3. бхесаджджасиккха̄падаван̣н̣ана̄

татийе пат̣иса̄йанӣйа̄нӣти пат̣иса̄йитабба̄ни, парибхун̃джитабба̄нӣти аттхо. етена сайам̣ уггахетва̄ никкхитта̄нам̣ сатта̄ха̄тиккамепи ана̄паттим̣ дассети, та̄ни хи пат̣иса̄йитум̣ на ват̣т̣анти. бхесаджджа̄нӣти бхесаджджакиччам̣ каронту ва̄, ма̄ ва̄, евам̣ ладдхавоха̄ра̄ни. саппи на̄ма гава̄дӣнам̣ саппи, йесам̣ мам̣сам̣ каппати, тесам̣ саппи. татха̄ наванӣтам̣. телам̣ на̄ма тиласа̄сапамадхӯкаеран̣д̣акаваса̄дӣхи ниббаттитам̣. мадху на̄ма маккхика̄мадхумева. пха̄н̣итам̣ на̄ма уччхурасам̣ упа̄да̄йа пана апакка̄ ва̄ аваттхукапакка̄ ва̄ сабба̄пи уччхувикати ‘‘пха̄н̣ита’’нти ведитаббам̣. та̄ни пат̣иггахетва̄ти та̄ни бхесаджджа̄ни пат̣иггахетва̄, на тесам̣ ваттхӯни. етена т̣хапетва̄ васа̄телам̣ йа̄неттха йа̄вака̄ликаваттхука̄ни, тесам̣ ваттхӯни пат̣иггахетва̄ ката̄ни саппиа̄дӣни сатта̄хам̣ атикка̄майатопи ана̄паттим̣ дассети. васа̄телам̣ пана ка̄ле пат̣иггахитам̣ ка̄ле нипаккам̣ ка̄ле сам̣сат̣т̣хам̣ телапарибхогена парибхун̃джитум̣ анун̃н̃а̄там̣, тасма̄ т̣хапетва̄ мануссавасам̣ ан̃н̃ам̣ йам̣кан̃чи васам̣ пуребхаттам̣ пат̣иггахетва̄ са̄мам̣ пачитва̄ ниббаттитателампи сатта̄хам̣ нира̄мисапарибхогена ват̣т̣ати. анупасампаннена пачитва̄ диннам̣ пана тадахупуребхаттам̣ са̄мисампи ват̣т̣ати, ан̃н̃есам̣ йа̄вака̄ликаваттхӯнам̣ ваттхум̣ пачитум̣ на ват̣т̣атийева. ниббаттитасаппи ва̄ наванӣтам̣ ва̄ пачитум̣ ват̣т̣ати, там̣ пана тадахупуребхаттампи са̄мисам̣ парибхун̃джитум̣ на ват̣т̣ати. пуребхаттам̣ пат̣иггахитакхӣра̄дито анупасампаннена пачитва̄ катасаппиа̄дӣни пана тадахупуребхаттам̣ са̄миса̄нипи ват̣т̣анти, паччха̄бхаттато пат̣т̣ха̄йа анаджджхохаран̣ӣйа̄ни, сатта̄ха̄тиккамепи ана̄патти. саннидхика̄ракам̣ парибхун̃джитабба̄нӣти саннидхим̣ катва̄ нидахитва̄ пуребхаттам̣ пат̣иггахита̄ни тадахупуребхаттам̣ са̄мисапарибхогена̄пи ват̣т̣анти, паччха̄бхаттато пат̣т̣ха̄йа пана та̄ни ча, паччха̄бхаттам̣ пат̣иггахита̄ни ча сатта̄хам̣ нира̄мисапарибхогена парибхун̃джитабба̄нӣти аттхо. ‘‘парибхун̃джитабба̄нӣ’’ти ча вачанато антосатта̄хе аббхан̃джана̄дӣнам̣ аттха̄йа адхит̣т̣хахитва̄ т̣хапитесу ана̄патти, йа̄ваджӣвика̄ни са̄сапамадхӯкаеран̣д̣акаат̣т̣хӣни телакаран̣аттхам̣ пат̣иггахетва̄ тадахева катателам̣ сатта̄хака̄ликам̣, дутийадивасе катам̣ чха̄хам̣ ват̣т̣ати, татийадивасе катам̣ пан̃ча̄хам̣, чатуттхапан̃чамачхат̣т̣хасаттамадивасе катам̣ тадахева ват̣т̣ати. саче йа̄ва арун̣асса уггамана̄ тит̣т̣хати, ниссаггийам̣ хоти, ат̣т̣хамадивасе катам̣ анаджджхохаран̣ӣйам̣, аниссаггийатта̄ пана ба̄хирапарибхогена ват̣т̣ати. сачепи на кароти, телаттха̄йа пат̣иггахитаса̄сапа̄дӣнам̣ пана па̄л̣ийам̣ ана̄гатасаппиа̄дӣнан̃ча сатта̄ха̄тиккаме дуккат̣ам̣ а̄паджджати. сӣтудакена катамадхӯкапуппхапха̄н̣итам̣ пана пха̄н̣итагатикамева, амбапха̄н̣ита̄дӣни йа̄вака̄лика̄ни. йам̣ панеттха сатта̄хака̄ликам̣, там̣ ниссат̣т̣хам̣ пат̣илабхитва̄пи аруа̄дӣни ва̄ маккхетум̣, аджджхохаритум̣ ва̄ на ват̣т̣ати. падӣпе ка̄л̣аван̣н̣е ва̄ упанетаббам̣, ан̃н̃асса бхиккхуно ка̄йикапарибхогам̣ ват̣т̣ати. йам̣ пана нирапеккхо париччаджитва̄ пуна лабхати, там̣ аджджхохаритумпи ват̣т̣ати. висум̣ т̣хапитасаппиа̄дӣсу, екабха̄джане ва̄ амисситесу ваттхуган̣ана̄йа а̄паттийо.

са̄ваттхийам̣ самбахуле бхиккхӯ а̄раббха сатта̄хам̣ атиккаманаваттхусмим̣ пан̃н̃аттам̣, сесам̣ чӣвараваггасса пат̣хамасиккха̄паде вуттанайенева ведитаббанти.

бхесаджджасиккха̄падаван̣н̣ана̄ нит̣т̣хита̄.