6. анупакхаджджасиккха̄падаван̣н̣ана̄

чхат̣т̣хе джа̄нанти ‘‘анут̣т̣ха̄панӣйо айа’’нти джа̄нанто, теневасса падабха̄джане ‘‘вуд̣д̣хо’ти джа̄на̄ти, ‘гила̄но’ти джа̄на̄ти, ‘сан̇гхена динно’ти джа̄на̄тӣ’’ти (па̄чи. 121) вуттам̣. вуд̣д̣хо хи аттано вуд̣д̣хата̄йа анут̣т̣ха̄панӣйо, гила̄но гила̄ната̄йа, сан̇гхо пана бхан̣д̣а̄га̄рикасса ва̄ дхаммакатхикавинайадхараган̣ава̄чака̄чарийа̄нам̣ ва̄ бахӯпака̄ратам̣ гун̣ависит̣т̣хатан̃ча саллаккхетва̄ дхувава̄саттха̄йа виха̄рам̣ саллаккхетва̄ самманнитва̄ дети, тасма̄ йасса сан̇гхена динно, сопи анут̣т̣ха̄панӣйо. пуббупагатанти пуббам̣ упагатам̣. анупакхаджджа̄ти ман̃чапӣт̣ха̄нам̣ ва̄ тасса ва̄ бхиккхуно пависантасса ва̄ никкхамантасса ва̄ упача̄рам̣ анупависитва̄. таттха ман̃чапӣт̣ха̄нам̣ та̄ва махаллаке виха̄ре саманта̄ дийад̣д̣хо хаттхо упача̄ро, кхуддаке йато пахоти, тато дийад̣д̣хо хаттхо, тасса пана пависантасса па̄дадхованапа̄са̄н̣ато йа̄ва ман̃чапӣт̣хам̣, никкхамантасса ман̃чапӣт̣хато йа̄ва пасса̄ват̣т̣ха̄нам̣, та̄ва упача̄ро. сеййам̣ каппеййа̄ти тасса самба̄дхам̣ каттука̄мата̄йа тасмим̣ упача̄ре дасасу сеййа̄су екампи сантхарантасса ва̄ сантхара̄пентасса ва̄ дуккат̣ам̣, таттха нисӣдантасса ва̄ нипаджджантасса ва̄ па̄читтийам̣, двепи каронтасса две па̄читтийа̄ни, пунаппунам̣ каронтасса пайогаган̣ана̄йа па̄читтийам̣.

са̄ваттхийам̣ чхаббаггийе бхиккхӯ а̄раббха анупакхаджджа сеййакаппанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, пуггалике тикадуккат̣ам̣, вуттӯпача̄рато ва̄ бахи, упат̣т̣ха̄наса̄ла̄дике ва̄, виха̄расса упача̄ре ва̄, сантхаран̣асантхара̄панесупи нисаджджасайанесупи дуккат̣амева. аттано ва̄, висса̄сикасса ва̄ сантаке пана виха̄ре сантхарантасса, йо ча гила̄но ва̄ сӣтун̣хапӣл̣ито ва̄ пависати, тасса ча, а̄пада̄су ча, умматтака̄дӣнан̃ча ана̄патти. сан̇гхикавиха̄рата̄, анут̣т̣ха̄панӣйабха̄ваджа̄нанам̣, самба̄дхетука̄мата̄, упача̄ре нисӣданам̣ ва̄ нипаджджанам̣ ва̄ти има̄неттха чатта̄ри ан̇га̄ни. самут̣т̣ха̄на̄дӣни пат̣хамапа̄ра̄джикасадиса̄нева, идам̣ пана дуккхаведанамева̄ти.

анупакхаджджасиккха̄падаван̣н̣ана̄ нит̣т̣хита̄.