10. акаппийамам̣саниддесаван̣н̣ана̄

113. ида̄ни мам̣сесу пат̣ипаджджитабба̄ка̄рам̣ дассетум̣ ‘‘мам̣сесу ча акаппийа’’нти уддхат̣ам̣. акаппийамам̣самхи дассите каппийамам̣сам̣ дасситамева хоти па̄рисесанайена. урагасса ча̄ти еттха саббопи ураго на каппати.

114. етта̄вата̄ джа̄тивасена дасавидхампи акаппийамам̣сам̣ дассетва̄ ида̄ни каппийамам̣сесупи акаппийавидхим̣ дассетум̣ ‘‘уддиссакатамам̣сан̃ча, йан̃ча аппат̣ивеккхита’’нти вуттам̣. таттха пан̃часу сахадхаммикесу йасса кассачи йам̣ кин̃чи уддисса катам̣ уддиссакатам̣ на̄ма, там̣ пана джа̄нитва̄ парибхун̃джитум̣ саббесампи на ват̣т̣ати, аджа̄нанта̄нам̣ ана̄патти. маччхесупи есева найо. аппат̣ивеккхитанти анупапариккхитам̣, ана̄пуччхитанти аттхо. ‘‘на бхиккхаве аппат̣ивеккхитва̄ мам̣сам̣ парибхун̃джитаббам̣, йо парибхун̃джеййа, а̄патти дуккат̣асса̄’’ти (маха̄ва. 281) вуттам̣. маччхесу пана а̄пуччханакиччам̣ наттхи акаппийамаччха̄нам̣ наттхита̄йа̄ти ваданти. ида̄ни етесу а̄паттибхедам̣ дассетум̣ ‘‘тхуллаччайа’’нтиа̄дима̄ха. там̣ саббам̣ (кан̇кха̄. ат̣т̣ха. саннидхика̄ракасиккха̄падаван̣н̣ана̄) утта̄намева.

115. ида̄ни на кевалам̣ имесам̣ манусса̄дӣнам̣ мам̣самева акаппийам̣, ат̣т̣хиа̄дӣнипи акаппийа̄нӣти дассетум̣ ‘‘ат̣т̣хӣпӣ’’тиа̄ди вуттам̣. таттха (маха̄ва. ат̣т̣ха 281) ломампесанти ломампи есам̣ акаппийамам̣саваттхӯнанти аттхо. сачиттакам̣ ва̄ти етесу пана уддиссакатамева сачиттакам̣, сеса̄ ачиттака̄ти. акаппийамам̣савиниччхайо.

акаппийамам̣саниддесаван̣н̣ана̄ нит̣т̣хита̄.