5. пат̣хамасахасеййасиккха̄падаван̣н̣ана̄

пан̃чаме анупасампаннена̄ти бхиккхум̣ т̣хапетва̄ антамасо па̄ра̄джикаваттхубхӯтена тираччха̄нагатена̄пи. уттаридираттатираттанти двиннам̣ ва̄ тин̣н̣ам̣ ва̄ раттӣнам̣ упари. сахасеййанти саббаччханнапариччханне йебхуййена чханнапариччханне ва̄ сена̄сане пубба̄парийена ва̄ екаккхан̣ена ва̄ екато нипаджджанам̣. каппеййа̄ти видахеййа сампа̄деййа. таттха чхаданам̣ ана̄хачча дийад̣д̣хахаттхуббедхена па̄ка̄ра̄дина̄ париччхиннампи саббапариччханнамиччева ведитаббам̣, тасма̄ имина̄ лаккхан̣ена саманна̄гато сачепи саттабхӯмико па̄са̄до екӯпача̄ро хоти, сатагаббхам̣ ва̄ чатуса̄лам̣, йо таттха ва̄ ан̃н̃аттха ва̄ та̄дисе тена ва̄ ан̃н̃ена ва̄ анупасампаннена саха тиссо раттийо сайитва̄ чатуттхадивасе аттхан̇гате сӯрийе анупасампанне нипанне габбхадва̄рам̣ пидха̄йа ва̄ апидха̄йа ва̄ нипаджджати, пат̣хаманипанно ва̄ тасмим̣ нипаджджанте на вут̣т̣ха̄ти, тасса убхиннам̣ ут̣т̣хахитва̄ нипаджджанаппайогаган̣ана̄йа анупасампаннаган̣ана̄йа ча па̄читтийам̣. айаметтха сан̇кхепо, виттха̄ро пана самантапа̄са̄дика̄йам̣ (па̄чи. ат̣т̣ха. 51) саббаппака̄рато вутто.

а̄л̣авийам̣ самбахуле бхиккхӯ а̄раббха анупасампаннена сахасеййаваттхусмим̣ пан̃н̃аттам̣, ‘‘уттаридираттатиратта’’нти айаметтха анупан̃н̃атти, са̄дха̄ран̣апан̃н̃атти, ана̄н̣аттикам̣, тикапа̄читтийам̣, упасампанне анупасампаннасан̃н̃ино вематикасса ва̄ упаддхаччханнапариччханна̄дӣсу ча дуккат̣ам̣. ӯнакадираттатираттам̣ васантасса, татийа̄йа раттийа̄ пура̄рун̣а̄ никкхамитва̄ пуна васантасса, саббаччханнасабба̄париччханна̄дӣсу васантасса, итарасмим̣ нисинне нипаджджантасса, нипанне ва̄ нисӣдантасса, умматтака̄дӣнан̃ча ана̄патти. па̄читтийаваттхукасена̄санам̣, таттха анупасампаннена саха нипаджджанам̣, чатуттхадивасе сӯрийаттхан̇гамананти има̄неттха тӣн̣и ан̇га̄ни. самут̣т̣ха̄на̄дӣни ел̣акаломасадиса̄нева̄ти.

пат̣хамасахасеййасиккха̄падаван̣н̣ана̄ нит̣т̣хита̄.