33. ка̄йабандхананиддесаван̣н̣ана̄

235. бандхӣйати анена̄ти бандханам̣, ка̄йасса бандханам̣ ка̄йабандханам̣, наттхи ка̄йабандханаметасса̄ти ака̄йабандхано. дуккат̣анти сан̃чичча ва̄ асан̃чичча ва̄ пависеййа че, дуккат̣ам̣. асатийа̄ гато йаттха сарати, таттхева бандхеййа̄ти самбандхо. гатоти антога̄мам̣ гато. саритва̄ йа̄ва на бандхати, на та̄ва пин̣д̣а̄йа чаритаббам̣.

236. ‘‘пат̣т̣ика̄’’тиа̄дина̄ саббасан̇га̄хакам̣ ка̄йабандханам̣ ниддисати. пат̣т̣ика̄ти пакативӣта̄ ва̄ маччхакан̣т̣акакхаджджӯрипаттава̄йима̄ ва̄. сӯкара̄нам̣ антам̣ сӯкарантам̣. идха пана там̣садисам̣ вуччати. чатурассам̣ акатва̄ саджджитам̣ муддикака̄йабандханампи сан̇гахетва̄ ‘‘ека̄ раджджӯ’’ти вуттам̣. там̣ пана раджджукам̣ бандхантена екагун̣амева катва̄ бандхитум̣ ват̣т̣ати, маджджхе бхиндитва̄ дигун̣ам̣ катва̄ бандхитум̣ на ват̣т̣ати. дигун̣ам̣ пана акатва̄ сатава̄рампи пунаппунам̣ а̄виджджхитва̄ бандхитум̣ ват̣т̣ати, па̄ман̇гасан̣т̣ха̄нам̣ пана екампи на ват̣т̣ати. бахураджджуке екато катва̄ екена нирантарам̣ вет̣хетва̄ катам̣ ‘‘бахураджджука’’нти на ваттаббам̣, там̣ ват̣т̣ати. тадануломика̄ти тесам̣ пат̣т̣ика̄сӯкаранта̄нам̣ двиннам̣ две име йатха̄ккамамануломика̄.

237-8. пат̣т̣ика̄ кӣдисӣ ват̣т̣атӣти а̄ха ‘‘маччха̄’’тиа̄ди. пат̣т̣ика̄ маччхакан̣т̣акакхаджджӯрипатта̄ ва̄ мат̣т̣ха̄ ва̄ лаббха̄ти самбандхо. кан̣т̣ака-саддена патта-саддена ча тада̄ка̄ро вуччати, упача̄рато хи маччха̄нам̣ кан̣т̣ака̄ка̄ро ча кхаджджӯрӣнам̣ патта̄ка̄ро ча етисса̄ти сама̄со. мат̣т̣ха̄ти пакативӣта̄. т̣ӣка̄йам̣ пана ‘‘ете маччхакан̣т̣ака̄дайо мат̣т̣ха̄ вика̄рарахита̄ пат̣т̣ика̄ ча тадантогадха̄ти адхиппа̄йо’’ти вуттам̣. катхам̣ тесамантогадхата̄? йато та̄нийева пат̣т̣ика̄ на̄ма̄ти. татха̄ ча вуттам̣ ат̣т̣хакатха̄йам̣ ‘‘пакативӣта̄ ва̄ маччхакан̣т̣акава̄йима̄ ва̄ пат̣т̣ика̄ ват̣т̣атӣ’’ти (чӯл̣ава. ат̣т̣ха. 278). еттха пана маччхакан̣т̣акейева кхаджджӯрипаттам̣ павит̣т̣хам̣. чатассопи даса̄ лаббха̄ти самбандхо. чатассоти уккат̣т̣хапариччхедена вуттам̣, тасма̄ тато ӯна̄пи ват̣т̣анти. антети ка̄йабандханасса убхайанте дигун̣асуттакам̣ лаббханти самбандхо. гун̣о бандханабхӯтам̣ суттакам̣ гун̣асуттакам̣. ‘‘гун̣о пат̣алара̄сӣсу, а̄нисам̣се ча бандхане’’ти хи абхидха̄наппадӣпика̄. двиннам̣ гун̣асуттака̄нам̣ сама̄ха̄ро дигун̣асуттакам̣. там̣ даса̄мукхасса тхирабха̄ва̄йа кот̣т̣етум̣ ват̣т̣ати, на собханаттхам̣. тена̄ха ‘‘ма̄ла̄ди’’нтиа̄ди.

ма̄ла̄дим̣ каккат̣аччха̄дим̣ кун̃джараччха̄дин̃ча дассетва̄ гун̣асуттакакот̣т̣ита̄ пат̣т̣ика̄ на каппатӣти самбандхо. ‘‘ма̄ла̄ди’’нтиа̄дӣсу а̄ди-саддена та̄дисам̣ йам̣ кин̃чи вика̄рарӯпам̣ гайхати. каккат̣а̄нам̣ вийа аччхӣни, та̄ни а̄дӣни йасса̄ти сама̄со. татха̄ кун̃джараччха̄динти.

239. гхат̣аканти гхат̣ака̄ка̄рават̣т̣алекха̄рӯпам̣. макарамукха̄динти еттха макарамукхам̣ на̄ма макарамукхасан̣т̣ха̄нам̣. бинду пана а̄гамавасена вутто. а̄ди-саддена дед̣д̣убхасӣса̄дивика̄рарӯпам̣ йам̣ кин̃чи сан̇гайхати. даса̄мукхети даса̄нам̣ мукхабхӯте анте ета̄ни на каппантӣти самбандхо. видхе убханте гхат̣ака̄ лекха̄ ан̃н̃ам̣ читтакан̃ча на каппантӣти самбандхо. гхат̣ака̄ти гхат̣акато. лекха̄ти лекха̄йа. пан̃чамийа̄ лопо. видхети ка̄йабандханасса па̄санте даса̄мӯле тасса тхирабха̄ваттхам̣ каттаббе дантависа̄н̣а̄димайе видхе.

240. дед̣д̣убхаканти удакасаппасӣсасадисам̣. мураджанти на̄на̄ван̣н̣ехи суттехи мураджават̣т̣исан̣т̣ха̄нам̣ вет̣хетва̄ катам̣. т̣ӣка̄йам̣ пана ‘‘мураджанти бахураджджуке екато сан̇кад̣д̣хитва̄ ека̄йа раджджуйа̄ паливет̣хетва̄ катараджджӯ’’ти вуттам̣, там̣ ‘‘бахураджджуке екато катва̄’’тиа̄дина̄ хет̣т̣ха̄ вуттаат̣т̣хакатха̄вачанена вируджджхати. маддавӣн̣анти па̄ман̇гасан̣т̣ха̄нам̣. кала̄буканти бахураджджукам̣. тесам̣ ‘‘на каппатӣ’’ти имина̄ самбандхо. две маджджхима̄ти маджджхе бхава̄ мураджамаддавӣн̣асан̇кха̄та̄ две.

241. ган̣т̣хийо ча̄пӣти чӣварасса ган̣т̣хийо ча̄пи. таммайа̄ти техи вел̣уа̄дӣхи ниббатта̄. пасан̇гена панетам̣ вуттанти.

ка̄йабандхананиддесаван̣н̣ана̄ нит̣т̣хита̄.

суман̇галаппаса̄данийа̄ на̄ма т̣ӣка̄йа

пат̣хамабха̄н̣ава̄раван̣н̣ана̄ нит̣т̣хита̄.