1. сахадхаммикасиккха̄падаван̣н̣ана̄

сахадхаммикаваггасса пат̣хаме сахадхаммикам̣ вуччама̄ноти имассаттхо дуббачасиккха̄паде вутто. етасмим̣ сиккха̄падети етасмим̣ сиккха̄паде йам̣ вуттам̣, там̣ на та̄ва сиккхисса̄мӣти аттхо. па̄читтийанти еттха пана ана̄дарийабхайа̄ лесена евам̣ вадантасса ва̄ча̄йа ва̄ча̄йа па̄читтийам̣ ведитаббам̣. сиккхама̄нена̄ти ова̄дам̣ сираса̄ сампат̣иччхитва̄ сиккхитука̄менева хутва̄. ан̃н̃а̄таббанти а̄джа̄нитаббам̣. парипуччхитаббанти ‘‘имасса ко аттхо’’ти парипуччхитаббам̣. парипан̃хитаббанти чинтетаббам̣ тулайитаббам̣.

косамбийам̣ чханнаттхерам̣ а̄раббха евам̣ бхан̣анаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, анупасампанне тикадуккат̣ам̣, убхохипи ‘‘идам̣ на саллекха̄йа̄’’тиа̄дина̄ (па̄чи. 436) найенева аппан̃н̃аттена вуччама̄насса̄пи евам̣ вадато дуккат̣амева. ‘‘джа̄нисса̄ми сиккхисса̄мӣ’’ти бхан̣антасса, умматтака̄дӣнан̃ча ана̄патти. упасампаннасса пан̃н̃аттена вачанам̣, асиккхитука̄мата̄йа евам̣ вачананти има̄неттха две ан̇га̄ни. самут̣т̣ха̄на̄дӣни адинна̄да̄насадиса̄ни, идам̣ пана дуккхаведананти.

сахадхаммикасиккха̄падаван̣н̣ана̄ нит̣т̣хита̄.