9. дутийаупаккхат̣асиккха̄падаван̣н̣ана̄

дутийаупаккхат̣ена ким̣ пайоджананти че? наттхи пайоджанам̣, кевалам̣ ат̣т̣хуппаттивасена пана пан̃н̃аттам̣ бхиккхунийа̄ рахонисаджджасиккха̄падам̣ вийа. евам̣ санте сан̇гӣтика̄ракехи сан̇гӣтим̣ ана̄ропетаббам̣ бхавеййа вина̄пи тена тадаттхасиддхито, аниссаратта̄, ана̄ропетум̣ анун̃н̃а̄татта̄ ча. вуттан̃хетам̣ ‘‘а̄кан̇кхама̄но, а̄нанда, сан̇гхо…пе… самӯханеййа̄’’ти (дӣ. ни. 2.216; чӯл̣ава. 441). идам̣ саббамака̄ран̣ам̣. на хи буддха̄ аппайоджанам̣ вачанам̣ ниччха̄ренти, пагева сиккха̄падам̣. тенева̄ха ат̣т̣хакатха̄йам̣ ‘‘имина̄ва найена аттхо ведитаббо. идан̃хи пуримасса анупан̃н̃аттисадиса’’нтиа̄ди. анупан̃н̃атти ча ниппайоджанам̣ наттхи. там̣садисан̃четам̣, на ниппайоджананти дасситам̣ хоти. евам̣ санте ко панеттха аттхависесоти? тато а̄ха ‘‘кевалам̣ таттха екасса пӣл̣а̄ ката̄, идха двиннам̣, айаметтха висесо’’ти. имина̄ аттхависесена ко панан̃н̃о атирекаттхо дасситоти? пора̄н̣аган̣т̣хипаде та̄ва вуттам̣ ‘‘екасмимпи ваттхусмим̣ убхиннампи пӣл̣а̄ ка̄тум̣ на ват̣т̣атӣти айаматирекаттхо дассито’’ти. тенетам̣ дӣпети ‘‘на кевалам̣ пат̣иладдхачӣвараган̣ана̄йа ева а̄паттиган̣ана̄, пӣл̣итапуггаласан̇кха̄таваттхуган̣ана̄йапӣ’’ти.

хонти четтха –

‘‘ваттхуто ган̣ана̄йапи, сийа̄ а̄патти неката̄;

ити сандассанаттхан̃ча, дутийӯпаккхат̣ам̣ идха.

‘‘ка̄йасам̣саггасиккха̄йа, вибхан̇ге вийа кинтетам̣;

екиттхийа̄пи неката̄, а̄паттӣнам̣ пайогато’’ти. (ваджира. т̣ӣ. па̄ра̄джика 532);

апичетам̣ сиккха̄падам̣ там̣джа̄тикесу сиккха̄падесу саббесупи гахетаббавиниччхайасса дассанаппайоджананти ведитаббам̣. а̄ха ча –

‘‘ан̃н̃а̄тика̄йа бахута̄йа вимиссата̄йа;

а̄паттийа̄пи бахута̄ ча вимиссата̄ ча;

иччевама̄дивидхисамбхавадассанаттхам̣;

саттха̄ упаккхат̣амидам̣ дутийам̣ авоча̄’’ти. (ваджира. т̣ӣ. па̄ра̄джика 532);

тасса̄йам̣ сан̇кхепато адхиппа̄йапуббан̇гама̄ вича̄ран̣а̄ – пура̄н̣ачӣварам̣ екамева бхиккху бхиккхунӣхи двӣхи, бахӯхи ва̄ дхова̄пети, бхиккхуниган̣ана̄йа па̄читтийаган̣ана̄. татха̄ двиннам̣, бахӯнам̣ ва̄ са̄дха̄ран̣ам̣ екамева чӣварам̣ ан̃н̃атра па̄риваттака̄ пат̣игган̣ха̄ти, идха̄пи татха̄ двиннам̣, бахӯнам̣ ва̄ са̄дха̄ран̣амекам̣ вин̃н̃а̄пети, вин̃н̃аттапуггалаган̣ана̄йа а̄паттиган̣ана̄. татха̄ ан̃н̃есупи еварӯпесу сиккха̄падесу найо нетаббо. айам̣ та̄ва бахута̄йа найо.

вимиссата̄йа пана н̃а̄тика̄йа, ан̃н̃а̄тика̄йа ча екам̣ дхова̄пети, екато нит̣т̣ха̄пане екам̣ па̄читтийам̣. атха н̃а̄тика̄ пат̣хамам̣ тхокам̣ дховитва̄ т̣хита̄, пуна ан̃н̃а̄тика̄ судхотам̣ кароти, ниссаггийам̣ па̄читтийам̣. атха ан̃н̃а̄тика̄ пат̣хамам̣ дховати, паччха̄ н̃а̄тика̄ судхотам̣ кароти, ан̃н̃а̄тика̄йа пайогавасена бхиккхуно дуккат̣амева. ан̃н̃а̄тика̄йа, н̃а̄тика̄йа ча ан̃н̃а̄тикасан̃н̃ӣ, вематико, н̃а̄тикасан̃н̃ӣ ва̄ дхова̄пети, йатха̄вуттанайена ниссаггийадуккат̣а̄диа̄паттибхедаган̣ана̄ ведитабба̄. татха̄ ан̃н̃а̄тика̄йа, н̃а̄тика̄йа ча сантакам̣ чӣварам̣ убхохи екато диййама̄нам̣ пат̣игган̣ха̄ти, ниссаггийамева. атха ан̃н̃а̄тика̄йа ева хаттхато пат̣игган̣ха̄ти, ниссаггийамева. атха н̃а̄тика̄йа хаттхато пат̣игган̣ха̄ти, ана̄патти. атха убхосу ан̃н̃а̄тика̄дисан̃н̃ӣ, вуттанайенева ниссаггийадуккат̣а̄диа̄паттибхедаган̣ана̄ ведитабба̄. татха̄ ан̃н̃а̄тикавин̃н̃аттиа̄дӣсупи йатха̄самбхавам̣ найо нетаббо. айам̣ вимиссата̄йа найо.

а̄дисаддена пана анеке ан̃н̃а̄тика̄ вин̃н̃атта̄, вин̃н̃аттапуггалаган̣ана̄йа дуккат̣ам̣. еко дети, еко на дети, ниссаггийам̣. атха авин̃н̃атто дети, на нисаггийам̣. атха вин̃н̃атта̄вин̃н̃атта̄нам̣ са̄дха̄ран̣ам̣ вин̃н̃атто дети, ниссаггийам̣. убхо денти, ниссаггийамева. авин̃н̃атто дети, ниссаггийена ана̄патти. вин̃н̃аттасса вачанена авин̃н̃атто дети, ана̄патти ева. татха̄ упаккхат̣а̄дӣсупи йатха̄самбхавам̣ найо нетаббо.

етта̄вата̄ сан̇кхепато ан̃н̃а̄тика̄йа̄дига̄тха̄ вутта̄дхиппа̄йа̄ хоти. йам̣ панеттха бхиккхунийа̄ рахонисаджджасиккха̄падам̣ ниппайоджаната̄йа нидассанам̣ вуттам̣, тасса пайоджанависесо тасмим̣йева а̄вибхависсатӣти. евамева ан̃н̃аттхапи вачанена, висесаат̣т̣хуппаттивасена ча сиккха̄падесу н̃а̄таббам̣ висесаппайоджананти.

дутийаупаккхат̣асиккха̄падаван̣н̣ана̄ нит̣т̣хита̄.