7. пава̄ран̣а̄ниддесаван̣н̣ана̄

73. йена ирийа̄патхена упалаккхито пан̃чаннам̣ бходжана̄нам̣ йам̣ кин̃чи бходжанам̣ бхун̃джама̄но айам̣ бхиккху каппийа̄нам̣ пан̃чаннам̣ бходжана̄нам̣ хаттхапа̄сопанӣта̄нам̣ пава̄рито, тато ирийа̄патхато ан̃н̃ена ирийа̄патхена анатириттакам̣ йа̄вака̄ликам̣ бхун̃джеййа че, имасса па̄читти хотӣти падаттхайоджана̄. бхун̃джанаттха̄йа пат̣иггахан̣е пана дуккат̣ам̣. таттха ирийа̄йа ка̄йикакирийа̄йа патхо паваттанӯпа̄йо ирийа̄патхо, т̣ха̄нагамананисаджджанасайана̄ни. пава̄рети пат̣иккхипатӣти пава̄рито, атха ва̄ пава̄ран̣ам̣ пат̣иккхипанам̣ пава̄ритам̣, тамасса аттхӣти пава̄рито, катаппава̄ран̣о катаппат̣иккхепоти аттхо, атха ва̄ паривесакена ва̄рӣйатӣти пава̄рито пат̣иккхепито. анатириттаканти йам̣ пава̄ретва̄ а̄сана̄ вут̣т̣хахантасса ‘‘аламетам̣ сабба’’нти евам̣ атириттакаран̣а̄дӣхи саттахи винайакамма̄ка̄рехи каппийам̣ катам̣, тан̃ча ‘‘аджджа ва̄ йада̄ ва̄ иччхати, тада̄ кха̄диссатӣ’’ти а̄хат̣ам̣, гила̄на̄тириттан̃ча атириттам̣ адхиканти вуччати, тато ан̃н̃ам̣ анатириттакам̣ анадхиканти аттхо. кусалам̣ читтам̣ па̄тетӣти па̄читти, тасма̄ иттхийам̣ тимхи та-ка̄расса ча-ка̄ре, двитте ча па̄читти. йа̄мака̄ликам̣ сатта̄хака̄ликам̣ йа̄ваджӣвикам̣ а̄ха̄раттха̄йа пат̣игган̣хато а̄патти дуккат̣асса, аджджхоха̄ре аджджхоха̄ре а̄патти дуккат̣асса.

74. ида̄ни йа̄йа пава̄рита̄, са̄ пан̃чан̇гасампанна̄йева пава̄ран̣а̄ на̄ма хотӣти дассетум̣ ‘‘асана’’нтиа̄дима̄ха. таттха асананти бхун̃джама̄насса бхун̃джанам̣. имина̄ йам̣ виппакатам̣ бходжанам̣, там̣ дассети. бходжанан̃чева̄ти пава̄ран̣аппахонакам̣ бходжанан̃чева хотӣти. абхиха̄роти да̄йакасса ка̄йена пава̄ран̣аппахонакасса абхихаран̣ам̣, на ва̄ча̄йа. самӣпата̄ти ад̣д̣хатеййахаттхаппама̄н̣асан̇кха̄та̄ самӣпата̄ ча. еттха пана саче бхиккху нисинно хоти, а̄санасса паччхимантато пат̣т̣ха̄йа, саче т̣хито, пан̣хиантато пат̣т̣ха̄йа, саче нипанно, йена пассена нипанно, тасса па̄римантато пат̣т̣ха̄йа да̄йакасса т̣хитасса ва̄ нисиннасса ва̄ нипаннасса ва̄ т̣хапетва̄ паса̄ритахаттхам̣ йам̣ а̄саннатарам̣ ан̇гам̣, тасса оримантена париччхиндитва̄ ад̣д̣хатеййахаттхапа̄со ведитаббо. ка̄йава̄ча̄пат̣иккхепоти тасса абхихат̣абходжанасса ан̇гуличалана̄дика̄йавика̄рена ва̄ ‘‘ала’’нтиа̄дина̄ вачӣвика̄рена ва̄ пат̣иккхипанам̣. ити имехи пан̃чахан̇гехи пава̄ран̣а̄ пака̄райуттава̄ран̣а̄ пан̃чаан̇га̄ти самбандхо. пан̃ча ан̇га̄ни йасса̄ са̄ пан̃чаан̇га̄.

