11. ниссаггийаниддесаван̣н̣ана̄

116-7. рӯпийена арӯпийам̣ рӯпийан̃ча итарена рӯпийан̃ча париваттеййа̄ти самбандхо. таттха рӯпийена̄ти рӯпийасан̇кха̄тена ниссаггийаваттхуна̄. арӯпийанти арӯпийасан̇кха̄там̣ дуккат̣аваттхум̣ каппийаваттхун̃ча. итарена̄ти арӯпийена. ниссаггӣти ниссаджджанам̣ ниссагго, пуббабха̄ге каттаббасса винайакаммассетам̣ на̄мам̣. ниссагго асса аттхӣти ниссагги, ким̣ там̣? па̄читтийам̣. рӯпийасса мӯлаггахан̣е пана рӯпийаппат̣иггахан̣асиккха̄падена ниссаггийам̣ па̄читтийам̣.

ида̄ни рӯпийа̄дим̣ дассетум̣ ‘‘идха̄’’тиа̄ди а̄раддхам̣. таттха каха̄…пе… ма̄сакам̣ идха рӯпийанти самбандхо. таттха каха̄пан̣о на̄ма суван̣н̣амайо ва̄ раджатамайо ва̄ етарахи пакатикаха̄пан̣о ва̄. саджджхӯти раджатам̣. син̇гӣти суван̣н̣абхедо, татха̄пи четтха са̄ман̃н̃ена суван̣н̣амадхиппетам̣. воха̄рӯпагама̄саканти воха̄рам̣ кайавиккайам̣ упагаччхатӣти воха̄рӯпагам̣, тан̃ча там̣ ма̄сакан̃ча. там̣ пана самут̣т̣ха̄питарӯпан̃ча асамут̣т̣ха̄питарӯпан̃ча лохада̄руа̄димайам̣ вуччати. идха рӯпийанти имасмим̣ сиккха̄паде рӯпийам̣ на̄ма̄ти аттхо. ваттхамутта̄ди каппам̣ дуккат̣аваттхун̃ча итаранти йоджана̄. таттха ваттхан̃ча мутта̄ ча а̄ди йасса̄ти сама̄со. а̄ди-саддо паччекам̣ йоджетаббо ‘‘ваттха̄ди мутта̄дӣ’’ти. таттха пат̣хамена а̄ди-саддена каппа̄сасутта̄паран̣н̣а̄дикам̣ йам̣ кин̃чи каппийаваттхум̣, дутийена ман̣и сан̇кхо сила̄ пава̄л̣ам̣ лохитан̇ко маса̄рагаллам̣ саттадхан̃н̃а̄ни да̄сида̄сакхеттаваттхупуппха̄ра̄мапхала̄ра̄ма̄дайоти идам̣ дуккат̣аваттхум̣ сан̇ган̣ха̄ти. ваттха̄дикаппийаваттхум̣, мутта̄дидуккат̣аваттхун̃ча итарам̣ ан̃н̃ам̣ арӯпийам̣ на̄ма̄ти аттхо.

118. етта̄вата̄ рӯпийасам̣воха̄рам̣ дассетва̄ ида̄ни каппийабхан̣д̣е кайавиккайам̣ дассетума̄ха ‘‘има’’нтиа̄ди. таттха ‘‘имам̣ гахетва̄ имам̣ дехи, имам̣ кара, имам̣ а̄найа̄’’ти ва̄ ‘‘имам̣ бхутва̄ имам̣ дехи, имам̣ кара, имам̣ а̄найа̄’’ти ва̄ ‘‘имам̣ деми, имам̣ дехи, имам̣ кара, имам̣ а̄найа̄’’ти ва̄ кайавиккайе сама̄панне ниссаггӣти йоджана̄. таттха иманти тан̣д̣ула̄дим̣. бхутва̄ти одана̄дим̣ бхун̃джитва̄. имам̣ дехӣти етам̣ ваттха̄дикам̣ дехи. имам̣ кара̄ти етам̣ раджанапачана̄дим̣ карохи. имам̣ а̄найа̄ти етам̣ раджанакат̣т̣ха̄дим̣ а̄нехи. имам̣ демӣти етам̣ ваттха̄дикам̣ тава деми. сама̄паннети кате. тасма̄ каппийам̣ бхан̣д̣ам̣ париваттентена ан̃н̃а̄такехи саддхим̣ ‘‘имам̣ дехӣ’’ти вадато вин̃н̃атти, ‘‘имам̣ ган̣ха̄хӣ’’ти вадато саддха̄деййавинипа̄танам̣, ‘‘имина̄ имам̣ дехӣ’’ти вадато кайавиккайанти вутта̄ тиссо а̄паттийо. ма̄та̄питӯхи пана саддхим̣ кайавиккайаматтам̣ мочентена париваттетаббам̣. айан̃хи кайавиккайо т̣хапетва̄ пан̃часахадхаммике авасесехи гихипаббаджитехи на ват̣т̣ати. саче пана навакамма̄ни ка̄рети, ат̣т̣хакатха̄пама̄н̣ена па̄читтийаматтам̣ десетаббам̣.

119-120. ида̄ни парин̣а̄манавасена а̄паттибхедам̣ дассетум̣ ‘‘аттано’’тиа̄ди а̄раддхам̣. таттха̄йам̣ пин̣д̣аттхо – сан̇гхасса натам̣ ла̄бхам̣ аттано парин̣а̄меййа, ниссагги. ан̃н̃ато пуггаласса парин̣а̄меййа, па̄читти. ан̃н̃асса сан̇гхасса ва̄ четийасса ва̄ парин̣а̄меййа, дуккат̣ам̣. ан̃н̃асса пуггаласса ва̄ четийасса ва̄ натам̣ ла̄бхам̣ аттано ва̄ сан̇гхасса ва̄ ан̃н̃апуггаласса ва̄ ан̃н̃ачетийасса ва̄ парин̣а̄меййа, дуккат̣анти йоджана̄. таттха натанти ка̄йена ва̄ вачаса̄ ва̄ ниннам̣ катам̣. ла̄бханти лабхитаббам̣ чӣвара̄ди. ан̃н̃ато ан̃н̃асмим̣ пуггале ва̄ четийе ва̄, четийе пана дуккат̣ам̣. ан̃н̃асса̄ти четийа̄дино антамасо сунакхасса. ан̃н̃ато ва̄ти четийа̄димхи ва̄. сан̇гхасса̄ти пана идам̣ ка̄каккхигол̣акан̃а̄йена ‘‘натам̣ парин̣а̄меййа̄’’ти убхайаттха париваттати. ниссат̣т̣хам̣ сакасан̃н̃а̄йа на дадеййа ва̄, дуккат̣анти самбандхо. ан̃н̃атха̄ ан̃н̃ена пака̄рена, тхеййасан̃н̃а̄йа на дадеййа чети вуттам̣ хоти. итаранти ваттхувасена ан̃н̃ам̣ па̄ра̄джикам̣ тхуллаччайам̣ дуккат̣ан̃ча хотӣти аттхо.

ниссаггийаниддесаван̣н̣ана̄ нит̣т̣хита̄.