1. бхӯтага̄масиккха̄падаван̣н̣ана̄

бхӯтага̄маваггасса пат̣хаме бхӯтага̄мапа̄табйата̄йа̄ти еттха бхаванти ахесун̃ча̄ти бхӯта̄, джа̄йанти вад̣д̣ханти джа̄та̄ вад̣д̣хита̄ ча̄ти аттхо. га̄моти ра̄си, бхӯта̄нам̣ га̄мо, бхӯта̄ ева ва̄ га̄моти бхӯтага̄мо, патит̣т̣хитахаритатин̣аруккха̄дӣнаметам̣ адхивачанам̣. па̄табйасса бха̄во па̄табйата̄, чхеданабхедана̄дӣхи йатха̄ручи парибхун̃джитаббата̄ти аттхо, тассам̣ бхӯтага̄мапа̄табйата̄йа, нимиттаттхе четам̣ бхуммавачанам̣, бхӯтага̄мапа̄табйата̄хету бхӯтага̄масса чхедана̄дипаччайа̄ па̄читтийанти аттхо. тасма̄ йо бхиккху патхавиудакапа̄ка̄ра̄дӣсу йаттхакаттхачи джа̄там̣ асуккхам̣ антамасо атисукхуматин̣ампи са̄сапабӣджакасева̄лампи уддхаран̣аччхеданавиджджхана̄дӣхи викопети ва̄ патхавикхан̣ане вуттанайена викопа̄пети ва̄ па̄читтийам̣ а̄паджджати.

а̄л̣авийам̣ а̄л̣аваке бхиккхӯ а̄раббха руккхачхинданаваттхусмим̣ пан̃н̃аттам̣, са̄дха̄ран̣апан̃н̃атти, са̄н̣аттикам̣, бхӯтага̄мато вийоджитамӯлабӣджакхандхабӣджапхалубӣджааггабӣджабӣджабӣджа̄нам̣ ан̃н̃атарам̣ бха̄джанагатам̣ ва̄ ра̄сикатам̣ ва̄ бхӯмийам̣ ропитампи никкхантамӯламаттам̣ ва̄ никкхантаан̇кураматтам̣ ва̄ сачеписса видаттхиматта̄ паттават̣т̣и ниггаччхати, аниккханте ва̄ мӯле никкханте ва̄ мӯле йа̄ва ан̇куро харито на хоти, та̄ва там̣ викопентасса дуккат̣ам̣, татха̄ бхӯтага̄мабӣджага̄ме вематикасса, абхӯтага̄мабӣджага̄ме бхӯтага̄мабӣджага̄масан̃н̃ино чева вематикасса ча. убхайаттха пана ататха̄сан̃н̃исса, умматтака̄дӣнан̃ча ана̄патти, асан̃чичча асатийа̄ аджа̄нитва̄ ва̄ викопентасса, ‘имам̣ руккха’нти евам̣ анийаметва̄ ‘‘руккхам̣ чхинда, валлим̣ чхинда̄’’тиа̄дӣни бхан̣антасса, ‘‘имам̣ пуппхам̣ ва̄ пхалам̣ ва̄ джа̄на, имам̣ дехи, имам̣ а̄хара, имина̄ ме аттхо, имам̣ каппийам̣ карохӣ’’ти бхан̣антасса ча ана̄патти. евам̣ каппийавачанена бхӯтага̄мато вийоджитам̣ пана бӣджаджа̄там̣ пуна пи ‘‘каппийам̣ карохӣ’’ти ка̄ретва̄ва парибхун̃джитаббам̣. еван̃хисса бӣджага̄мапаримочанампи катам̣ хоти.

каппийам̣ каронтена пана аггина̄ ва̄ накхена ва̄ саттхена ва̄ каттаббам̣, аггина̄ каронтена ча йена кеначи аггина̄ екадесе пхусантена ‘каппийа’нти ватва̄ва ка̄таббам̣. саттхена каронтена йасса кассачи тикхин̣асаттхасса антамасо сӯчинакхаччхедана̄дӣнампи тун̣д̣ена ва̄ дха̄ра̄йа ва̄ ведхам̣ ва̄ чхедам̣ ва̄ дассентена татхева ка̄таббам̣. накхена каронтена т̣хапетва̄ гомахим̣са̄дӣнам̣ кхуре йена кеначи апӯтина̄ манусса̄нам̣ ва̄ тираччха̄на̄нам̣ ва̄ накхена антамасо чхиндитва̄ а̄хат̣ена̄пи саттхе вуттанайенева ка̄таббам̣. таттха сачепи бӣджа̄нам̣ паббатаматто ра̄си, руккхасахассам̣ ва̄ чхиндитва̄ ека̄баддхам̣, уччхӯнам̣ ва̄ маха̄бха̄ро бандхитва̄ т̣хапито хоти, екасмим̣ бӣдже ва̄ руккхаса̄кха̄йа ва̄ уччхумхи ва̄ каппийе кате саббам̣ катам̣ хоти. уччхум̣ ‘‘каппийам̣ карисса̄мӣ’’ти техи саддхим̣ баддхам̣ да̄рукам̣ виджджхати, ват̣т̣атийева. саче пана йа̄йа валлийа̄ бха̄ро баддхо, там̣ виджджхати, на ват̣т̣ати. маричапакка̄дӣхи миссетва̄ бхаттам̣ а̄харанти, ‘‘каппийам̣ карохӣ’’ти вутте сачепи бхаттаситтхе виджджхати, ват̣т̣атийева, тилатан̣д̣улесупи есева найо. йа̄гуйа̄ паккхитта̄ни пана ека̄баддха̄ни хутва̄ на сантит̣т̣ханти, таттха екекам̣ виджджхитва̄ва ка̄таббам̣. капит̣т̣хапхала̄дӣнам̣ анто мин̃джам̣ кат̣а̄хам̣ мун̃читва̄ сан̃чарати, бхинда̄петва̄ каппийам̣ ка̄ретаббам̣. ека̄баддха̄ че, кат̣а̄хепи ка̄тум̣ ват̣т̣ати. йам̣ пана пхалам̣ тарун̣ам̣ хоти абӣджам̣ йан̃ча ниббаттабӣджам̣ бӣджам̣ апанетва̄ парибхун̃джитаббам̣, таттха каппийакаран̣акиччам̣ наттхи. бхӯтага̄мо, бхӯтага̄масан̃н̃ита̄, викопанам̣ ва̄ викопа̄панам̣ ва̄ти има̄неттха тӣн̣и ан̇га̄ни. самут̣т̣ха̄на̄дӣни патхавикхан̣анасадиса̄нева̄ти.

бхӯтага̄масиккха̄падаван̣н̣ана̄ нит̣т̣хита̄.