75. ида̄ни етесу одана̄дипан̃чавидхам̣ бходжанам̣ дассетва̄ та̄ни ча пуна вибхаджитва̄ дассетум̣ ‘‘одано’’тиа̄ди а̄раддхам̣. таттха са̄лӣти раттаса̄лиа̄дика̄ сабба̄пи са̄лиджа̄ти. вӣхӣти сабба̄пи вӣхина̄мика̄ вӣхиджа̄ти. кан̇гӯти сетараттака̄л̣абхеда̄ сабба̄пи кан̇гуджа̄ти. кудрӯсо на̄ма ка̄л̣акодраво. варако на̄ма сетаван̣н̣о кодраво. йавагодхумесу пана бхедо наттхи. евам̣ йатха̄вутта̄нам̣ са̄нулома̄нам̣ саттаннам̣ дхан̃н̃а̄нам̣ бходжджайа̄гу ча̄ти самбандхо. бходжджайа̄гу ча̄ти ун̣хам̣ ва̄ сӣталам̣ ва̄ бхун̃джанта̄нам̣ бходжанака̄ле гахитат̣т̣ха̄не одхи пан̃н̃а̄йати, са̄ бходжджайа̄гу. ча-саддена одано ча̄ти самбандхо, одано на̄ма̄ти аттхо. саче пана бхатте удакакан̃джикакхӣра̄дӣни а̄киритва̄ ‘‘йа̄гум̣ ган̣хатха̄’’ти денти, кин̃ча̄пи танука̄ хоти, пава̄ран̣ам̣ джанети. саче пана удака̄дӣсу паккхипитва̄ пачитва̄ денти, йа̄гусан̇гахамева гаччхати. саче пана танука̄йапи йа̄гуйа̄ са̄сапаматтампи маччхамам̣сакхан̣д̣ам̣ ва̄ нха̄ру ва̄ паккхиттам̣ хоти, пава̄ран̣ам̣ джанети.

76. са̄ма̄ка̄дитин̣ам̣ кудрӯсаке сан̇гахам̣ гатам̣, варакачорако вараке сан̇гахам̣ гато, нӣва̄ро чева са̄лийам̣ сан̇гахам̣ гатоти йоджана̄. са̄ма̄ка̄дитин̣анти са̄ма̄ко а̄ди йасса, тамева тин̣ам̣ тин̣адхан̃н̃анти сама̄со.

77. бхат̣т̣хадхан̃н̃амайоти кхарапа̄кабхаджджитехи саттавидхехи дхан̃н̃ехи кот̣т̣етва̄ като, антамасо чун̣н̣ампи кун̣д̣акампи сатту на̄ма̄ти аттхо. самапа̄кабхаджджита̄нам̣ пана а̄тапасуккха̄нам̣ ва̄ тан̣д̣ула̄нам̣ сатту ва̄ кун̣д̣ака̄ни ева ва̄ на пава̄ренти. йавена самбхаво уппатти асса̄ти йавасамбхаво, кумма̄со кумма̄со на̄ма. мугга̄дӣхи като пана пава̄ран̣ам̣ на джанети. каппийо ча̄ти каппийойева мам̣со ‘‘мам̣со’’ти вуттоти йоджана̄. ча̄ти авадха̄ран̣е. акаппийо пана пат̣иккхипитаббова. пат̣иккхиттопи на пава̄рети. удаке самбхаво йасса со маччхо на̄ма. двӣсу панетесу саче йа̄гум̣ пивантасса йа̄гуситтхаматтесупи маччхакхан̣д̣есу ва̄ мам̣сакхан̣д̣есу ва̄ екам̣ кха̄дитам̣ екам̣ хаттхе ва̄ патте ва̄ хоти, со че ан̃н̃ам̣ пат̣иккхипати, пава̄рети. двепи кха̄дита̄ни хонти, мукхе са̄сапаматтампи авасит̣т̣хам̣ наттхи, сачепи ан̃н̃ам̣ пат̣иккхипати, на пава̄рети.

