47. суддхиниддесаван̣н̣ана̄

455. десана̄ сам̣варо ет̣т̣хи, паччавеккхан̣а бхедатоти (па̄ра̄. ат̣т̣ха. 2.585; висуддхи. 1.19) десана̄суддхи сам̣варасуддхи парийет̣т̣хисуддхи паччавеккхан̣асуддхӣти евам̣ чатуббидха̄ суддхӣти аттхо. ида̄ни та̄хи суддхӣхи висуджджханаке дассетум̣ ‘‘па̄тимоккхасам̣варасаммата’’нтиа̄дима̄ха.

456. ‘‘пуна евам̣ на карисса’’нти читта̄дхит̣т̣ха̄насам̣вара̄ йасма̄ суджджхати индрийасам̣варо, тасма̄ индрийасам̣варо ‘‘сам̣варасуддхӣ’’ти вуттоти самбандхо.

457. паха̄йа̄несананти анесанам̣ паха̄йа дхаммена уппа̄дентасса паччайети па̄т̣хасесо.

458. ‘‘пат̣исан̇кха̄ йонисо чӣварам̣ пат̣исева̄ми…пе… уппанна̄нам̣ веййа̄ба̄дхика̄нам̣…пе… парамата̄йа̄’’ти (ма. ни. 1.23; а. ни. 6.58) ча евам̣ чатӯсупи паччайесу йатха̄вуттапаччавеккхан̣асуджджхана̄ти аттхо. еттха пана дувидхам̣ паччавеккхан̣ам̣ пат̣ила̄бхака̄ле ча парибхогака̄ле ча. пат̣ила̄бхака̄ле хи дха̄тувасена ва̄ пат̣иккӯлавасена ва̄ паччавеккхитва̄ т̣хапитачӣвара̄дӣни тато уттари парибхун̃джантасса анаваджджова парибхого, парибхогака̄лепи. суддхивиниччхайо.

суддхиниддесаван̣н̣ана̄ нит̣т̣хита̄.