37. уггаханиддесаван̣н̣ана̄

281. дасабхедампӣти саче кеначи хет̣т̣ха̄ дасситам̣ дасавидхам̣ ратанам̣ а̄нетва̄ ‘‘идам̣ сан̇гхасса ва̄ четийасса ва̄ навакаммасса ва̄ ан̃н̃апуггаласса ва̄ суттантикаган̣асса ва̄ даммӣ’’ти вутте ‘‘са̄дхӯ’’ти сампат̣иччхантасса дуккат̣ам̣ хотӣти аттхо.

282-3. тесу дасавидхесу ратанесӯти аттхо. двӣсӯти раджатаджа̄тарӯпесу. ган̣асан̇гхапуггале (па̄ра̄. ат̣т̣ха. 2.538-539) ана̄маситва̄ ‘‘идам̣ хиран̃н̃асуван̣н̣ам̣ четийасса дамми, навакаммасса даммӣ’’ти вутте на пат̣иккхипети аттхо. ким̣ ка̄таббанти че? там̣ дассетум̣ ‘‘ваде’’тиа̄ди вуттам̣. ‘‘име евам̣ вадантӣ’’ти каппийака̄ра̄нам̣ а̄чиккхитаббанти аттхо.

284. на кевалам̣ хиран̃н̃асуван̣н̣а̄дикамева, ан̃н̃ампи кхеттаваттха̄дикам̣ акаппийам̣ на сампат̣иччхитаббанти там̣ дассетум̣ ‘‘кхеттам̣ ваттху’’нтиа̄дима̄ха. да̄сапасуа̄дикам̣ да̄сапасва̄дикам̣. саче хи кочи ‘‘майхам̣ сассасампа̄дакам̣ маха̄тал̣а̄кам̣ аттхи, там̣ сан̇гхасса даммӣ’’ти вадати, тан̃че сан̇гхо сампат̣иччхати. пат̣иггахан̣епи парибхогепи а̄паттийева. евам̣ сесесупи.

каппийена камена ган̣хеййа̄ти самбандхо. ‘‘кхеттам̣ даммӣ’’ти вутте ‘‘на ват̣т̣атӣ’’ти пат̣иккхипитва̄ ‘‘ито чатта̄ро паччайе парибхун̃джатха̄’’ти ва̄ ‘‘чатупаччайапарибхогаттха̄йа даммӣ’’ти ва̄ вадати че, гахетаббам̣. ваттхумхипи есева найо. ‘‘тал̣а̄кам̣ даммӣ’’ти вутте пат̣иккхипитва̄ ‘‘чатта̄ро паччайе парибхун̃джатха̄’’ти ва̄ ‘‘сан̇гхо удакам̣ парибхун̃джиссати, бхан̣д̣акам̣ дховиссатӣ’’ти ва̄ а̄дина̄ найена вутте сампат̣иччхитаббам̣. ‘‘да̄сам̣ даммӣ’’ти вутте пат̣иккхипитва̄ ‘‘а̄ра̄микам̣, веййа̄ваччакарам̣, каппийака̄ракам̣ даммӣ’’ти вутте сампат̣иччхитаббам̣. ‘‘гомахим̣сааджел̣ака̄дайо даммӣ’’ти вутте пат̣иккхипитва̄ ‘‘пан̃чагорасапарибхогаттха̄йа̄’’ти вутте сампат̣иччхитаббам̣. едисам̣ гахан̣ам̣ сандха̄йа ‘‘пат̣иккхипитва̄ ган̣хеййа̄’’ти вуттам̣.

285-6. навама̄тикакеда̄ратал̣а̄какирийа̄ (па̄ра̄. ат̣т̣ха. 2.238-239) ча анаве пуббе каппийавоха̄рена пат̣иккхипитва̄ гахитатал̣а̄ке маттикуддхаран̣ан̃ча бхиннат̣т̣ха̄не па̄л̣ибандхо ча дуббалат̣т̣ха̄не а̄л̣ийа̄ тхирака̄ро ча анаве кеда̄ре пура̄н̣абха̄гато атирекабха̄гаггахан̣ан̃ча наве кеда̄ре апариччхиннабха̄ге ‘‘сассе детха еттаке’’ти каха̄пан̣ут̣т̣ха̄панан̃ча̄пӣти идам̣ саббам̣ бхиккхусса ка̄тум̣ на ват̣т̣ати. саче кароти, евама̄дикам̣ саббесампи акаппийанти аттхо.

