1. паттасиккха̄падаван̣н̣ана̄

паттаваггасса пат̣хаме атирекапаттоти анадхит̣т̣хито ча авикаппито ча, со ча кхо уккат̣т̣хамаджджхимомака̄нам̣ ан̃н̃атаро пама̄н̣айуттова, тасса пама̄н̣ам̣ ‘‘ад̣д̣ха̄л̣хакоданам̣ ган̣ха̄тӣ’’тиа̄дина̄ (па̄ра̄ 602) найена па̄л̣ийам̣ вуттам̣. татра̄йам̣ виниччхайо – анупахатапура̄н̣аса̄литан̣д̣ула̄нам̣ сукот̣т̣итапарисуддха̄нам̣ две магадхана̄л̣ийо гахетва̄ техи тан̣д̣улехи ануттан̣д̣уламакилиннамапин̣д̣икам̣ сувисадам̣ кундамакул̣ара̄сисадисам̣ авасса̄витоданам̣ пачитва̄ ниравасесам̣ патте паккхипитва̄ тасса оданасса чатуттхабха̄гаппама̄н̣о на̄тигхано на̄титануко хаттхаха̄рийо саббасамбха̄расан̇кхато муггасӯпо паккхипитаббо, тато а̄лопасса анурӯпам̣ йа̄вачарима̄лопаппахонакам̣ маччхамам̣са̄дибйан̃джанам̣ паккхипитаббам̣, саппителатаккарасакан̃джийа̄дӣни пана ган̣анӯпага̄ни на хонти. та̄ни хи оданагатика̄нева, нева ха̄петум̣, на вад̣д̣хетум̣ сакконти, еваметам̣ саббампи паккхиттам̣ саче паттасса мукхават̣т̣ийа̄ хет̣т̣химара̄джисамам̣ тит̣т̣хати, суттена ва̄ хӣрена ва̄ чхиндантасса суттасса ва̄ хӣрасса ва̄ хет̣т̣химантам̣ пхусати, айам̣ уккат̣т̣хо на̄ма патто. саче там̣ ра̄джим̣ атиккамма тхӯпӣкатам̣ тит̣т̣хати, айам̣ уккат̣т̣хомако на̄ма патто. саче там̣ ра̄джим̣ на сампа̄пун̣а̄ти, антогадхамева хоти, айам̣ уккат̣т̣хуккат̣т̣хо на̄ма патто. уккат̣т̣хато упад̣д̣хаппама̄н̣о маджджхимо. маджджхимапаттато упад̣д̣хаппама̄н̣о омако. тесампи вуттанайенева бхедо ведитаббо. иччетесу навасу уккат̣т̣хуккат̣т̣хо ча омакомако ча̄ти две апатта̄, сеса̄ сатта патта̄ пама̄н̣айутта̄ на̄ма, айаметтхасан̇кхепо, виттха̄ро пана самантапа̄са̄дика̄йам̣ (па̄ра̄. ат̣т̣ха. 2.598 а̄дайо) вутто, тасма̄ евам̣ пама̄н̣айуттам̣ саман̣аса̄руппена паккам̣ айопаттам̣ ва̄ маттика̄паттам̣ ва̄ лабхитва̄ пура̄н̣апаттам̣ паччуддхаритва̄ антодаса̄хе адхит̣т̣ха̄таббо. саче панасса мӯлато ка̄кан̣икаматтампи да̄таббам̣ авасит̣т̣хам̣ хоти, адхит̣т̣ха̄нупаго на хоти, аппаччуддхарантена викаппетаббо. таттха паччуддхаран̣а̄дхит̣т̣ха̄налаккхан̣ам̣ чӣваравагге вуттанайенева ведитаббам̣, викаппаналаккхан̣ам̣ парато ваккха̄ма. саче пана кочи апаттако бхиккху даса патте лабхитва̄ саббе аттана̄ва парибхун̃джитука̄мо хоти, екам̣ паттам̣ адхит̣т̣ха̄йа пуна дивасе там̣ паччуддхаритва̄ ан̃н̃о адхит̣т̣ха̄таббо, етенупа̄йена вассасатампи парихаритум̣ сакка̄. йо панасса патто мукхават̣т̣ито хет̣т̣ха̄ дван̇гуламаттока̄сато пат̣т̣ха̄йа йаттхакаттхачи кан̇гуситтханиккхаманаматтена чхиддена чхиддо хоти, со адхит̣т̣ха̄нупаго на хоти. пуна чхидде па̄катике кате адхит̣т̣ха̄таббо, сесам̣ адхит̣т̣ха̄навиджаханам̣ тичӣваре вуттанайамева.

са̄ваттхийам̣ чхаббаггийе а̄раббха атирекапаттадха̄ран̣аваттхусмим̣ пан̃н̃аттам̣, аса̄дха̄ран̣апан̃н̃атти, сесаван̣н̣ана̄ккамо чӣвараваггасса пат̣хамасиккха̄паде вуттанайенева ведитабботи.

паттасиккха̄падаван̣н̣ана̄ нит̣т̣хита̄.