5. ачелакавагго

1. ачелакасиккха̄падаван̣н̣ана̄

ачелакаваггасса пат̣хаме етесам̣ ачелака̄дӣнам̣ ан̃н̃атиттхийа̄нам̣ йам̣кин̃чи а̄мисам̣ екаппайогена дентасса екам̣ па̄читтийам̣, аваччхиндитва̄ аваччхиндитва̄ дентасса пайоге пайоге па̄читтийам̣.

веса̄лийам̣ а̄йасмантам̣ а̄нандам̣ а̄раббха парибба̄джика̄йа две пӯве да̄наваттхусмим̣ пан̃н̃аттам̣, аса̄дха̄ран̣апан̃н̃атти, ана̄н̣аттикам̣, тикапа̄читтийам̣, удакадантапонам̣ дентасса, атиттхийе титтхийасан̃н̃исса, вематикасса ча дуккат̣ам̣. атиттхийе атиттхийасан̃н̃исса, анупасампаннена да̄пентасса, тесам̣ сантике бха̄джанам̣ никкхипитва̄ ‘‘идам̣ ган̣хатха̄’’ти бхан̣антасса, тесам̣ ва̄ никкхиттабха̄джане дентасса, ба̄хиралепам̣ дентасса, умматтака̄дӣнан̃ча ана̄патти. ан̃н̃атиттхийата̄, ананун̃н̃а̄тата̄, аджджхохаран̣ӣйам̣ аджджхохаран̣аттха̄йа сахаттха̄ аниккхиттабха̄джане да̄нанти има̄неттха тӣн̣и ан̇га̄ни. самут̣т̣ха̄на̄дӣни ел̣акаломасадиса̄нӣти.

ачелакасиккха̄падаван̣н̣ана̄ нит̣т̣хита̄.

2. уййоджанасиккха̄падаван̣н̣ана̄

дутийе да̄петва̄ ва̄ ада̄петва̄ ва̄ти йам̣кин̃чи а̄мисам̣ да̄петва̄ ва̄ на да̄петва̄ ва̄. уййоджеййа̄ти ма̄туга̄мена саддхим̣ хасанакӣл̣анарахонисаджджа̄дӣни каттука̄мо ‘гаччха̄’тиа̄дӣни ватва̄ уййоджеййа. етадева̄ти етам̣ ана̄ча̄рамева паччайам̣ каритва̄, на ан̃н̃ам̣ патирӯпам̣ ка̄ран̣ам̣. па̄читтийанти уййоджанаматте та̄ва дуккат̣ам̣, йада̄ панасса со дассанӯпача̄рам̣ ва̄ саванӯпача̄рам̣ ва̄ екена па̄дена виджахати, апарам̣ дуккат̣ам̣, дутийена виджахите па̄читтийам̣. еттха ча дассанӯпача̄расса аджджхока̄се т̣хатва̄ два̄дасахаттхаппама̄н̣ам̣, татха̄ саванӯпача̄расса. саче пана антара̄ кут̣т̣адва̄рапа̄ка̄ра̄дайо хонти, техи антаритабха̄войева упача̄ра̄тиккамо.

са̄ваттхийам̣ упанандам̣ а̄раббха уййоджанаваттхусмим̣ пан̃н̃аттам̣, са̄дха̄ран̣апан̃н̃атти, уййоджана̄н̣аттика̄йа са̄н̣аттикам̣, тикапа̄читтийам̣, анупасампанне тикадуккат̣ам̣, убхиннампи калиса̄сана̄ропане дуккат̣амева, ‘‘убхо екато на йа̄песса̄ма̄’’ти евама̄дӣхи патирӯпака̄ран̣ехи уййоджентасса, умматтака̄дӣнан̃ча ана̄патти. ана̄ча̄рам̣ а̄чаритука̄мата̄, тадаттхамева упасампаннасса уййоджанам̣, евам̣ уййоджитасса упача̄ра̄тиккамоти има̄неттха тӣн̣и ан̇га̄ни. самут̣т̣ха̄на̄дӣни адинна̄да̄насадиса̄нӣти.

уййоджанасиккха̄падаван̣н̣ана̄ нит̣т̣хита̄.