287-9. ида̄ни там̣йева акаппийам̣ дассетум̣ ‘‘аватва̄’’тиа̄ди вуттам̣. тассаттхо (па̄ра̄. ат̣т̣ха. 2.238-239) – йо пана ‘‘каса, ваппа’’ ичча̄дикам̣ аватва̄ ‘‘еттика̄йа бхӯмийа̄ еттако бха̄го деййо’’ти бхӯмим̣ ва̄ патит̣т̣ха̄пети, ‘‘еттаке бхӯмибха̄ге сассам̣ катам̣, еттакам̣ ган̣хатха̄’’ти кассаке ваданте пама̄н̣аган̣ханаттхам̣ дан̣д̣араджджубхи минати, кхале т̣хатва̄ раккхан̣а̄дӣни кароти, тассева акаппийанти.

290. бхан̣д̣а̄га̄рикасӣсена питусантакампи саче пат̣иса̄меййа, па̄читтийанти аттхо.

291-2. питӯнанти ма̄та̄питӯнам̣. са̄т̣ака̄дикаппийам̣ ваттхум̣. ‘‘пат̣иса̄метва̄ дехӣ’’ти вуттети самбандхо. па̄тетва̄на гате йасма̄ аджджха̄ра̄масиккха̄падавасена (па̄чи. 505-506) палибодхо, тасма̄ гопитум̣ лаббханти аттхо.

293-4. сакам̣ ва̄сиа̄дипариккха̄ранти аттхо. идам̣ т̣ха̄нам̣ гуттанти дассетаббам̣. ‘‘еттха т̣хапетха̄’’ти пана на ваттаббам̣.

295. еттха ‘‘ан̃н̃о кочи на пависати, бхиккхӯхи ва̄ са̄ман̣ерехи ва̄ гахитам̣ бхависсатӣ’’ти сан̇кантӣти аттхо. ваттхумхӣти алан̇ка̄ра̄диваттхумхӣти аттхо. та̄дисети йа̄дисе ваттхумхи нат̣т̣хе а̄сан̇ка̄ хоти, та̄дисе ваттхумхи нат̣т̣хети самбандхо.

296. ида̄ни асан̇китаббат̣т̣ха̄нам̣ дассетум̣ ‘‘виха̄ра̄васатхассанто’’тиа̄дима̄ха. виха̄расса ча гхарасса ча̄ти аттхо. ратананти дасавидхам̣ ратанам̣. ратнасамматанти са̄т̣акавет̣хана̄дикам̣. гахетва̄на̄ти каппийака̄раке асати аттана̄пи гахетва̄на никкхипеййа̄ти аттхо. маггеран̃н̃епӣти маггепи аран̃н̃епи. та̄дисети ‘‘бхиккхӯхи гахитам̣ бхависсатӣ’’ти а̄сан̇китаббат̣т̣ха̄не. патирӯпам̣ карӣйатӣти магге ва̄ аран̃н̃е ва̄ та̄дисам̣ бхан̣д̣ам̣ пасситва̄ магга̄ оккамма нисӣдитаббам̣, са̄микесу а̄гатесу там̣ т̣ха̄нам̣ а̄чиккхитаббам̣. саче са̄мике на пассати, ратанасамматам̣ пам̣сукӯлам̣ гахетаббам̣. ратанан̃че хоти, тун̣хӣбхӯтена гантаббанти аттхо. айам̣ магга̄ран̃н̃акесу пат̣ипатти. виха̄ра̄васатха̄нам̣ пана анто та̄дисам̣ дисва̄ бхан̣д̣акам̣ мун̃читва̄ ‘‘еттха еттака̄ каха̄пан̣а̄’’тиа̄дина̄ найена рӯпена ва̄ лан̃чхана̄йа ва̄ пилотика̄йа ва̄ сан̃н̃а̄н̣ам̣ катва̄ никкхипитаббам̣, тато паккамантена патирӯпа̄нам̣ бхиккхӯнам̣ а̄чиккхитаббам̣. уггахавиниччхайо.

уггаханиддесаван̣н̣ана̄ нит̣т̣хита̄.