6. ел̣акаломасиккха̄падаван̣н̣ана̄

чхат̣т̣хе аддха̄намаггаппат̣ипаннасса̄ти аддха̄насан̇кха̄там̣ дӣгхамаггам̣ пат̣ипаннасса, саббан̃четам̣ ваттхуматтадӣпанамева, йаттха каттхачи пана дхаммена лабхитва̄ ган̣хато досо наттхи. тийоджанапараманти гахитат̣т̣ха̄нато тийоджанаппама̄н̣ам̣ десам̣. сахаттха̄ти сахаттхена, аттана̄ харитабба̄нӣти аттхо. асанте ха̄ракети асантейева ан̃н̃асмимпи ха̄раке. саче пана аттхи, там̣ га̄хетум̣ ват̣т̣ати. аттана̄ пана антамасо ва̄та̄ба̄дхаппат̣ика̄раттхам̣ суттакена абандхитва̄ кан̣н̣аччхидде паккхитта̄нипи а̄да̄йа тийоджанам̣ екам̣ па̄дам̣ атикка̄ментасса дуккат̣ам̣, дутийапа̄да̄тиккаме ниссаггийам̣ па̄читтийам̣.

са̄ваттхийам̣ ан̃н̃атарам̣ бхиккхум̣ а̄раббха тийоджана̄тиккаманаваттхусмим̣ пан̃н̃аттам̣, аса̄дха̄ран̣апан̃н̃атти, ана̄н̣аттикам̣, тикапа̄читтийам̣, ӯнакатийоджане атирекасан̃н̃ино вематикасса ва̄ дуккат̣ам̣. тийоджанам̣ харан̣апачча̄харан̣е, ва̄са̄дхиппа̄йена гантва̄ тато парам̣ харан̣е, аччхиннам̣ ва̄ ниссат̣т̣хам̣ ва̄ пат̣илабхитва̄ харан̣е, ан̃н̃ам̣ хара̄пане, антамасо суттакенапи баддхакатабхан̣д̣ахаран̣е, умматтака̄дӣнан̃ча ана̄патти. ел̣акалома̄нам̣ акатабхан̣д̣ата̄, пат̣хамаппат̣ила̄бхо, аттана̄ а̄да̄йа ва̄ ан̃н̃асса аджа̄нантасса йа̄не паккхипитва̄ ва̄ тийоджана̄тиккаманам̣, а̄харан̣апачча̄харан̣ам̣, ава̄са̄дхиппа̄йата̄ти има̄неттха пан̃ча ан̇га̄ни. ел̣акаломасамут̣т̣ха̄нам̣, кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣, тичиттам̣, тиведананти.

ел̣акаломасиккха̄падаван̣н̣ана̄ нит̣т̣хита̄.