1. косийасиккха̄падаван̣н̣ана̄

ел̣акаломаваггасса пат̣хаме косийамиссаканти екена̄пи косийам̣суна̄ антамасо тасса каран̣ат̣т̣ха̄не ва̄тавегена нипа̄титена̄пи миссӣкатам̣. сантхатанти саме бхӯмибха̄ге косийам̣сӯни упарӯпари сантхаритва̄ кан̃джийа̄дӣхи син̃читва̄ каттаббата̄лаккхан̣ам̣. ка̄ра̄пеййа ниссаггийанти каран̣ака̄ра̄панаппайогесу дуккат̣ам̣, пат̣ила̄бхена ниссаггийам̣ хоти. еттха ча ‘‘идам̣ ме, бханте, косийамиссакам̣ сантхатам̣ ка̄ра̄питам̣ ниссаггийа’’нти (па̄ра̄. 544) имина̄ найена ниссаджджанавидха̄нам̣ ведитаббам̣, имассева вачанасса ануса̄рена ито парам̣ саббасантхатам̣ ведитаббам̣. сакка̄ хи етта̄вата̄ джа̄нитунти на там̣ ито парам̣ дассайисса̄ма.

а̄л̣авийам̣ чхаббаггийе а̄раббха косийамиссакам̣ сантхатам̣ ка̄ра̄панаваттхусмим̣ пан̃н̃аттам̣, аса̄дха̄ран̣апан̃н̃атти, аттано аттха̄йа ка̄ра̄панавасена са̄н̣аттикам̣, аттана̄ виппакатапаайоса̄пананайена чатуккапа̄читтийам̣, ан̃н̃ассаттха̄йа каран̣ака̄ра̄панесу ан̃н̃ена катам̣ пат̣илабхитва̄ парибхун̃джане ча дуккат̣ам̣. вита̄на̄дикаран̣е, умматтака̄дӣнан̃ча ана̄патти. косийамиссакабха̄во, аттано аттха̄йа сантхатасса каран̣ака̄ра̄панам̣, пат̣ила̄бхо ча̄ти има̄неттха тӣн̣и ан̇га̄ни. самут̣т̣ха̄на̄дӣни дхова̄панасиккха̄паде вуттанайенева̄ти.

косийасиккха̄падаван̣н̣ана̄ нит̣т̣хита̄.