9. пан̣ӣтабходжанасиккха̄падаван̣н̣ана̄

наваме пан̣ӣтабходжана̄нӣти пан̣ӣтасам̣сат̣т̣ха̄ни саттадхан̃н̃аниббатта̄ни бходжана̄ни. йатха̄ хи а̄джан̃н̃айутто ратхо ‘а̄джан̃н̃аратхо’ти вуччати, евамидха̄пи пан̣ӣтасам̣сат̣т̣ха̄ни бходжана̄ни пан̣ӣтабходжана̄нӣти. йехи пана пан̣ӣтехи сам̣сат̣т̣ха̄ни, та̄ни ‘пан̣ӣтабходжана̄нӣ’ти вуччанти, тесам̣ пабхедадассанаттхам̣ сеййатхидам̣ саппи наванӣтантиа̄дима̄ха, таттха саппиа̄дӣни бхесаджджасиккха̄паде (кан̇кха̄. ат̣т̣ха. бхесаджджасиккха̄падаван̣н̣ана̄) вутталаккхан̣енева ведитабба̄ни. маччха̄дӣсу пана саббопи ‘одако’ти (па̄чи. 260) вутталаккхан̣о маччхо маччхойева. йесам̣ пана мам̣сам̣ каппати, тесам̣ мам̣сан̃ча кхӣрададхӣни ча идха̄дхиппета̄ни. еварӯпа̄ни пан̣ӣтабходжана̄нӣти йа̄ни етехи саппиа̄дӣхи сам̣сат̣т̣хатта̄ ‘пан̣ӣтабходжана̄нӣ’ти вуччанти, татха̄рӯпа̄ни пан̣ӣтабходжана̄ни. агила̄ноти йасса техи вина̄пи пха̄су хоти. аттано аттха̄йа вин̃н̃а̄петва̄ти еттха пана йо агила̄но суддха̄ни саппиа̄дӣни бхесаджджаттха̄йа вин̃н̃а̄пети, со маха̄на̄масиккха̄падена (па̄чи. 303) ка̄ретаббо, маччха̄дӣни чатта̄ри вин̃н̃а̄пенто сӯподанавин̃н̃аттийа̄ (па̄чи. 612-613) ка̄ретаббо, саппиа̄дӣхи сам̣сат̣т̣хабходжана̄ни вин̃н̃а̄пенто имина̄ ка̄ретаббо. татра̄йам̣ виниччхайо – ‘‘саппина̄ бхаттам̣ дехи, саппим̣ а̄киритва̄ дехи, саппимиссакам̣ катва̄ дехи, саха саппина̄ дехи, саппин̃ча бхаттан̃ча дехӣ’’ти евам̣ вин̃н̃а̄пентасса та̄ва вин̃н̃аттийа̄ дуккат̣ам̣, пат̣иггахан̣е дуккат̣ам̣, аджджхохаран̣е аджджхохаран̣е па̄читтийам̣. ‘‘саппибхаттам̣ дехӣ’’ти вутте пана йасма̄ са̄либхаттам̣ вийа саппибхаттам̣ на̄ма наттхи, тасма̄ сӯподанавин̃н̃аттийа̄ дуккат̣амева хоти. саче пана ‘‘саппина̄ бхаттам̣ дехӣ’’ти вутте бхаттам̣ датва̄ ‘‘саппим̣ катва̄ бхун̃джа̄хӣ’’ти наванӣтакхӣра̄дӣни ва̄ каппийабхан̣д̣ам̣ ва̄ дети ‘‘имина̄ саппим̣ гахетва̄ бхун̃джа̄хӣ’’ти, йатха̄ваттхукамева. ‘‘госаппина̄ бхаттам̣ дехӣ’’ти вутте пана госаппим̣ ва̄ дету, тасмим̣ асати пуриманайена наванӣта̄дӣни ва̄, га̄вим̣йева ва̄ дету ‘‘ито саппина̄ бхун̃джа̄хӣ’’ти, йатха̄ваттхукамева. саче пана ‘‘госаппина̄ дехӣ’’ти йа̄чито аджика̄саппиа̄дӣхи дети, висан̇кетам̣. еван̃хи сати ан̃н̃ам̣ йа̄читена ан̃н̃ам̣ диннам̣ на̄ма хоти, тасма̄ ана̄патти, еса найо ‘‘аджика̄саппина̄ дехӣ’’тиа̄дӣсупи. ‘‘каппийасаппина̄ дехӣ’’ти вутте акаппийасаппина̄ дети, висан̇кетамева. ‘‘акаппийасаппина̄ дехӣ’’ти вутте акаппийасаппина̄ва дети, пат̣иггахан̣епи парибхогепи дуккат̣амева. имина̄ найена саббападесу виниччхайо ведитаббо. саче пана саббехипи саппиа̄дӣхи екат̣т̣ха̄не ва̄ на̄на̄т̣т̣ха̄не ва̄ вин̃н̃а̄петва̄ пат̣иладдхам̣ екато самбхиннарасам̣ катва̄ тато кусаггена екабиндумпи аджджхохарати, нава па̄читтийа̄ни.

са̄ваттхийам̣ чхаббаггийе бхиккхӯ а̄раббха пан̣ӣтабходжанавин̃н̃аттиваттхусмим̣ пан̃н̃аттам̣, ‘‘агила̄но’’ти айаметтха анупан̃н̃атти, аса̄дха̄ран̣апан̃н̃атти, ана̄н̣аттикам̣, тикапа̄читтийам̣, гила̄насса агила̄насан̃н̃ино, вематикасса ва̄ дуккат̣ам̣. гила̄насан̃н̃исса, гила̄нака̄ле вин̃н̃а̄петва̄ агила̄насса бхун̃джато, гила̄насса сесаке, н̃а̄такаппава̄ритат̣т̣ха̄нато, ан̃н̃ассаттха̄йа вин̃н̃атте, аттано дханена гахите, умматтака̄дӣнан̃ча ана̄патти. пан̣ӣтабходжаната̄, агила̄ната̄, катавин̃н̃аттийа̄ пат̣ила̄бхо, аджджхохаран̣анти има̄неттха чатта̄ри ан̇га̄ни. аддха̄насамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣, вачӣкаммам̣, тичиттам̣, тиведананти.

пан̣ӣтабходжанасиккха̄падаван̣н̣ана̄ нит̣т̣хита̄.