78. ида̄ни ‘‘кӣдисам̣ бхун̃джанто кинти ватва̄ упанӣтам̣ ким̣ на̄ма ниседхенто пава̄рети на̄ма̄’’ти чоданам̣ манаси нидха̄йа̄ха ‘‘бхун̃джанто’’тиа̄ди. таттха каппам̣ ва̄ акаппам̣ ва̄ пан̃часу бходжанесу йам̣ кин̃чи бходжанам̣ бхун̃джанто бхиккху танна̄мена тесам̣ пава̄ран̣а̄джанакабходжана̄нам̣ на̄мена ва̄ ‘‘има’’нти са̄ман̃н̃ена ва̄ ватва̄ абхихат̣ам̣ хаттхапа̄сопанӣтам̣ каппам̣ каппийам̣ йатха̄вуттабходжанам̣ ниседхайам̣ ниседхайанто пава̄реййа̄ти падаттхасамбандхо. айаметтха адхиппа̄йо – йена че акаппийамам̣сан̃ча куладӯсанаведжджакаммауттаримануссадхамма̄рочанаса̄дитарӯпийа̄дӣхи ниббаттам̣ акаппийабходжанан̃ча татха̄ ан̃н̃ан̃ча каппийам̣ ва̄ акаппийам̣ ва̄ екаситтхаматтампи аджджхохат̣ам̣ хоти, со саче паттамукхахаттхесу йаттха каттхачи бходжане сати са̄пеккхова ан̃н̃ам̣ хаттхапа̄се т̣хитена ‘‘оданам̣ ган̣хатха̄’’тиа̄дина̄ пава̄ран̣аппахонакассева на̄мена ва̄ ‘‘има’’нти са̄ман̃н̃авасенева ва̄ ка̄йенева абхихат̣ам̣ вутталаккхан̣ам̣ каппийамева бходжанам̣ кевалам̣ ва̄ миссам̣ ва̄ ка̄йена ва̄ ва̄ча̄йа ва̄ пат̣иккхипати пава̄ретӣти. ‘‘а̄кира а̄кира, кот̣т̣етва̄ кот̣т̣етва̄ пӯрехӣ’’ти пана ваттум̣ ват̣т̣ати.

79-80. ида̄ни йе пава̄ран̣ам̣ на джаненти, те дассетум̣ ‘‘ла̄джа̄’’тиа̄дима̄ха. таттха ла̄джа̄…пе… пхала̄дӣни пава̄ран̣ам̣ на джанентӣти самбандхо. ла̄джа̄ти са̄лиа̄дӣхи ката̄ ла̄джа̄. там̣саттубхатта̄нӣти техи ла̄джехи ката̄ сатту чева бхатта̄ни ча. горасоти гуннам̣ расо кхӣра̄ди. суддхакхаджджакоти маччхамам̣сехи асаммиссата̄йа суддхакхаджджако. саттуйо пин̣д̣етва̄ като апакко саттугул̣о пана саттумодакасан̇кха̄то пава̄рети. тан̣д̣ула̄ти самапа̄кабхаджджита̄нам̣ са̄лиа̄дӣнам̣ тан̣д̣ула̄, бхаджджитатан̣д̣ула̄ ева ва̄. бхат̣т̣хапит̣т̣ханти суддхам̣ йам̣ кин̃чи бхаджджитам̣ пит̣т̣хам̣. путхука̄ти са̄лиа̄дӣнам̣ путхука̄. путхука̄ хи тантиа̄гамайуттийа̄ висумпи гайхати, екатопи, тасма̄ вутта̄васеса̄нам̣ путхука̄вел̣уа̄дӣнам̣ бхаттанти ча самбандхо. вел̣ӯти тесам̣ тан̣д̣ула̄ вуччанти. путхука̄ ча вел̣у ча, те а̄дайо йесанти сама̄со. ча-саддо панеттха саббаттха̄пи йоджетаббо. а̄ди-саддена кандамӯлапхала̄нипи гайханти. вутта̄васеса̄нанти вуттехи саттавидхехи дхан̃н̃ехи авасеса̄нам̣. расайа̄гӯти расехи паккамам̣са̄дӣхи саммисса̄ йа̄гу. расопи та̄дисова. суддхайа̄гӯти мам̣са̄дӣхи амисса̄ суддхайа̄гу. пхала̄дӣнӣти а̄ди-саддена канда̄дӣнампи гахан̣ам̣. апи ча̄ти нипа̄то, нипа̄тасамуда̄йо ва̄ самуччайе, со паччекам̣ йоджетаббо.

