3. уккот̣анасиккха̄падаван̣н̣ана̄

татийе йатха̄дхамманти йо йасса адхикаран̣асса вӯпасама̄йа дхаммо вутто, тенева дхаммена. нихата̄дхикаран̣анти нихатам̣ адхикаран̣ам̣, саматхаккхандхаке (чӯл̣ава. 185 а̄дайо) саттха̄ра̄ вуттадхамменева вӯпасамитанти аттхо, вӯпасамананайам̣ панасса адхикаран̣асаматхесу дассайисса̄ма. пунакамма̄йа уккот̣еййа̄ти тасса тасса бхиккхуно сантикам̣ гантва̄ ‘‘акатам̣ камма’’нтиа̄дӣни (па̄чи. 394) ваданто пунакаран̣аттха̄йа учча̄леййа. йатха̄т̣хитабха̄вена патит̣т̣ха̄тум̣ на дадеййа, тассевам̣ каронтасса па̄читтийам̣. йам̣ пана дхаммена адхикаран̣ам̣ нихатам̣, там̣ сунихатамева. саче виппакате камме пат̣иккосати, там̣ сан̃н̃а̄петва̄ ка̄таббам̣. итаратха̄ камман̃ча куппати, ка̄рака̄нан̃ча а̄патти.

са̄ваттхийам̣ чхаббаггийе бхиккхӯ а̄раббха уккот̣анаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, дхаммакамме вематикасса, адхаммакамме дхаммакаммасан̃н̃ино, вематикасса ва̄ дуккат̣ам̣. убхайесу адхаммакаммасан̃н̃исса, ‘‘адхаммена ва̄ ваггена ва̄ акамма̄рахасса ва̄ каммам̣ ката’’нти джа̄нантасса, умматтака̄дӣнан̃ча ана̄патти. йатха̄дхаммам̣ нихатабха̄во, джа̄нана̄, уккот̣ана̄ти има̄неттха тӣн̣и ан̇га̄ни. самут̣т̣ха̄на̄дӣни адинна̄да̄насадиса̄ни, идам̣ пана дуккхаведананти.

уккот̣анасиккха̄падаван̣н̣ана̄ нит̣т̣хита̄.