1. муса̄ва̄дасиккха̄падаван̣н̣ана̄

па̄читтийесу муса̄ва̄даваггасса пат̣хаме сампаджа̄намуса̄ва̄дети пуббепи джа̄нитва̄ вачанаккхан̣епи джа̄нантассева муса̄ва̄дабхан̣ане. бхан̣анан̃ча на̄ма идха абхӯтасса ва̄ бхӯтатам̣, бхӯтасса ва̄ абхӯтатам̣ катва̄ ка̄йена ва̄ ва̄ча̄йа ва̄ вин̃н̃а̄панаппайого, нимиттаттхе четам̣ бхуммавачанам̣. тасма̄ йо сампаджа̄намуса̄ва̄дам̣ вадати, тасса там̣нимиттам̣ там̣хету таппаччайа̄ па̄читтийам̣ хотӣти еваметтха ан̃н̃есу ча ӣдисесу аттхо ведитаббо.

са̄ваттхийам̣ хаттхакам̣ сакйапуттам̣ а̄раббха аваджа̄нитва̄ пат̣иджа̄нана̄диваттхусмим̣ пан̃н̃аттам̣, са̄дха̄ран̣апан̃н̃атти, ана̄н̣аттикам̣, уттаримануссадхамма̄рочанаттхам̣ муса̄ бхан̣антасса па̄ра̄джикам̣, амӯлакена па̄ра̄джикена ануддхам̣санаттхам̣ сан̇гха̄дисесо, сан̇гха̄дисесена ануддхам̣санаттхам̣ па̄читтийам̣, а̄ча̄равипаттийа̄ ануддхам̣санаттхам̣ дуккат̣ам̣, ‘‘йо те виха̄ре васӣ’’тиа̄дина̄ (па̄ра̄. 220) парийа̄йена уттаримануссадхамма̄рочанаттхам̣ пат̣ивиджа̄нантасса муса̄ бхан̣ите тхуллаччайам̣, аппат̣ивиджа̄нантасса дуккат̣ам̣, кевалам̣ муса̄ бхан̣антасса идха па̄читтийам̣. анупадха̄ретва̄ сахаса̄ бхан̣антасса, ‘‘ан̃н̃ам̣ бхан̣исса̄мӣ’’ти ан̃н̃ам̣ бхан̣антасса, умматтака̄дӣнан̃ча ана̄патти. висам̣ва̄данапуреккха̄рата̄, висам̣ва̄даначиттена йаматтхам̣ ваттука̄мо, тасса пуггаласса вин̃н̃а̄панапайого ча̄ти има̄неттха две ан̇га̄ни. самут̣т̣ха̄на̄дӣни адинна̄да̄насадиса̄нӣти.

муса̄ва̄дасиккха̄падаван̣н̣ана̄ нит̣т̣хита̄.