3. сабходжанасиккха̄падаван̣н̣ана̄

татийе саха убхохи джанехӣти сабходжанам̣, тасмим̣ сабходжане. атха ва̄ сабходжанети сабхоге, ра̄гапарийут̣т̣хитапурисасса хи иттхӣ бхого, иттхийа̄ ча пурисо, теневасса падабха̄джане ‘‘иттхӣ чева хоти, пурисо ча̄’’тиа̄ди (па̄чи. 281) вуттам̣. анупакхаджджа нисаджджам̣ каппеййа̄ти анупависитва̄ нисӣдеййа, йам̣ тасмим̣ куле сайанигхарам̣, тасса маха̄чатусса̄ла̄дӣсу катасса махаллакасса пит̣т̣хасан̇гха̄т̣ато хаттхапа̄сам̣ виджахитва̄ антосайанасса а̄санне т̣ха̄не, кхуддакасса ва̄ вемаджджхам̣ атиккамитва̄ нисӣдеййа̄ти аттхо, евам̣ нисиннасса па̄читтийам̣.

са̄ваттхийам̣ упанандам̣ а̄раббха анупакхаджджа нисаджджанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, асайанигхаре сайанигхарасан̃н̃ино, вематикасса ва̄ дуккат̣ам̣. насайанигхарасан̃н̃исса, вутталаккхан̣ам̣ падесам̣ анатиккамитва̄ нисиннасса, бхиккхусмим̣ дутийаке сати, убхосу никкхантесу ва̄, вӣтара̄гесу ва̄ нисӣдантасса, умматтака̄дӣнан̃ча ана̄патти. авӣтара̄гаджа̄йампатика̄нам̣ саннихитата̄, сайанигхарата̄, дутийасса бхиккхуно абха̄во, анупакхаджджа нисӣдананти има̄неттха чатта̄ри ан̇га̄ни. самут̣т̣ха̄на̄дӣни пат̣хамапа̄ра̄джикасадиса̄нӣти.

сабходжанасиккха̄падаван̣н̣ана̄ нит̣т̣хита̄.

4-5. рахопат̣иччханна-рахонисаджджасиккха̄падаван̣н̣ана̄

чатуттхапан̃чама̄ни са̄ваттхийам̣ упанандам̣ а̄раббха пат̣иччханна̄сане ча, рахо ча нисаджджанаваттхусмим̣ пан̃н̃атта̄ни, са̄дха̄ран̣апан̃н̃аттийо, етесампи самут̣т̣ха̄на̄дӣни пат̣хамапа̄ра̄джикасадиса̄нева. сесо катха̄найо анийатадвайе вуттанайенева ведитаббо.

рахопат̣иччханна-рахонисаджджасиккха̄падаван̣н̣ана̄ нит̣т̣хита̄.

6. ча̄риттасиккха̄падаван̣н̣ана̄

чхат̣т̣хе нимантитоти пан̃чаннам̣ бходжана̄нам̣ ан̃н̃атарена нимантито. сабхатто сама̄ноти тенева нимантанабхаттена сабхатто сама̄но. сантам̣ бхиккхум̣ ана̄пуччха̄ти антоупача̄расӣма̄йа дассанӯпача̄ре бхиккхум̣ дисва̄ йам̣ сакка̄ хоти пакативачанена а̄пуччхитум̣, та̄дисам̣ ‘‘ахам̣ иттханна̄масса гхарам̣ гаччха̄мӣ’’ти ва̄ ‘‘ча̄риттам̣ а̄паджджа̄мӣ’’ти ва̄ ӣдисена вачанена ана̄пуччхитва̄. пуребхаттам̣ ва̄ паччха̄бхаттам̣ ва̄ти йена бхаттена нимантито, тасмим̣ бхутте ва̄ абхутте ва̄. кулесу ча̄риттам̣ а̄паджджеййа̄ти йасмим̣ куле нимантито, тато ан̃н̃а̄ни кула̄ни пависеййа. ан̃н̃атра самайа̄ па̄читтийанти саче со бхиккху вутталаккхан̣ам̣ дувидхампи самайам̣ т̣хапетва̄ авӣтиватте маджджханхике ан̃н̃ам̣ кулам̣ пависати, атхасса гхарӯпача̄роккамане дуккат̣ам̣, пат̣хамапа̄дена умма̄рам̣ атиккамантасса апарампи дуккат̣ам̣, дутийапа̄дена атиккаме па̄читтийам̣.

