2. омасава̄дасиккха̄падаван̣н̣ана̄

дутийе омасава̄дети овиджджханавачане, джа̄тина̄маготтакаммасиппаа̄ба̄дхалин̇гакилесаа̄паттиаккосесу бхӯтена ва̄ абхӯтена ва̄ йена кеначи па̄ра̄джикам̣ а̄паннам̣ ва̄ ана̄паннам̣ ва̄ йам̣кин̃чи бхиккхум̣ йа̄йа ка̄йачи ва̄ча̄йа ва̄ хаттхамудда̄йа ва̄ анан̃н̃а̄падесена аккосанавачане па̄читтийанти аттхо.

са̄ваттхийам̣ чхаббаггийе бхиккхӯ а̄раббха омасанаваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, техийева дасахи аккосаваттхӯхи ‘‘санти идхекачче чан̣д̣а̄ла̄’’тиа̄дина̄ (па̄чи. 26) найена ан̃н̃а̄падесам̣ катва̄ аккосантасса, ‘‘чороси ган̣т̣хибхедакосӣ’’тиа̄дӣхи па̄л̣имуттакападехи аккосантасса, йатха̄ татха̄ ва̄ анупасампаннам̣ аккосантасса ча дуккат̣ам̣. идха бхиккхунӣпи анупасампаннасан̇кхйам̣ гаччхати. анаккоситука̄масса кевалам̣ давакамйата̄йа вадато саббаттха дуббха̄ситам̣. аттхадхаммаануса̄санипуреккха̄ра̄нам̣, умматтака̄дӣнан̃ча ана̄патти. йам̣ аккосати, тасса упасампанната̄, анан̃н̃а̄падесена джа̄тиа̄дӣхи аккосанам̣, ‘‘мам̣ аккосатӣ’’ти джа̄нана̄, аттхапуреккха̄рата̄дӣнам̣ абха̄воти има̄неттха чатта̄ри ан̇га̄ни. самут̣т̣ха̄на̄дӣни адинна̄да̄насадиса̄ни, ведана̄ пана идха дуккха̄ти.

омасава̄дасиккха̄падаван̣н̣ана̄ нит̣т̣хита̄.