12. дуббачасиккха̄падаван̣н̣ана̄

два̄дасаме дуббачаджа̄тикоти дуббачасабха̄во, ваттум̣ асаккун̣еййоти аттхо. уддесапарийа̄паннесӯти уддесе парийа̄паннесу антогадхесу, ‘‘йасса сийа̄ а̄патти, со а̄викареййа̄’’ти евам̣ сан̇гахитатта̄ анто па̄тимоккхасса ваттама̄несӯти аттхо. сахадхаммикам̣ вуччама̄ноти сахадхаммикена вуччама̄но, ка̄ран̣аттхе четам̣ упайогавачанам̣. пан̃чахи сахадхаммикехи сиккхитаббатта̄, тесам̣ ва̄ сантакатта̄ ‘‘сахадхаммика’’нти ладдхана̄мена буддхапан̃н̃аттена сиккха̄падена вуччама̄ноти аттхо. вираматха̄йасманто мама вачана̄йа̄ти йена вачанена мам̣ вадатха, тато мама вачанато вираматха, ма̄ мам̣ там̣ вачанам̣ вадатха̄ти вуттам̣ хоти. вадату саха дхаммена̄ти сахадхаммикена сиккха̄падена, сахадхаммена ва̄ ан̃н̃енапи па̄са̄дикабха̄васам̣ваттаникена вачанена вадету. йадиданти вуддхика̄ран̣адассанаттхе нипа̄то, тена йам̣ идам̣ ан̃н̃аман̃н̃асса хитавачанам̣, а̄паттито ча вут̣т̣ха̄панам̣, тена ан̃н̃аман̃н̃авачанена ан̃н̃аман̃н̃авут̣т̣ха̄панена. евам̣ сам̣ваддха̄хи тасса бхагавато париса̄ти евам̣ париса̄йа вуддхика̄ран̣ам̣ дасситам̣ хоти. сесам̣ утта̄наттхамева. виниччхайакатха̄пи дасаме вуттасадиса̄йева.

айам̣ пана висесо – идам̣ косамбийам̣ чханнаттхерам̣ а̄раббха атта̄нам̣ авачанӣйакаран̣аваттхусмим̣ пан̃н̃аттам̣, ан̇гесу ча йатха̄ таттха параккаманам̣, евам̣ идха авачанӣйакаран̣ата̄ дат̣т̣хабба̄ти.

дуббачасиккха̄падаван̣н̣ана̄ нит̣т̣хита̄.