4. падасодхаммасиккха̄падаван̣н̣ана̄

чатуттхе падасо дхаммам̣ ва̄чеййа̄ти сан̇гӣтиттайам̣ ана̄рул̣хампи ра̄джова̄датиккхиндрийачатупариваттананандопанандакулумпасуттамаггакатха̄дидхамман̃ча сан̇гӣтиттайама̄рул̣хам̣ типит̣акадхамман̃ча падам̣ падам̣ ва̄чеййа, пада̄нупадаанваккхараанубйан̃джанесу екекам̣ кот̣т̣ха̄санти аттхо. па̄читтийанти етесу пада̄дӣсу бхиккхун̃ча бхиккхунин̃ча т̣хапетва̄ йам̣кан̃чи кот̣т̣ха̄сам̣ авасесапуггалехи саддхим̣ екато бхан̣антасса пада̄диган̣ана̄йа па̄читтийам̣.

са̄ваттхийам̣ чхаббаггийе бхиккхӯ а̄раббха падасо дхаммава̄чанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, тикапа̄читтийам̣. упасампанне анупасампаннасан̃н̃ино вематикасса ва̄ дуккат̣ам̣. анупасампаннена саддхим̣ екато уддесаггахан̣е, саджджха̄йакаран̣е, тасса сантике уддесаггахан̣е, йебхуййена пагун̣агантхам̣ бхан̣антасса, оса̄рентасса ча кхалитат̣т̣ха̄не ‘‘евам̣ бхан̣а̄хӣ’’ти вачане ча екато бхан̣антасса̄пи, умматтака̄дӣнан̃ча ана̄патти. анупасампанната̄, вутталаккхан̣ам̣ дхаммам̣ падасо ва̄чаната̄, екато оса̄панан̃ча̄ти има̄неттха тӣн̣и ан̇га̄ни. падасодхаммасамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, вачӣкаммам̣, тичиттам̣, тиведананти.

падасодхаммасиккха̄падаван̣н̣ана̄ нит̣т̣хита̄.