4. пат̣хамасена̄санасиккха̄падаван̣н̣ана̄

чатуттхе сан̇гхиканти сан̇гхасса сантакам̣. ман̃ча̄дӣсу йокочи ман̃часан̇кхепена като саббопи ман̃чойева, пӣт̣хепи есева найо. йена кеначи пана чол̣ена ва̄ каппийачаммена ва̄ чхавим̣ катва̄ т̣хапетва̄ мануссаломам̣ та̄лӣсапаттан̃ча йехи кехичи ломапан̣н̣атин̣ава̄качол̣ехи пӯретва̄ катасена̄санам̣ бхисӣти вуччати. таттха нисӣдитумпи нипаджджитумпи ват̣т̣ати, пама̄н̣апариччхедопи четтха наттхи. коччхам̣ пана ва̄каусӣрамун̃джапаббаджа̄дӣнам̣ ан̃н̃атарамайам̣ анто сам̣веллитва̄ баддхам̣ хет̣т̣ха̄ ча упари ча виттхатам̣ пан̣авасан̣т̣ха̄нам̣ маджджхе сӣхачамма̄дипариккхиттам̣ хоти, акаппийачаммам̣ на̄меттха наттхи. сена̄санан̃хи сован̣н̣амайампи ват̣т̣ати. аджджхока̄сети еттха йе авассикасан̇кета̄ васса̄нама̄са̄ти евам̣ асан̃н̃ита̄ ат̣т̣ха ма̄са̄, те т̣хапетва̄ итаресу чатӯсу ма̄сесу сачепи дево на вассати. татха̄пи пакатиаджджхока̄се ча овассакаман̣д̣апе ча сантхаритум̣ на ват̣т̣ати. йаттха пана хеманте вассати, таттха апарепи чатта̄ро ма̄се на ват̣т̣ати. гимхе пана саббаттха вигатавала̄хакам̣ висуддхам̣ набхам̣ хоти, тасма̄ тада̄ кеначидева каран̣ӣйена гаччхати, ват̣т̣ати. ка̄ка̄дӣнам̣ нибаддхава̄саруккхамӯле пана када̄чипи на ват̣т̣ати. ити йаттха ча йада̄ ча сантхаритум̣ на ват̣т̣ати, там̣ саббамидха аджджхока̄сасан̇кхамева гатанти ведитаббам̣.

сантхаритва̄ти татха̄рӯпе т̣ха̄не аттано ва̄ парасса ва̄ аттха̄йа сантхаритва̄. ан̃н̃ассаттха̄йа сантхатампи хи йа̄ва со таттха на нисӣдати, ‘гаччха тва’нти ва̄ на бхан̣ати, та̄ва сантха̄ракассева бха̄ро. сантхара̄петва̄ти анупасампаннена сантхара̄петва̄. етадева хи тасса палибодхо хоти, упасампаннена сантхатам̣ сантха̄ракассева бха̄ро, тан̃ча кхо йа̄ва а̄н̣а̄пако таттха на нисӣдати, ‘гаччха тва’нти ва̄ на бхан̣ати. йасмин̃хи аттана̄ сантхара̄пите ва̄ пакатисантхате ва̄ упасампанно нисӣдати, саббам̣ там̣ нисиннассева бха̄ро, тасма̄ сантхара̄питантвева сан̇кхам̣ гаччхати. там̣ паккаманто нева уддхареййа, на уддхара̄пеййа̄ти аттана̄ ва̄ уддхаритва̄ патирӯпе т̣ха̄не на т̣хапеййа, парена ва̄ татха̄ на ка̄ра̄пеййа. ана̄пуччхам̣ ва̄ гаччхеййа̄ти йо бхиккху ва̄ са̄ман̣еро ва̄ а̄ра̄мико ва̄ ладжджӣ хоти, аттано палибодхам̣ вийа ман̃н̃ати, татха̄рӯпам̣ ана̄пуччхитва̄ там̣ сена̄санам̣ тасса аниййа̄тетва̄ нирапеккхо гаччхати, тха̄мамаджджхимасса пурисасса лед̣д̣упа̄там̣ атиккамеййа, тасса екена па̄дена лед̣д̣упа̄та̄тиккаме дуккат̣ам̣, дутийапа̄да̄тиккаме па̄читтийам̣. бходжанаса̄ла̄йа т̣хито пана ‘‘асукасмим̣ на̄ма дива̄виха̄рат̣т̣ха̄не пан̃н̃апетва̄ гаччха̄хӣ’’ти песетва̄ тато никкхамитва̄ ан̃н̃аттха гаччханто па̄дуддха̄рена ка̄ретаббо.

са̄ваттхийам̣ самбахуле бхиккхӯ а̄раббха сантхатам̣ ануддхаритва̄ ана̄пуччхам̣ паккаманаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣, пуггалике тикадуккат̣ам̣, чимиликам̣ ва̄ уттараттхаран̣ам̣ ва̄ бхӯматтхаран̣ам̣ ва̄ тат̣т̣икам̣ ва̄ чаммаккхан̣д̣ам̣ ва̄ па̄дапун̃чханам̣ ва̄ пхалакапӣт̣хам̣ ва̄ йам̣ ва̄ панан̃н̃ам̣ кан̃чи да̄рубхан̣д̣ам̣ маттика̄бхан̣д̣ам̣ антамасо патта̄дха̄ракампи вутталаккхан̣е аджджхока̄се т̣хапетва̄ гаччхантасса дуккат̣амева. а̄ран̃н̃акена пана асати ановассаке саббам̣ руккхе лаггетва̄пи йатха̄ ва̄ упачика̄хи на кхаджджати, евам̣ катва̄пи гантум̣ ват̣т̣ати. аббхока̄сикена пана чӣваракут̣икам̣ катва̄пи раккхитаббам̣. аттано сантаке, висса̄сикапуггалике, уддхаран̣а̄дӣни катва̄ гамане, ота̄пентасса, ‘‘а̄гантва̄ уддхарисса̄мӣ’’ти гаччхато, вуд̣д̣хатара̄ ут̣т̣ха̄пенти, амануссо таттха нисӣдати, кочи иссаро ган̣ха̄ти, сӣха̄дайо там̣ т̣ха̄нам̣ а̄гантва̄ тит̣т̣ханти, евам̣ сена̄санам̣ палибуддхам̣ хоти, татха̄ палибуддхе ва̄ сена̄сане, джӣвитабрахмачарийантара̄йакара̄су а̄пада̄су ва̄ гаччхантасса, умматтака̄дӣнан̃ча ана̄патти. ман̃ча̄дӣнам̣ сан̇гхиката̄, вутталаккхан̣е десе сантхаран̣ам̣ ва̄ сантхара̄панам̣ ва̄, апалибуддхата̄, а̄пада̄йа абха̄во, нирапеккхата̄, лед̣д̣упа̄та̄тиккамоти има̄неттха чха ан̇га̄ни. самут̣т̣ха̄на̄дӣни пат̣хамакатхинасадиса̄нева, идам̣ пана кирийа̄кирийанти.

пат̣хамасена̄санасиккха̄падаван̣н̣ана̄ нит̣т̣хита̄.