ра̄джагахе упанандам̣ а̄раббха ча̄ритта̄паджджанаваттхусмим̣ пан̃н̃аттам̣, ‘‘сантам̣ бхиккхум̣, ана̄пуччха̄, пуребхаттам̣ паччха̄бхаттам̣, ан̃н̃атра самайа̄’’ти айаметтха чатуббидха̄ анупан̃н̃атти, са̄дха̄ран̣апан̃н̃атти, ана̄н̣аттикам̣, тикапа̄читтийам̣, анимантите нимантитасан̃н̃исса, вематикасса ва̄ дуккат̣ам̣. тасмим̣ анимантитасан̃н̃исса, самайе сантам̣ бхиккхум̣ а̄пуччхитва̄, асантам̣ бхиккхум̣ ана̄пуччхитва̄ пависато, ан̃н̃асса гхарена ва̄ гхарӯпача̄рена ва̄ магго хоти, тена гаччхато, антара̄ра̄мабхиккхунупассайатиттхийасеййапат̣иккаманабхаттийагхара̄ни гаччхато, а̄пада̄су, умматтака̄дӣнан̃ча ана̄патти. пан̃чаннам̣ бходжана̄нам̣ ан̃н̃атарена нимантанаса̄дийанам̣, сантам̣ бхиккхум̣ ана̄пуччхана̄, бхаттийагхарато ан̃н̃агхараппависанам̣, маджджханхика̄натиккамо, самайасса ва̄ а̄пада̄нам̣ ва̄ абха̄воти има̄неттха пан̃ча ан̇га̄ни. самут̣т̣ха̄на̄дӣни пат̣хамакатхинасадиса̄нева, идам̣ пана кирийа̄кирийанти.

ча̄риттасиккха̄падаван̣н̣ана̄ нит̣т̣хита̄.

7. маха̄на̄масиккха̄падаван̣н̣ана̄

саттаме чатума̄саппаччайапава̄ран̣а̄ти чатта̄ро ма̄се гила̄наппаччайапава̄ран̣а̄, саббан̃четам̣ ваттхувасена вуттам̣. айам̣ панеттха аттхо – чатума̄сапава̄ран̣а̄ ва̄ хоту, пунапава̄ран̣а̄ ва̄, ниччапава̄ран̣а̄ ва̄, сабба̄пи са̄дитабба̄, ‘‘ида̄ни мама рого наттхӣ’’ти на пат̣иккхипитабба̄, ‘‘роге пана сати вин̃н̃а̄песса̄мӣ’’ти адхива̄сетабба̄ти. тато че уттари са̄дийеййа̄ти еттха саче таттха раттӣхи ва̄ бхесаджджехи ва̄ париччхедо като хоти ‘‘еттака̄йева раттийо, еттака̄ни ва̄ бхесаджджа̄ни вин̃н̃а̄петабба̄нӣ’’ти, атха тато раттипарийантато ва̄ бхесаджджапарийантато ва̄ уттари, на бхесаджджакаран̣ӣйена ва̄ бхесаджджам̣, ан̃н̃абхесаджджакаран̣ӣйена ва̄ ан̃н̃ам̣ бхесаджджам̣ вин̃н̃а̄пентасса па̄читтийам̣.

саккесу чхаббаггийе а̄раббха бхесаджджавин̃н̃а̄панаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, нататуттари татуттарисан̃н̃ино, вематикасса ва̄ дуккат̣ам̣. нататуттари нататуттарисан̃н̃исса, йехи бхесаджджехи пава̄рито, тато ан̃н̃ехи ва̄ адхикатарехи ва̄ аттхе сати, йа̄су ча раттӣсу пава̄рито, та̄ атиккамитва̄пи аттхе сати йатха̄бхӯтам̣ а̄чиккхитва̄ вин̃н̃а̄пентасса, йе ча н̃а̄таке ва̄ пуггаликаппава̄ран̣а̄йа пава̄рите ва̄ апарийантапава̄ран̣а̄йа ва̄ пава̄рите, ан̃н̃асса ва̄ аттха̄йа, аттано ва̄ дханена вин̃н̃а̄пенти, тесам̣, умматтака̄дӣнан̃ча ана̄патти. сан̇гхапава̄ран̣ата̄, тато бхесаджджавин̃н̃атти, агила̄ната̄, парийанта̄тиккамоти има̄неттха чатта̄ри ан̇га̄ни. самут̣т̣ха̄на̄дӣни сан̃чариттасадиса̄нӣти.

маха̄на̄масиккха̄падаван̣н̣ана̄ нит̣т̣хита̄.

8. уййуттасена̄сиккха̄падаван̣н̣ана̄

ат̣т̣хаме уййуттанти катауййогам̣, га̄мато никкхантанти аттхо. сенанти чатуран̇гиним̣. ан̃н̃атра татха̄рӯпаппаччайа̄ти татха̄рӯпе ка̄ран̣е асати кевалам̣ сенам̣ дассанаттха̄йа гаччхато паде паде дуккат̣ам̣, дассанӯпача̄ре т̣хатва̄ пассато па̄читтийам̣. дассанӯпача̄ро на̄ма йаттха т̣хито пассати, там̣ пана виджахитва̄ пунаппунам̣ пассато пайоге пайоге па̄читтийам̣.