81. ида̄ни йасма̄ саттахи винайакамма̄ка̄рехи йам̣ атириттам̣ акатам̣, таттха па̄читтийам̣ вуттам̣, бйатирекато атириттакате наттхи, тасма̄ атириттам̣ каронтена евам̣ ка̄таббанти дассенто ‘‘пава̄ритена̄’’тиа̄дима̄ха. таттха пава̄ритена вут̣т̣ха̄йа атириттам̣ на ка̄таббам̣, бходжанам̣ абхуттена ча атириттам̣ на ка̄таббанти самбандхо. бходжананти пава̄ран̣аппахонакабходжанам̣. абхуттена̄ти екаситтхаматтампи абхутта̄вина̄. йена йам̣ва̄ пуре катанти еттха ча ева-саддо дӣгхам̣ катва̄ ниддит̣т̣хо, со ча аджджха̄хат̣ена там̣-саддена самбандхӣйати, тасма̄ йена бхиккхуна̄ йам̣ бходжанам̣ пуре пуббе атириттам̣ катам̣, тенева тамева атириттам̣ на ка̄таббанти йоджетва̄ аттхо ведитаббо. тасма̄ каппийам̣ ка̄ретва̄ бхун̃джантасса ан̃н̃ам̣ а̄мисам̣ а̄киранти, там̣ со пуна ка̄тум̣ на лабхати, тасмим̣ бходжане карийама̄не пат̣хамакатена саддхим̣ катам̣ хотӣти. ан̃н̃асмим̣ пана тена ва̄ ан̃н̃ена ва̄ ка̄тум̣ ват̣т̣ати.

82. ‘‘каппийа’’нтиа̄дӣни ‘‘каронто’’ти етасса каммапада̄ни. каппийан̃чева гахитан̃чева учча̄ритан̃чева хаттхапа̄саган̃чева йа̄вака̄ликам̣ атириттам̣ каронто ‘‘аламетам̣ сабба’’нти евам̣ бха̄сатӯти йоджана̄. таттхайам̣ пхалам̣ ва̄ кандамӯла̄ди ва̄ пан̃чахи саман̣акаппехи каппийам̣ катам̣, йан̃ча каппийамам̣сам̣ ва̄ каппийабходжанам̣ ва̄, етам̣ каппийам̣ на̄ма. гахитанти бхиккхуна̄ пат̣иггахитам̣. учча̄ританти каппийам̣ ка̄ретум̣ а̄гатена бхиккхуна̄ ӣсакампи уккхиттам̣ ва̄ апана̄митам̣ ва̄, там̣ пана атириттака̄ракена ‘‘аламетам̣ сабба’’нти вуттена ка̄таббам̣. хаттхапа̄саганти каппийам̣ ка̄ретум̣ а̄гатена хаттхапа̄сам̣ гатам̣. атириттам̣ каронтоти ӣдисам̣ чатуббидха̄ка̄расампаннам̣ бходжанам̣ атириттам̣ каронто пава̄ретва̄ а̄сана̄ авут̣т̣хито ва̄ аппава̄ретва̄пи саббатха̄ бхутто ва̄ти евам̣ дувидхавинайакамма̄ка̄расампанно бхиккху. аламетам̣ саббанти евам̣ бха̄сатӯти аламетам̣ саббам̣ ити евам̣ бха̄сату. евам̣ саттавидхам̣ винайакамма̄ка̄рам̣ сампа̄денто вачӣбхедам̣ катва̄ сакимпи евам̣ вадеййа̄ти аттхо.

83. каппийам̣ каронтена пана анупасампаннасса хаттхе т̣хитам̣ на ка̄таббам̣. тена̄ха ‘‘на каре…пе… хаттхага’’нти. упасампаннато ан̃н̃о анупасампанно, тасса хаттхе гатам̣ анупасампаннахаттхагам̣. песайитва̄пӣти саче таттха ан̃н̃о бйатто бхиккху наттхи, йаттха аттхи, таттха песайитва̄пи. там̣ атириттакатам̣ ака̄рако атириттака̄ракато ан̃н̃о саббо пава̄ритопи аппава̄ритопи бхун̃джитум̣ лаббхатети самбандханӣйам̣. пава̄ритена пана мукхан̃ча хаттхан̃ча содхетва̄ бхун̃джитаббам̣.

пава̄ран̣а̄ниддесаван̣н̣ана̄ нит̣т̣хита̄.