3. дут̣т̣хуллава̄ча̄сиккха̄падаван̣н̣ана̄

‘‘када̄ те ма̄та̄ пасӣдиссатӣ’’ти а̄йа̄чанам̣ дут̣т̣хуллава̄ча̄йа сикха̄патталаккхан̣адассанаттхам̣ вуттам̣, на метхунупасам̣хитейева дут̣т̣хуллава̄ча̄ти дассанаттхам̣. ‘‘убхатобйан̃джанака̄сӣ’’ти вачанам̣ пана пурисанимиттена асан̇гха̄дисесаваттхуна̄ миссавачанам̣, пурисаубхатобйан̃джанакасса ча иттхинимиттам̣ пат̣иччханнам̣, итарам̣ па̄кат̣ам̣. йади тампи джанети, катхам̣ ‘анимитта̄сӣ’тиа̄дӣни пада̄ни на сан̇гха̄дисесам̣ джанентӣ’’ти еке, там̣ на йуттам̣ пурисасса̄пи нимитта̄дхивачанатта̄. ‘‘метхунупасам̣хита̄хи сан̇гха̄дисесо’’ти (па̄ра̄. 248) ма̄тика̄йам̣ лаккхан̣асса вуттатта̄ ча метхунупасам̣хита̄хи обха̄сане пат̣ивиджа̄нантийа̄ сан̇гха̄дисесо, аппат̣ивиджа̄нантийа̄ тхуллаччайам̣, итарехи обха̄сане пат̣ивиджа̄нантийа̄ тхуллаччайам̣, аппат̣ивиджа̄нантийа̄ дуккат̣анти еке, вича̄ретва̄ гахетаббам̣. еттха̄ха – ‘‘сикхаран̣ӣ’’тиа̄дӣхи аккосантасса пат̣игхачиттам̣ уппаджджати, касма̄ ‘‘тиведана’’нти аватва̄ ‘‘двиведана’’нти вуттанти? ра̄гавасена айам̣ а̄патти, на пат̣игхавасена. тасма̄ ра̄гавасенева паватто аккосо идха адхиппето. тасма̄ ‘‘двиведана’’нти вачанам̣ сувуттамева.

дут̣т̣хуллава̄ча̄сиккха̄падаван̣н̣ана̄ нит̣т̣хита̄.