣т̣хапетва̄ т̣ха̄нато дхаммаджджхоса̄нанти.

имина̄пӣти на кевалам̣ ‘‘пан̃н̃а̄ паджа̄нана̄’’тиа̄диа̄вен̣икапарийа̄йенева вевачанам̣ ваттаббам̣, атха кхо имина̄ а̄дхипатеййа̄диса̄дха̄ран̣апарийа̄йенапи вевачанам̣ ваттаббанти аттхо. имина̄ва найена̄ти етена парийа̄йавачанена. на хи десанаттхаса̄дханам̣ ‘‘итипи со бхагава̄’’тиа̄дипа̄л̣инайадассананти дассети. баланиппхаттигатотиа̄дӣсу дасасу татха̄гатабалесу ниппхаттим̣ па̄рипӯрим̣ гато. самбодхипаха̄нантара̄йадесана̄ висесачодана̄су виса̄радабха̄васан̇кха̄та̄ни чатта̄ри н̃а̄н̣а̄ни патто адхигатоти веса̄раджджаппатто.

лобхаджджха̄сайа̄диаджджха̄сайам̣ висесена ативаттоти аджджха̄сайавӣтиватто. атӣтахетусан̇кхепа̄дисан̇кхепавирахитата̄йа асан̇кхепасан̇кха̄там̣ нибба̄нам̣, акуппадхаммата̄йа гун̣ехи ва̄ асан̇кхепам̣ асан̇кхйеййам̣ гато упагатоти асан̇кхепагато. сесам̣ сувин̃н̃еййамева. уддхеййанти уддхаритаббам̣.

дхамма̄нуссатийам̣ евам̣ аттхо дат̣т̣хабботи самбандхо. сам̣са̄радуккхато па̄ти, сантена сукхена рамети ча̄ти ва̄ па̄рам̣.

абхӯтапуббатта̄ти ануппаннапуббатта̄, тенасса ниччатам̣ва вибха̄вети кеначи деватопасагга̄дина̄ анупасаджджанӣйатта̄ анупасат̣т̣хатта̄.

‘‘дуппасса’’нтипи па̄л̣и, дурадхигаманти аттхо. гун̣асобха̄сурабхибха̄вена̄ти гун̣ехи собха̄йа, сугандхибха̄вена ча.

йатха̄ аккхан̣аведхӣ пуггало сиппаниппхаттийа̄ раттандхака̄ратимиса̄йа ачираккхан̣а̄локена атисукхумампи дӯрагатам̣ лаккхам̣ виджджхати, евам̣ арийаса̄вако сӣласампаттийа̄ атисукхумам̣ нибба̄нам̣ чатусаччадхаммам̣ екапат̣иведхенева пат̣ивиджджхатӣти а̄ха ‘‘сиппан̃ча сӣлам̣ аккхан̣аведхита̄йа̄’’ти. локиканти нидассанаматтам̣ дат̣т̣хаббам̣ локуттарадхаммаолоканасса̄пи адхит̣т̣ха̄набха̄вато.

вевачанаха̄равибхан̇гаван̣н̣ана̄ нит̣т̣хита̄.