са̄ваттхийам̣ чхаббаггийе а̄раббха сена̄дассанаваттхусмим̣ пан̃н̃аттам̣, ‘‘ан̃н̃атра татха̄рӯпаппаччайа̄’’ти айаметтха анупан̃н̃атти, са̄дха̄ран̣апан̃н̃атти, ана̄н̣аттикам̣, тикапа̄читтийам̣, хаттхиа̄дӣсу екамекам̣ дассана̄йа гамане вуттанайенева дуккат̣ам̣, татха̄ ануййутте уййуттасан̃н̃ино, вематикасса ча дуккат̣ам̣. ануййуттасан̃н̃ино пана, а̄ра̄ме т̣хатва̄ аттано т̣хитока̄сам̣ а̄гатам̣, пат̣ипатхам̣ а̄гаччхантан̃ча пассато, татха̄рӯпаппаччайе, а̄пада̄су, умматтака̄дӣнан̃ча ана̄патти. уййуттасенам̣ дассанаттха̄йа гаманам̣, анун̃н̃а̄тока̄сато ан̃н̃атра дассанам̣, татха̄рӯпаппаччайасса а̄пада̄йа ва̄ абха̄воти има̄неттха чатта̄ри ан̇га̄ни. самут̣т̣ха̄на̄дӣни ел̣акаломасадиса̄ни, идам̣ пана локаваджджам̣, акусалачиттам̣, тиведананти.

уййуттасена̄сиккха̄падаван̣н̣ана̄ нит̣т̣хита̄.

9. сена̄ва̄сасиккха̄падаван̣н̣ана̄

наваме тато че уттарӣти тираттато уттари чатуттхадивасе аттхан̇гате сӯрийе сена̄йа тит̣т̣хату ва̄ нисӣдату ва̄ сайату ва̄, сачепи а̄ка̄се иддхийа̄ кан̃чи ирийа̄патхам̣ каппети, па̄читтийамева.

са̄ваттхийам̣ чхаббаггийе а̄раббха атирекатираттам̣ сена̄йа васанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, ӯнакатиратте атирекасан̃н̃ино, вематикасса ва̄ дуккат̣ам̣. ӯнакасан̃н̃исса, татийа̄йа раттийа̄ пура̄рун̣а̄ никкхамитва̄ пуна васато, гила̄насса ва̄ гила̄накаран̣ӣйена ва̄ васато, пат̣исена̄руддха̄йа сена̄йа, кеначи палибуддхасса, а̄пада̄су, умматтака̄дӣнан̃ча ана̄патти. тиратта̄тиккамо, сена̄йа сӯрийасса аттхан̇гамо, гила̄ната̄дӣнам̣ абха̄воти има̄неттха тӣн̣и ан̇га̄ни. самут̣т̣ха̄на̄дӣни ел̣акаломасадиса̄нева̄ти.

сена̄ва̄сасиккха̄падаван̣н̣ана̄ нит̣т̣хита̄.

10. уййодхикасиккха̄падаван̣н̣ана̄

дасаме уггантва̄ уггантва̄ еттха йуджджхантӣти уййодхикам̣, сампаха̄рат̣т̣ха̄нассетам̣ на̄мам̣. баласса аггам̣ джа̄нанти еттха̄ти балаггам̣, балаган̣анат̣т̣ха̄нанти аттхо. сена̄йа вийӯхам̣ сена̄бйӯхам̣, сена̄нивесассетам̣ на̄мам̣. анӣкасса дассанам̣ анӣкадассанам̣. анӣкам̣ на̄ма ‘‘два̄дасапурисо хаттхӣ, типурисо ассо, чатуппурисо ратхо’’тиимина̄ (па̄чи. 314) лаккхан̣ена тайо хаттхӣ паччхимакам̣ хаттха̄нӣкам̣, асса̄нӣкаратха̄нӣкесупи есева найо. чатта̄ро пана а̄вудхахаттха̄ пуриса̄ паччхимакам̣ патта̄нӣкам̣. етесу йам̣кин̃чи дассана̄йа гаччхато паде паде дуккат̣ам̣, дассанӯпача̄ре т̣хатва̄ пассато па̄читтийам̣, упача̄рам̣ пана виджахитва̄ пунаппунам̣ пассато пайоге пайоге па̄читтийам̣. сесам̣ уййуттасена̄сиккха̄паде вуттанайенева ведитаббам̣, а̄паттибхедо панеттха наттхева̄ти.

уййодхикасиккха̄падаван̣н̣ана̄ нит̣т̣хита̄.

ачелакавагго пан̃чамо.